ខេត្តកណ្តាល ៖ ជនជាប់ចោទម្នាក់ត្រូវបានចាប់ខ្លួន កាលពីល្ងាចថ្ងៃទី៥ មីនា ពាក់ព័ន្ធនឹងអំពើឃាតកម្មគិតទុកជាមុនក្នុងរឿងបា.ញ់សម្លា.ប់ប្រពន្ធ កើតឡើងកាលពីថ្ងៃទី១៤ មិថុនា ២០១៣ កន្លងមក នៅចំណុចភូមិត្បូងវត្ត ឃុំជ្រៃលាស់ ស្រុកពញាឮ ។ ការចាប់ខ្លួននេះធ្វើឡើងដោយប៉ូលិសនៃស្នងការដ្ឋានខេត្តកណ្តាល សហការជាមួយកម្លាំងប៉ូលិសខេត្តកំពង់ស្ពឺ ។
ខេត្តកណ្តាល ៖ ជនជាប់ចោទម្នាក់ត្រូវបានចាប់ខ្លួន កាលពីល្ងាចថ្ងៃទី៥ មីនា ពាក់ព័ន្ធនឹងអំពើឃាតកម្មគិតទុកជាមុនក្នុងរឿងបាញ់សម្លាប់ប្រពន្ធ កើតឡើងកាលពីថ្ងៃទី១៤ មិថុនា ២០១៣ កន្លងមក នៅចំណុចភូមិត្បូងវត្ត ឃុំជ្រៃលាស់ ស្រុកពញាឮ ។ ការចាប់ខ្លួននេះធ្វើឡើងដោយប៉ូលិសនៃស្នងការដ្ឋានខេត្តកណ្តាល សហការជាមួយកម្លាំងប៉ូលិសខេត្តកំពង់ស្ពឺ ។
លោកវរសេនីយ៍ទោ សុឹង សេងលី នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត បានធ្វើសន្និសីទកាសែតល្ងាចថ្ងៃទី៦ មីនា ឱ្យដឹងជាផ្លូវការថា ជនសង្ស័យដែលត្រូវបានចាប់ខ្លួននេះឈ្មោះ សាយ ស្រេង អាយុ៥២ឆ្នាំ ជាកសិករ មានលំនៅភូមិត្បូងវត្ត ឃុំជ្រៃលាស់ ស្រុកពញាឮ បានត្រូវចាប់ខ្លួននៅក្នុងដីចម្ការភូមិអន្លង់មន ឃុំយាយអង្គ ស្រុកថ្ពង ខេត្តកំពង់ស្ពឺ ។
សូមបញ្ជាក់ថា កាលពីថ្ងៃទី១៤ មិថុនា ២០១៣ វេលាម៉ោង២៣និង៥០នាទី មានអំពើឃាតកម្មបាញ់សម្លាប់ស្ត្រីម្នាក់ ខណៈកំពុងដេកនៅក្នុងផ្ទះ ។ ជនរងគ្រោះជាស្ត្រីភេទឈ្មោះ យឹម ណៃ អាយុ៤៩ឆ្នាំ ជាកសិករ មានស្នាមត្រូវគ្រាប់កាំភ្លើងអាកាត្រង់ក្លៀកខាងស្តាំធ្លាយមកខ្នង ។ ភ្លាមៗបន្ទាប់ពីឮស្នូរកាំភ្លើងផ្ទុះឡើង សមត្ថកិច្ចមូលដ្ឋានបានចុះទៅដល់កន្លែងកើតហេតុ ហើយត្រូវបានបុរសឈ្មោះ សាយ ស្រេង ជាប្តីបានស្រែកឆោឡោប្រាប់សមត្ថកិច្ចថា មានជនមិនស្គាល់មុខចូលមកបាញ់ប្រហារគ្រួសារគាត់ ដើម្បីប្លន់យកទ្រព្យសម្បត្តិ ។
លោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តកណ្តាលបានឱ្យដឹងថា បើទោះបីភ្លាមៗបុរសជាប្តីឈ្មោះ សាយ ស្រេង បានអះអាងថា ប្រពន្ធរបស់គាត់ត្រូវគ្រាប់កាំភ្លើងស្លាប់នេះ ដោយសារចោរបាញ់ប្លន់យកទ្រព្យសម្បត្តិ ក៏ដោយ ក៏សមត្ថកិច្ចជំនាញនៅតែមានការសង្ស័យ ហើយបានបើកការសើុបអង្កេតឈានទៅកំណត់មុខសញ្ញាបទល្មើស គឺជាបទល្មើសឃាតកម្មគិតទុកជាមុន ព្រោះថា មុនពេលកើតហេតុឈ្មោះ សាយ ស្រេង ជាប្តីរបស់ជនរងគ្រោះបានដើរសួរគេឯងរកទិញកាំភ្លើង និងរកមនុស្សដែលហា៊នសម្លាប់មនុស្ស ប៉ុន្តែមិនមាននរណាចូលរួមទេ ។ បន្ទាប់ពីមានហេតុការណ៍បាញ់សម្លាប់ស្ត្រីរងគ្រោះហើយ បុរសជាប្តីឈ្មោះ សាយ ស្រេង បានគេចខ្លួនបាត់ ដែលកាន់តែសង្ស័យ ។ សមត្ថកិច្ចរបស់លោកបានធ្វើការស្រាវជ្រាវរហូតមកដល់ថ្ងៃទី៥ មីនា ទើបចាប់ខ្លួនមុខសញ្ញាសង្ស័យបាន គឺឈ្មោះ សាយ ស្រេង នេះជាអ្នកជួលឃាតករមកសម្លាប់ប្រពន្ធរបស់ខ្លួន ហើយបង្វែរដានថាជាករណីបាញ់ប្លន់ពីចោរមិនស្គាល់មុខទៅវិញ ។
តាមចម្លើយសារភាពរបស់ជនសង្ស័យឈ្មោះ សាយ ស្រេង និយាយថា ខ្លួនពិតជាបានរៀបគម្រោងធ្វើឃាតប្រពន្ធប្រាកដមែន ដោយជួលមនុស្សដែលសីុឈ្នួលឱ្យមកបាញ់សម្លាប់ប្រពន្ធ ។ មូលហេតុដែលខ្លួនធ្វើបែបនេះ គឺដោយសារតែប្រពន្ធបានកិបកេងប្រាក់ដែលលក់ដីបានជាង២ម៉ឺនដុល្លារដោយមិនឱ្យខ្លួនដឹង និងម្យា៉ងទៀតបានផិតក្បត់មានប្រុសថ្មីចុះចោលផ្ទះ ដោយទុកឱ្យខ្លួនរស់នៅកណ្តោចកណ្តែងជាមួយនឹងកូនពីរនាក់ ។ ចំណែកឯកូនពីរនាក់ទៀតគឺប្រពន្ធយកទៅនៅជាមួយ ។ ដោយសារតែរឿងហេតុបែបនេះខ្លួនក៏មានគំនិតគិតថា បើរស់នៅតែលតោលម្នាក់ឯងដដែល គឺមានតែសម្លាប់ប្រពន្ធចោលតែម្តងទៅ ។
ក្រោយពីគិតរួចខ្លួនក៏ទៅជួលមនុស្សពីរនាក់ឱ្យមកបាញ់សម្លាប់ប្រពន្ធ ហើយក្រោយពីធ្វើសកម្មភាពបានសម្រេច ខ្លួនបានឱ្យមាសចំនួន៥ជី និងលុយ៥០០ដុល្លារទៅជនដៃដល់ រួចក៏គេចខ្លួនមករស់នៅខេត្តកំពង់ស្ពឺ តែមិនបានមួយឆ្នាំផង ក៏ត្រូវសមត្ថកិច្ចចាប់ខ្លួន ។
លោកវរសេនីយ៍ទោ សុឹង សេងលី បានឱ្យដឹងថា ជនសង្ស័យឈ្មោះ សាយ ស្រេង សមត្ថកិច្ចជំនាញបានកសាងសំណុំរឿងបញ្ជូនទៅសាលាដំបូងខេត្ត ចាត់ការតាមផ្លូវច្បាប់ ៕
ចែករំលែកព័តមាននេះ