ខេត្តសៀមរាប៖​ ប្រជាពលរដ្ឋជាង​១០០នាក់​ មកពីភូមិដូននំ ​ភូមិជៀស្មន់​ និង ភូមិកំពុងថ្កូវ ​ស្ថិតក្នុងឃុំមានជ័យ ​ស្រុកបា្រសាទបាគង​ នៅព្រឹកថ្ងៃទី០៧​ មីនា ២០១៤ ​បានប្រមូលផ្តុំគ្នា​តវ៉ាបិទផ្លូវ​លំក្រាលក្រួស​ក្រហម​មួយកន្លែង ​ប្រយោជន៏ដើម្បី​ទាមទារឲ្យក្រុមហ៊ុន​ ស៊ីផាក ​អ៊ិនវេសមេន​ ជួសជុលផ្លូវ១ខ្សែប្រវែង​ប្រមាណ៣គីឡូម៉ែត្រ​ឡើងវិញ ។

ការតវ៉ាបិទផ្លួវនេះ ​បានធ្វើឡើង​បន្ទាប់ពីប្រជាពលរដ្ឋបានចោទថា​ ក្រុមហ៊ុនខាងលើ ​ដឹកជញ្ជូនភ្ញៀវ​ទេសចរចេញចូល​នៅរម្មណីយដ្ឋាន​កំពុងភ្លុកតាមមាត់ទន្លេសាប​បណ្តាលឲ្យខូចផ្លូវនោះខូច ហើយ​ដីហុយ​ចូលផ្ទះ​សម្បែង និងពិបាក​ក្នុងការធ្វើដំណើរ ​ជាពិសេសធ្វើឲ្យប៉ះពាល់ធ្ងន់ធ្ងរ​ដល់សុខភាពរបស់ពួកគាត់​នោះថែមទៀត ។

ក្រុមប្រជាពលរដ្ឋ​បានធ្វើការព្រមាន​នៅព្រឹកថ្ងៃសុក្រដដែលនេះថា​​ ការតវ៉ារបស់ពួកគាត់​នឹងធ្វើគ្មានថ្ងៃកំណត់​ដោយបិទផ្លូវរាល់ថ្ងៃ​ ប្រសិនបើគ្មានដំណោះស្រាយ ។

បើតាមអ្នកឆ្លើយឆ្លង​ព័​ត៌មានកោះ​សន្តិភាពប្រចំាខេត្តសៀមរាប​បានឲ្យដឹងថា ​មកដល់ម៉ោង១១និង៥០នាទី​ថ្ងៃត្រង់ថ្ងៃទី០៧មីនានេះ​ ក្រុមប្រជាពលរដ្ឋ​នៅមិនទាន់បើកផ្លូវនៅឡើយទេ​ ហើយក៏មិនទាន់មាន​អាជ្ញាធរ ​ឬ តំណាងក្រុមហ៊ុន​ចេញមកចរចារកដំណោះស្រាយ​នោះដែរ ៕