រាជធានីភ្នំពេញ ៖ ក្នុងចេតនារក្សាសណ្ដាប់ធ្នាប់សម្រាប់ប្រក្រតីភាពនិងរៀបរយល្អក្នុងសង្គម កងកម្លាំងប៉ូលិសនៃស្នងការដ្ឋានរាជធានីភ្នំពេញប្រមាណជាង២០០០នាក់ ដែលមានបំពាក់ដោយខែល ដំបង អាវក្រោះ និងមួកការពារសុវត្ថិភាពបានប្រមូលផ្ដុំធ្វើសមយុទ្ធនៅក្នុងពហុកីឡដ្ឋានអូឡាំពិកកាលពីរសៀលថ្ងៃទី៦ មីនា ។
រាជធានីភ្នំពេញ ៖ ក្នុងចេតនារក្សាសណ្ដាប់ធ្នាប់សម្រាប់ប្រក្រតីភាពនិងរៀបរយល្អក្នុងសង្គម កងកម្លាំងប៉ូលិសនៃស្នងការដ្ឋានរាជធានីភ្នំពេញប្រមាណជាង២០០០នាក់ ដែលមានបំពាក់ដោយខែល ដំបង អាវក្រោះ និងមួកការពារសុវត្ថិភាពបានប្រមូលផ្ដុំធ្វើសមយុទ្ធនៅក្នុងពហុកីឡដ្ឋានអូឡាំពិកកាលពីរសៀលថ្ងៃទី៦ មីនា ។ ការប្រមូលផ្ដុំធ្វើសមយុទ្ធនេះក៏មិនមែនជារឿងចៃដន្យនោះឡើយ ហើយត្រូវបានក្រុមអ្នកតាមដានដឹងថា នេះជាការហាត់សមត្រៀមកម្លាំងបង្ក្រាបការជួបជុំខុសច្បាប់ណាមួយរបស់កម្មករដែលដឹកនាំដោយក្រុមសហជីពនិងសមាគមចំនួន១៨ក្នុងន័យនយោបាយ ដែលប្រកាសថា ទោះបីសាលារាជធានីមិនអនុញ្ញាតឱ្យមានការធ្វើវេទិកាសាធារណៈនៅទីលានប្រជាធិបតេយ្យនៅថ្ងៃទី៨ មីនា ខាងមុខក្ដី ក៏ពួកគេនៅតែធ្វើដែរ ។
ការបន្លុយពាក្យនេះហើយ ទើបតម្រូវឱ្យអាជ្ញាធរសាលារាជធានីភ្នំពេញចាត់វិធានការទប់ស្កាត់ដែលអាចប្រើប្រាស់កងកម្លាំងប៉ូលិសនិងឧបករណ៍បំបែកការជួបជុំគ្នានោះ ។ លោកឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ មានប្រសាសន៍ថា សមយុទ្ធដែលរៀបចំឡើងនេះមានកងកម្លាំងចូលរួមមកពីខណ្ឌទាំង៩ និងការិយាល័យចំណុះឱ្យស្នងការដ្ឋាន ។ ជាមួយនឹងការបង្ហាញកម្លាំងប្រដាប់ដោយខែល និងដំបងនោះ ក៏មានរថយន្តបំពាក់ដោយរបាំងការពារសម្រាប់រុញច្រានបាតុករ រថយន្តពន្លត់អគ្គិភ័យ និងរថយន្តសង្គ្រោះផងដែរ។ លោកឧត្តមសេនីយ៍មានប្រសាសន៍ថា ការហាត់ធ្វើសមយុទ្ធនេះ ជាការពិតណាស់ គឺដើម្បីត្រៀមការពារបាតុកម្មនៅថ្ងៃ៨ មីនា និងថ្ងៃ១២ មីនា ខាងមុខ ដែលគេបំពានច្បាប់ ។ មុននេះ សម្តេចតេជោនាយករដ្ឋមន្ត្រីបានព្រមានចាត់វិធានការលើអ្នកដឹកនាំធ្វើបាតុកម្មទាមទារប្រាក់ឈ្នួលដើម្បីឆ្លើយតបអ្វីដែលសម្តេចហៅថា ដើម្បីបង្កើនបរិយាកាសល្អសម្រាប់ទាក់ទាញអ្នកវិនិយោគ ។ ការលើកឡើងបែបនេះធ្វើឡើងក្នុងកិច្ចវេទិការាជរដ្ឋាភិបាល-ផ្នែកឯកជនលើកទី១៧ នៅវិមានសន្តិភាពកាលពីថ្ងៃទី៤ មីនា ។
ផ្ទុយទៅវិញ សម្តេចបានហៅសហជីពមួយក្រុម ដែលបម្រើសកម្មភាពឱ្យបក្សប្រឆាំងថា បានញុះញង់កម្មករឱ្យធ្វើបាតុកម្ម បង្កការលំបាកដល់សង្វាក់ផលិតកម្មនេះ ។ គណបក្សប្រឆាំង និងសហជីព បានប្រើប្រាស់នយោបាយប្រជាភិថុតិ យកកម្មករនិយោជិតធ្វើជាឈ្នាន់នយោបាយ ដោយញុះញង់ឱ្យធ្វើកូដកម្ម បាតុកម្មខុសច្បាប់ ពិសេសការទាមទារប្រាក់ឈ្នួលអប្បបរមាក្នុងគោលដៅបំផ្លិចបំផ្លាញបរិយាកាសវិនិយោគ បំផ្លាញផលប្រយោជន៍កម្មករ និយោជិត និងបំផ្លាញឱកាសការងាររបស់យុវជន យុវនារី ។ រហូតមកដល់ពេលនេះ ក្រុមជ្រុលនិយមទាំងនេះនៅមិនទាន់បញ្ឈប់សកម្មភាពនៅឡើយទេ ។ ការព្រមានថ្មីទៀតរបស់សម្ដេចតេជោនាយករដ្ឋមន្ត្រីនេះចំពេលដែលសហជីពចំនួន១៨ប្រកាសការធ្វើវេទិកានៅថ្ងៃទី៨ មីនា និងដឹកនាំមហាបាតុកម្មនៅថ្ងៃទី១២ មីនា ដើម្បីទាមទារឱ្យដំឡើងប្រាក់ឈ្នួលគោលដល់កម្មករឱ្យបាន១៦០ដុល្លារ និងទាមទារដោះលែងមនុស្ស២១នាក់ដែលកំពុងជាប់ឃុំ ។
អ្នកនាំពាក្យក្រសួងមហាផ្ទៃ ត្រូវបានដកស្រង់ប្រសាសន៍ដោយបណ្ដាញផ្សព្វផ្សាយព័ត៌មានថា ការអញ្ជើញថ្នាក់ដឹកនាំរាជរដ្ឋាភិបាល ឬឧបនាយករដ្ឋមន្ត្រីឱ្យចូលរួមវេទិកាសាធារណៈ គឺខុសរដ្ឋធម្មនុញ្ញ ។ ប្រសាសន៍របស់អ្នកនាំពាក្យនេះគឺជាការឆ្លើយតបទៅនឹងការអញ្ជើញលោកឧបនាយករដ្ឋមន្ត្រី ស ខេង ពីក្រុមសហជីពឱ្យលោកចូលរួមក្នុងវេទិកាសាធារណៈ ដែលក្នុងនោះក៏មានលោកឧបនាយករដ្ឋមន្ត្រី គាត ឈន់ លោក អិុត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ និងលោក ជីវ កេង ប្រធានសាលាដំបូងរាជធានីភ្នំពេញ ដើម្បីឆ្លើយបំភ្លឺពីបញ្ហាប្រាក់ឈ្នួល១៦០ដុល្លារ និងការឃុំខ្លួនសកម្មជនសហជីពនៅចំពោះមុខបាតុកម្មកម្មករនៅថ្ងៃទី៨ មីនា ។
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា តាមច្បាប់រដ្ឋធម្មនុញ្ញ ការកោះអញ្ជើញថ្នាក់ឧបនាយករដ្ឋមន្ត្រីទាល់តែតំណាងរាស្ត្រជាប់ឆ្នោត ទើបមានសិទ្ធិកោះហៅមកសាកសួរ និងឆ្លើយបំភ្លឺ ។
លោកបន្តថា តំណាងសហជីពមុននឹងអញ្ជើញថ្នាក់ដឹកនាំរដ្ឋាភិបាលជាន់ខ្ពស់ គួរតែមានអង្គការចាត់តាំងមួយ ឬធ្វើតាមនីតិវិធីច្បាប់ ។ ក្រសួងមហាផ្ទៃកាលពីថ្ងៃពុធ ទី៥ មីនា បានបញ្ជាក់ជំហរថា នឹងមិនអនុញ្ញាតឱ្យធ្វើវេទិកាសាធារណៈ នៅទីលានប្រជាធិបតេយ្យ នៅថ្ងៃទី៨ ខែមីនា នោះទេ ៕
ចែករំលែកព័តមាននេះ