ខេត្តព្រះវិហារ ៖ ពលរដ្ឋខ្មែរជាច្រើននាក់បានបាត់ខ្លួននៅលើទឹកដីថៃ ដែលតាមប្រភពព័ត៌មានកាលពីព្រឹកថ្ងៃទី៥ មីនា កន្លងទៅនេះ បើតាមការអះអាងរបស់អ្នកភូមិឈើទាលគង ថា ការបាត់ខ្លួននោះដោយសារការដេញបា.ញ់សម្លា.ប់ពីសំណាក់ទាហានសៀម ខណៈពលរដ្ឋខ្មែរទាំងនោះលួចចូលកា.ប់ឈើគ្រញូងលើភ្នំដងរែក ក្នុងទឹកដីសៀម ។
ខេត្តព្រះវិហារ ៖ ពលរដ្ឋខ្មែរជាច្រើននាក់បានបាត់ខ្លួននៅលើទឹកដីថៃ ដែលតាមប្រភពព័ត៌មានកាលពីព្រឹកថ្ងៃទី៥ មីនា កន្លងទៅនេះ បើតាមការអះអាងរបស់អ្នកភូមិឈើទាលគង ថា ការបាត់ខ្លួននោះដោយសារការដេញបាញ់សម្លាប់ពីសំណាក់ទាហានសៀម ខណៈពលរដ្ឋខ្មែរទាំងនោះលួចចូលកាប់ឈើគ្រញូងលើភ្នំដងរែក ក្នុងទឹកដីសៀម ។
ហេតុការណ៍ខាងលើកើតឡើងនៅវេលាម៉ោង១១ព្រឹក ថ្ងៃទី៥ មីនា ត្រង់ចំណុចដំណាក់ផ្ដៀកខាងជើង ភូមិឈើទាលគង ចំណុចសម្បុកជ្រូក និងចំណុចស្ពាន២ ខាងកើតភូមិឈើទាលគង លើខ្នងភ្នំដងរែក ក្នុងទឹកដីសៀម ក្បែរច្រកទ្វារអានសេះ ។ ចំពោះអ្នកបាត់ខ្លួនគឺបានសំដៅទៅលើអ្នកដែលគេអះអាងថា ស្លាប់ដោយការបាញ់រះរបស់ទាហានសៀមមានចំនួន១២នាក់ តែមិនមានមន្ត្រីផ្លូវការណាមួយប្រាប់ឱ្យដឹងទេថាពិតជាមានការបាញ់ស្លាប់ច្រើននាក់បែបនេះឬយ៉ាងណា ? នៅព្រឹកថ្ងៃទី៦ មីនា មន្ត្រីយោធាជាន់ខ្ពស់កម្ពុជាលោកឧត្តមសេនីយ៍ឯក ស្រី ឌឹក មេបញ្ជាការសមរភូមិទិសទី១ ប្រាសាទព្រះវិហារ បានដឹកនាំទាហានក្នុងកងពលធំលេខ៣ចុះស្រាវជ្រាវពីបញ្ហានេះ ប៉ុន្តែការស្រាវជ្រាវ មិនត្រូវបានផ្ដល់ព័ត៌មានបែបណានោះទេ ។ ចំណែកពលរដ្ឋដែលពាក់ព័ន្ធនឹងរឿងនេះហើយរស់នៅក្នុងភូមិឈើទាលគង ត្រូវបាននាំគ្នាបិទទ្វារចាក់សោរត់គេចខ្លួនបាត់អស់តាំងពីយប់ ។ មន្ត្រីខ្មែរដែលសុំលាក់ឈ្មោះបានបន្លុយថា មិនទាន់ដឹងថា ការដេញបាញ់របស់ទាហានសៀមនោះបណ្ដាលឱ្យស្លាប់ប៉ុន្មាននាក់ទេ ហើយពេលនេះកំពុងទាក់ទងជាមួយមេទ័ពសៀម ដើម្បីយកសពចូលដីខ្មែរវិញ ប៉ុន្តែទោះជាយ៉ាងណា មិនទាន់ដឹងថាភាគីសៀមឆ្លើយតបបែបណាទេ ព្រោះពេលនេះទោះជាបានបាញ់សម្លាប់ក៏ពួកគេមិនប្រាប់យើងដែរ ។ មន្ត្រីយោធារូបនោះបន្តថា កន្លងទៅពលរដ្ឋខ្មែរស្លាប់ក្នុងទឹកដីសៀម គឺសៀមមិនអនុញ្ញាតឱ្យចូលយកសពម្តងណាទេ គឺសុខចិត្តទុកសពឱ្យស្អុយរលួយចោលនៅកណ្ដាលព្រៃ ។
លោកឧត្តមសេនីយ៍ឯក ស្រី ឌឹក មេបញ្ជាការទិសទី១ ប្រាសាទព្រះវិហារ មានប្រសាសន៍ប្រាប់កោះសន្តិភាពនៅក្នុងភូមិឈើទាលគងថា តាមប្រភពឱ្យដឹងខ្លះៗពីក្នុងទឹកដីសៀមថា ពលរដ្ឋដែលបាត់ខ្លួននេះ គឺមានចម្ងាយពីខ្សែបន្ទាត់ព្រំដែនប្រមាណ១០គីឡូម៉ែត្រ ក្បែរចម្ការថៃ ។ លោកឧត្តមសេនីយ៍បានបន្ទោសថា ពលរដ្ឋដែលអាចឡើងភ្នំបាននោះ គឺជាចំណុចទទួលខុសត្រូវរបស់កងល្បាតលេខ៤០៥ ចំណុះសឹករងព្រះវិហារ ។ ខណៈបានជួបក្រុមអ្នកមានសំណាងរត់ចេញពីដីសៀមមកវិញដែលម្នាក់ៗស្ពាយដុំឈើគ្រញូងឡើងកោងខ្នងផងបាននិយាយថា ពួកគេពិតជាលួចចូលទៅ ស្វែងរកកាប់ឈើគ្រញូងយកទៅលក់ឱ្យឈ្មួញមែន ហើយការបាញ់រះពីសំណាក់ទាហានសៀមនោះ អ្នកណាស្លាប់ក៏ស្លាប់ អ្នករត់ក៏រត់នៅក្នុងព្រៃនោះទៅ គឺប្រៀបដូចជាការផ្សងព្រេងក្នុងល្បែងគ្រោះថ្នាក់ដោយសារតែរបរនេះជារបរដាក់ជីវិត ។
ការបាញ់សម្លាប់ប្រជាពលរដ្ឋខ្មែរពីសំណាក់ទាហានសៀម តែងកើតមានជាបន្តបន្ទាប់ដូចបាញ់សត្វ ខណៈពលរដ្ឋខ្មែរទាំងនេះលួចឆ្លងដែនចូលទៅក្នុងទឹកដីសៀមដោយខុសច្បាប់ដើម្បីរុករកកាប់ឈើគ្រញូង ។
មុននេះនៅខេត្តឧត្តរមានជ័យ ព័ត៌មានដូចគ្នានេះត្រូវបានគេបិទបាំង៥ថ្ងៃមកហើយ គឺលេចឮថា ទាហានសៀមបានបាញ់ស្លាប់អ្នកចូលកាប់ឈើគ្រញូងជាច្រើននាក់ ក្នុងនោះប្រភពក្រៅផ្លូវ ការថាមាន១៨នាក់ តែការស្វែងរកប្រភពអះអាងផ្លូវការមិនត្រូវបានមន្ត្រីណាមួយឱ្យដឹងនោះទេ ។ ក្រៅពីនេះខ្លះរងរបួស ខ្លះត្រូវចាប់ខ្លួន ខ្លះបាត់ខ្លួន និងខ្លះទៀតរត់រួចមកដល់លំនៅឋានវិញ ។ ហេតុការណ៍នេះបានកើតឡើងនៅចំណុចស្ពានមួយរយស្ថិតនៅទល់មុខច្រកក្បាលអូរស្វាយ ក្នុងទឹកដីឃុំអូរស្វាយ ស្រុកត្រពាំងប្រាសាទ កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី២៣ កុម្ភៈ កន្លងទៅ ។ ប្រជាពលរដ្ឋដែលរត់រួចផុតពីសេចក្ដីស្លាប់បានរៀបរាប់ថា ពលរដ្ឋខ្មែរដែលចូលទៅគឺមានមេការនិងមេខ្យល់ ជាអ្នកនាំទៅក្នុងទឹកដីសៀមដែលមានជម្រៅចាប់ពី១០ទៅ២០គីឡូម៉ែត្រ ដើម្បីរុករកឈើគ្រញូង ។ តាមប្រភពព័ត៌មានថា ក្រុមអ្នករុករកឈើគ្រញូងនោះមានច្រើនក្រុម ហើយពេលរកបានយកមកលក់ឱ្យឈ្មួញដែលបានចំណាយលុយឱ្យពួកគេទិញស្បៀងអាហារមុនចូលទៅក្នុងទឹកដីថៃ ។ ប្រជាពលរដ្ឋដដែលនិយាយទៀតថា ការកាប់ឈើគ្រញូងនោះ បានតែពេលយប់ទេ ឯពេលថ្ងៃត្រូវសម្រាកមិនអាចចេញធ្វើសកម្មភាពឡើយដោយពួនសម្ងំស្ងៀមនៅក្នុងព្រៃ ។
ព័ត៌មានខាងលើនេះ មិនអាចស្វែងរកការបំភ្លឺពីក្រុមមន្ត្រីអាជ្ញាធរ ឬមន្ត្រីមានសមត្ថកិច្ចបានទេ ដោយសារតែមានការលាក់បាំងព័ត៌មាន ហើយរឿងរ៉ាវដែលទទួលបាននេះ គឺតាមរយៈក្រុមគ្រួសារអ្នកស្លាប់រៀបរាប់ឱ្យដឹងតែបុ៉ណ្ណោះ ។
យោងតាមរបាយការណ៍បូកសរុបការងារឆ្នាំ២០១៣ របស់ក្រសួងមហាផ្ទៃស្តីពីសភាពការណ៍ និងកិច្ចប្រតិបត្តិការរក្សាការពារសន្តិសុខព្រំដែន បានឱ្យដឹងថា ការបាញ់សម្លាប់ប្រជាពលរដ្ឋខ្មែរឆ្លងដែនខុសច្បាប់ពីសំណាក់ទាហានសៀមនៅតែបន្តកើតមានឡើងចំនួន៥៥លើក ប្រៀបធៀបឆ្នាំ២០១២ កើន៣៩លើក បណ្តាលឱ្យមនុស្សស្លាប់៦៩នាក់ និងចាប់បញ្ជូនពលរដ្ឋខ្មែរដាក់ពន្ធនាគារ១៦៥នាក់ ៕
ចែករំលែកព័តមាននេះ