រាជធានីភ្នំពេញ ៖ បន្ទាប់ពីលាចាកពីឆាកនយោបាយអស់មួយរយៈពេលមក សម្ដេចក្រុមព្រះ នរោត្តម រណឫទ្ធិ ដែលជាអតីតប្រធានគណបក្សហ្វុ៊នសិុនបិុច និងក្រោយមកជាអតីតប្រធានគណបក្សនរោត្តម រណឫទ្ធិ គ្រោងនឹងធ្វើលិខិតសុំចុះបញ្ជីគណបក្សនយោបាយថ្មីមួយដាច់ដោយឡែករបស់ព្រះអង្គនៅក្រសួងមហាផ្ទៃដើម្បីចូលរួមប្រកួតជាមួយគណបក្សនយោបាយផ្សេងៗទៀតសម្រាប់ការបោះឆ្នោតនាពេលខាងមុខ ។
បើតាមប្រធានខុទ្ទកាល័យសម្ដេចក្រុមព្រះ នរោត្តម រណឫទ្ធិ លោក អានន្ទ ដាយ៉ាត បានប្រាប់កោះសន្ដិភាពតាមទូរស័ព្ទនៅថ្ងៃទី៦ មីនា ថា សម្ដេចក្រុមព្រះនរោត្តម រណឫទ្ធិ គ្រោងនឹងយកលិខិតទៅក្រសួងមហាផ្ទៃនៅពាក់កណ្ដាលខែមីនា នេះ គឺបន្ទាប់ពីព្រះអង្គជួបជាមួយសមាជិកអ្នកគាំទ្រព្រះអង្គតាមបណ្ដាខេត្តនានារួចហើយ ។
ប្រធានខុទ្ទកាល័យសម្ដេចក្រុមព្រះបានឱ្យដឹងទៀតថា មូលហេតុដែលសម្ដេចក្រុមព្រះសម្រេចចិត្តវិលចូលឆាកនយោបាយវិញ ពីព្រោះព្រះអង្គចង់ឱ្យប្រទេសជាតិមានភាពរីកចម្រើនលូតលាស់ ។ មួយវិញទៀតដោយសារតែគណបក្សនយោបាយដែលជាប់ឆ្នោតមិនទាន់ដោះស្រាយបញ្ហានយោបាយបន្ទាប់ពីការបោះឆ្នោតជ្រើសតាំងតំណាងរាស្ត្រនីតិកាលទី៥ អស់រយៈពេលជាង៧ខែមកហើយ និងដោយសារតែគណបក្សនយោបាយជាប់ឆ្នោតក្នុងអាណត្តិទី៥នេះមិនព្រមដោះស្រាយបញ្ហាដែលជាប់គាំងនយោបាយ ។
លោក អានន្ទ ដាយ៉ាត បញ្ជាក់ថា ការយាងចូលក្នុងឆាកនយោបាយជាថ្មីនេះ គឺមិនចូលរួមជាមួយគណបក្សដែលព្រះអង្គធ្លាប់ធ្វើព្រះប្រធាននោះទេ (គណបក្សហ្វុ៊នសិុនបិុច) ព្រោះថាពេលនេះគណបក្សហ្វុ៊នសិុនបិុច បានសាបសូន្យគ្មានអ្នកគាំទ្រឡើយ ។ ជាក់ស្ដែងក្នុងការបោះឆ្នោតអាណត្តិទី៥នេះ គណបក្សហ្វុ៊នសិុនបិុច មិនទទួលអាសនៈក្នុងរដ្ឋសភាសូម្បីមួយកៅអី ។ ចំពោះការវិលចូលឆាកនយោបាយជាថ្មីរបស់សម្ដេចក្រុមព្រះនេះ មន្ត្រីជាន់ខ្ពស់និងអ្នកនាំពាក្យគណបក្សសង្គ្រោះជាតិលោក យ៉ែម បុញ្ញឫទ្ធិ បានអបអរសាទរនិងលើកឡើងថា ប្រជាពលរដ្ឋទាំងអស់មានសិទ្ធិធ្វើនយោបាយដូច្នេះការយាងចូលធ្វើនយោបាយជាថ្មីរបស់សម្ដេចក្រុមព្រះ ជាសិទ្ធិសេរីភាពរបស់ព្រះអង្គ ក៏ប៉ុុន្តែមានប្រជាពលរដ្ឋជាច្រើនបានយល់ដឹងយ៉ាងច្បាស់ពីការធ្វើនយោបាយរបស់សម្ដេចក្រុមព្រះ ។ ជាក់ស្ដែង
ប៉ុន្មានឆ្នាំកន្លងមកនេះតើមានបញ្ហាអ្វីខ្លះ និងអ្វីដែលព្រះអង្គមិនធ្វើ ?
លោក យ៉ែម បុញ្ញឫទ្ធិ ក៏បានរិះគន់សម្ដេចក្រុមព្រះដោយចោទជាសំណួរថា តើការចូលប្រឡូកឆាកនយោបាយជាថ្មីនេះ សម្ដេចក្រុមព្រះមានការគាំទ្រពីប្រជាពលរដ្ឋដែរឬទេ បើព្រះអង្គធ្លាប់ត្រូវបានប្រជាពលរដ្ឋផ្ដល់សេចក្ដីទុកចិត្តម្ដងទៅហើយ ផ្ទុយទៅវិញព្រះអង្គធ្វើមិនបាននោះ ? ចំពោះអ្វីដែលសម្ដេចក្រុមព្រះយាងចូលនយោបាយជាថ្មីនេះ ក៏ស្របពេលដែលប្រជាជនអស់ជំនឿទៅលើព្រះអង្គទៅហើយ ។ អ្នកនាំពាក្យគណបក្សសង្គ្រោះជាតិរូបនេះបានលើកឡើងទៀតថា ប្រសិនបើសម្ដេចក្រុមព្រះចង់ចូលជាមួយគណបក្សសង្គ្រោះជាតិ គណបក្សសង្គ្រោះជាតិសាទរគ្រប់អ្នកនយោបាយ និងខ្មែរគ្រប់រូបដែលមានបំណងចង់ចូលជាមួយគណបក្សសង្គ្រោះជាតិ ។ គណបក្សសង្គ្រោះជាតិជាគណបក្សប្រជាធិបតេយ្យ យើងមានគោលការណ៍មួយគឺថា គោរពតាមឆន្ទៈរាស្ត្របម្រើរាស្ត្រពិតប្រាកដ ដូច្នេះគណបក្សសង្គ្រោះជាតិស្វាគមន៍ជានិច្ច ក៏ប៉ុន្តែធ្វើយ៉ាណាគោរពតាមគោលការណ៍ដែលយើងបានកំណត់រួច ។ ទាក់ទិននឹងការយាងចូលឆាកនយោបាយជាថ្មីវិញរបស់សម្ដេចក្រុមព្រះ បណ្ដាញផ្សព្វផ្សាយព័ត៌មានក្នុងស្រុកមួយបានលើកយកសម្ដីអ្នកនាំពាក្យសម្ដេចក្រុមព្រះលោក ប៉ែន សង្ហា ដែលបានថ្លែងថា សម្តេចក្រុមព្រះ នរោត្តម រណឫទ្ធិ នឹងយាងចូលរួមក្នុងពិធីជួបជុំសំណេះសំណាលមួយ ជាមួយសមាជិកគាំទ្រ ពីគ្រប់រាជធានី-ខេត្ត នៅព្រឹកថ្ងៃទី១៦ មីនា នៅសណ្ឋាគារសាន់វេដើម្បីប្រកាសពីការយាងចូលឆាកនយោបាយជាថ្មីនេះ ។
មូលហេតុនៃការសម្រេចព្រះទ័យ វិលមកក្នុងឆាកនយោបាយជាថ្មីឡើងវិញនាពេលនេះត្រូវបានសម្តេចក្រុមព្រះ នរោត្តម រណឫទ្ធិ អះអាងថា មកពីបញ្ហានយោបាយនៅកម្ពុជា ពិសេសក្រោយការបោះឆ្នោតកាលពីខែកក្កដា ឆ្នាំ២០១៣ ដែលគណបក្សជាប់ឆ្នោតទាំងពីរគឺគណបក្សប្រជាជនកម្ពុជា និងគណបក្សសង្គ្រោះជាតិ មិនទាន់បានដោះស្រាយ ដែលរួមមានបញ្ហាបោះឆ្នោត បញ្ហាអំពើពុករលួយ និងបញ្ហាអយុត្តិធម៌សង្គមជាដើម ។ គួររំលឹកថា កាលពីថ្ងៃទី២៤ កុម្ភៈ សម្តេចក្រុមព្រះ នរោត្តម រណឫទ្ធិ ដែលមានព្រះជន្ម៧០ព្រះវស្សា នៅឆ្នាំនេះ បានប្រកាសប្រាប់អ្នកសារព័ត៌មានថា ព្រះអង្គនឹងវិលចូលក្នុងឆាកនយោបាយវិញតាមរយៈការបង្កើតគណបក្សថ្មីមួយ ហើយព្រះអង្គនឹងដាក់ពាក្យស្នើសុំទៅកាន់ក្រសួងមហាផ្ទៃដើម្បីបង្កើតជាផ្លូវការនៅក្នុងឆ្នាំ២០១៤នេះ ។
ទោះជាយ៉ាងណាក្តី ឈ្មោះគណបក្សដែលសម្តេចក្រុមព្រះ នរោត្តម រណឫទ្ធិ គ្រោងនឹងចុះបញ្ជី នោះមិនទាន់ដឹងថាមានឈ្មោះអ្វីនៅឡើយទេ ប៉ុន្តែតាមប្រភពក្រៅផ្លូវការបានឱ្យដឹងថា ឈ្មោះគណបក្សនយោបាយដែលសម្តេចក្រុមព្រះ នរោត្តម រណឫទ្ធិ នឹងចុះបញ្ជីនោះមានឈ្មោះថា «គណបក្សសង្គមរាជាធិបេតយ្យ» ៕
ចែករំលែកព័តមាននេះ