រាជធានីភ្នំពេញ ៖ ផ្ទះកោសជប់មួយកន្លែង ស្ថិតនៅក្រុម១២ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ត្រូវបានកម្លាំងនគរបាលខណ្ឌឫស្សីកែវចុះឡោមព័ទ្ធ និងឆែកឆេរ បន្ទាប់ពីក្រុមស្ត្រីកោសជប់នៅទីនោះជាប់ចោទលួចប្រាក់ភ្ញៀវអស់ចំនួន២.៥១០ដុល្លារ ។
រាជធានីភ្នំពេញ ៖ ផ្ទះកោសជប់មួយកន្លែង ស្ថិតនៅក្រុម១២ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ត្រូវបានកម្លាំងនគរបាលខណ្ឌឫស្សីកែវចុះឡោមព័ទ្ធ និងឆែកឆេរ បន្ទាប់ពីក្រុមស្ត្រីកោសជប់នៅទីនោះជាប់ចោទលួចប្រាក់ភ្ញៀវអស់ចំនួន២.៥១០ដុល្លារ ។ ការឡោមព័ទ្ធនោះ ក៏បានឃាត់ខ្លួនស្ត្រី៣នាក់នាំទៅកាន់បុ៉ស្តិ៍នគរបាលទួលសង្កែ ។ បន្ទាប់ពីឃាត់ខ្លួននោះ ក៏មានអ្នកដែលបាត់ប្រាក់ជាច្រើននាក់នៅទីតាំងកោសជប់នោះចេញមុខមកដាក់ពាក្យបណ្តឹងដែរ។
ហេតុការណ៍នេះកើតឡើងកាលពីវេលាម៉ោង១០ និង៤០នាទីព្រឹកថ្ងៃទី៦ មីនា និងបង្កឱ្យមានការភ្ញាក់ផ្អើលអស់រយៈពេលប្រមាណ២ម៉ោង ដោយអ្នកភូមិ រួមទាំងអ្នកដែលធ្លាប់រងគ្រោះដោយសារពួកនាងៗលួចប្រាក់បាននាំគ្នាមកចោមរោមមើលយ៉ាងច្រើនកុះករ ។ ស្ត្រីដែលនាំខ្លួនមកសាកសួរមាន ១-ឈ្មោះ អេង ដាវ៉ាន់ អាយុ៣៣ឆ្នាំ ២-ឈ្មោះ ចាន់ ល័ក្ខណ៍ អាយុ២៧ឆ្នាំ និង៣-ឈ្មោះ កង ខ្លី អាយុ៣០ឆ្នាំ ។ តាមបុរសឈ្មោះ ពក សុផាន អាយុ២៩ឆ្នាំ ជាអ្នកបើកបររថយន្តដឹកទំនិញ ស្នាក់នៅផ្ទះជួលក្នុងសង្កាត់ទួលសង្កែ ខណ្ឌឫស្សីកែវ និងមានស្រុកកំណើតនៅសង្កាត់រកាក្រៅ ក្រុងដូនកែវ ខេត្តតាកែវ ឱ្យដឹងថា ប្រាក់គាត់ចំនួន២.៥១០ដុល្លារ ត្រូវក្រុមស្ត្រីកោសជប់រៀបចំគម្រោងលួចពីក្នុងកាបូបនៅពេលដែលរូបគាត់ទៅជប់ខ្យល់នៅផ្ទះខាងលើនេះ ។
តាមម្ចាស់ប្រាក់ឱ្យដឹងទៀតថា មុនពេលកើតហេតុ រូបគាត់មិនសូវស្រួលខ្លួន ព្រោះតែធ្វើដំណើរទាំងយប់មកពីអន្លង់វែង ខេត្តឧត្តរមានជ័យ ដល់ភ្នំពេញនៅវេលាម៉ោង៤ទៀបភ្លឺ ក៏ជិះម៉ូតូមកកោសជប់នៅកន្លែងខាងលើ ។ នៅពេលទៅដល់ មានស្ត្រីម្នាក់ឈ្មោះ កង ខ្លី បានបង្ខំឱ្យស្រាតខោដែលមានកាបូបប្រាក់ចេញ រូបគាត់ទុកក្បែរខ្លួន តែស្ត្រីនោះមិនព្រមឱ្យ ក៏បានទាញយកទៅព្យួរ ព្រមទាំងឱ្យដេកផ្កាប់មុខ ។ លុះក្រោយមក ស្ត្រីម្នាក់នោះមិនបានជប់ខ្យល់ឱ្យទេ ដោយឱ្យស្ត្រីម្នាក់ទៀតជប់ខ្យល់ឱ្យ ។ នៅពេលជប់ខ្យល់ហើយក៏បានយកប្រាក់ឱ្យថ្លៃជប់១០.០០០រៀល ស្រាប់តែមើលប្រាក់បាត់អស់ចំនួន២.៥១០ដុល្លារ នៅសល់តែ១.១៣០ដុល្លារ ។ តាមព័ត៌មានបន្តទៀតថា បន្ទាប់ពីដឹងថាបាត់ប្រាក់ ក៏បានមកប្រាប់ស្ត្រីឈ្មោះ អេង ដាវ៉ាន់ ដែលអះអាងថាជាថៅកែ ហើយត្រូវស្ត្រីនោះប្រាប់ថា កុំមាត់ ចាំជូនទៅផ្ទះស្ត្រីដែលយកប្រាក់នោះនៅទួលគោក តែស្ត្រីម្នាក់នោះបាននាំគាត់ទៅផ្លូវលេខ៥៩៨ ដើម្បីបង្វែងដាន ។ ដោយដឹងថា ចាញ់បោកគេ គាត់ក៏ជិះម៉ូតូឌុបត្រឡប់មកវិញឃើញស្ត្រី២នាក់កំពុងរៀបចំអីវ៉ាន់ប្រុងគេចខ្លួន ក៏ឃាត់ និងទាក់ទងហៅមិត្តភក្តិបងប្អូនបឹ្តងនគរបាលចុះទៅអន្តរាគមន៍តែម្តង ។
ម្ចាស់ប្រាក់បានបន្តទៀតថា គាត់បានយកប្រាក់ចំនួន៣.៦៤០ដុល្លារពីផ្ទះ ក្នុងគោលបំណងមកឱ្យថ្លៃរថយន្ត ព្រោះគាត់បានទិញរថយន្តម៉ាកកូរ៉ូឡាមួយគ្រឿងក្នុងតម្លៃ៤.២០០ដុល្លារ តែមិនទាន់ឱ្យថ្លៃរថយន្តផង ក៏ចូលជប់ខ្យល់ ហើយត្រូវគេលួចអស់២.៥១០ដុល្លារ ។ បន្ទាប់ពីឃាត់ខ្លួន ស្ត្រីឈ្មោះ កង ខ្លី បានសុំកុំឱ្យមាត់ ចាំរូបគេសងវិញ ក្រោយពេលបដិសេធថាមិនបានលួចទេ ។ នៅព្រឹកនោះ ក៏មានការភ្ញាក់ផ្អើលយ៉ាងខ្លាំងដោយសារនគរបាលបានចុះទៅកន្លែងកើតហេតុ និងបានរាយការណ៍ទៅព្រះរាជអាជ្ញា ព្រមទាំងអាជ្ញាធរមូលដ្ឋានចុះឆែកឆេរលំនៅឋាននោះ ព្រមទាំងឃាត់ខ្លួនស្ត្រីចំនួន៣នាក់ទៅសាកសួរ ។ ទន្ទឹមនេះ មានអ្នកដែលធ្លាប់បាត់ប្រាក់ជាច្រើននាក់ទៀតបានចេញមុខអះអាងថា ធ្លាប់បាត់ប្រាក់ជាច្រើននៅពេលចូលកោសជប់នៅផ្ទះនេះ ព្រមទាំងនាំគ្នាមកដាក់ពាក្យបណ្ដឹងដែរ ។ គួរបញ្ជាក់ថា ផ្ទះម៉ាស្សាសម្រួលសរសៃកោសជប់ខាងលើនេះ ហាក់ដូចគេបើកដើម្បីបិទបាំងធ្វើសកម្មភាពលួចដោយជួលផ្ទះល្វែង៣ជាន់ក្នុងតម្លៃ៥០០ដុល្លារ និងមាននារីបម្រើការ៤នាក់ ។ កន្លងមកមានទាំងអាជីវករ មន្ដ្រីរាជការ និងសមត្ថកិច្ចជាច្រើននាក់ចូលទៅកោសជប់ខ្យល់ ហើយត្រូវក្រុមស្ត្រីនៅទីនោះលួចអស់ប្រាក់ តែខ្លះមិនបានប្ដឹងព្រោះខ្មាសគេ និងខ្លះទៀតបានប្ដឹងសមត្ថកិច្ចទៅយកបានវិញ និងធ្លាប់បានផ្ទុះនូវបាតុភាពជាច្រើនលើក ។ ចំណែកលើកនេះបានធ្វើសកម្មភាពលួចទៀត ក៏ត្រូវម្ចាស់ប្រាក់ប្ដឹងសមត្ថកិច្ចចុះទៅអន្ដរាគមន៍ ។
ទោះបីជាបែបណា ស្រ្ដីម្នាក់ក្នុងចំណោមស្រ្ដីដែលឃាត់ខ្លួនទាំង៣នាក់ ត្រូវបានដោះលែងវិញ ព្រោះមិនពាក់ព័ន្ធនឹងការលួចនេះទេ គឺឈ្មោះ ចាន់ ល័ក្ខណ៍ ជាស្រ្ដីកូន
ខ្ចី ៕
ចែករំលែកព័តមាននេះ