រាជធានីភ្នំពេញ ៖ លោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានបដិសេធសំណើរបស់ប្រតិភូថៃលើការសុំឱ្យមានការលើកលែងទោសដល់ទណ្ឌិតជនជាតិថៃ ឈ្មោះវីរៈ ស៊ុមខ្វាមឃីត ដោយលើកហេតុផលថា រាជរដ្ឋាភិបាលកម្ពុជាមិនលូកដៃចូលកិច្ចការផ្ទៃក្នុងរបស់តុលាការទេ ព្រោះទណ្ឌិតរូបនេះត្រូវតុលាការកាត់ទោសរួចហើយ ។
កន្លងមក តុលាការកម្ពុជាក៏បានបន្ធូរបន្ថយទោសគាត់ចំនួន៦ខែហើយដែរ ក្នុងថ្ងៃបុណ្យចម្រើនព្រះជន្មព្រះមហាក្សត្រ ។ គួរបញ្ជាក់ថានៅថ្ងៃទី៥ មីនា លោកឧបនាយករដ្ឋមន្ត្រីសុខ អាន បានទទួលជួបពិភាក្សាការងារជាមួយគណៈប្រតិភូថៃមួយក្រុមដឹកនាំដោយលោកសាស្ត្រាចារ្យបណ្ឌិត Thirapat Serirangsang ប្រធានក្រុមប្រឹក្សាអភិវឌ្ឍន៍នយោបាយថៃ ។ លោក ឯក ថា មន្ត្រីអ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រី បានប្រាប់អ្នកសារព័ត៌មានថា ជំនួបពិភាក្សានោះបានផ្តោតជាសំខាន់លើជំហររាជរដ្ឋាភិបាលទាក់ទងនឹងបញ្ហាប្រាសាទព្រះវិហារ បញ្ហាទណ្ឌិតជនជាតិថៃ ឈ្មោះវីរៈ ស៊ុមខា្វងឃីត និងការអភិវឌ្ឍបេតិកភណ្ឌអង្គរ
កម្ពុជា ។
លោកបណ្ឌិតសភាចារ្យសុខ អាន មានប្រសាសន៍ថា បញ្ហាទាក់ទងនឹងប្រាសាទព្រះវិហារ ដំណោះស្រាយដែលល្អបំផុតនោះគឺភាគីទាំងពីរត្រូវគោរពការសម្រេចរបស់តុលាការយុត្តិធម៌អន្តរជាតិក្រុងឡាអេឆ្នាំ១៩៦២និងឆ្នាំ២០១៣ ។ លោកបញ្ជាក់ថា រាជរដ្ឋាភិបាលនៃប្រទេសទាំងពីរនៅតែបន្តកិច្ចសហប្រតិបត្តិការល្អជាមួយគ្នា ពិសេសលើផ្នែកពាណិជ្ជកម្មនិងសេដ្ឋកិច្ច ។ ទាក់ទងនឹងទណ្ឌិតឈ្មោះ វីរៈ ស៊ុមខ្វាមឃីត លោកឧបនាយករដ្ឋមន្ត្រី សុខ អាន មានប្រសាសន៍ថា រាជរដ្ឋាភិបាលមិនលូកដៃចូលក្នុងកិច្ចការតុលាការទេ ហើយតុលាការក៏បានកាត់ ទោសនិងបន្ធូរបន្ថយទោសឱ្យទណ្ឌិតរូបនោះហើយដែរ ។ ដូច្នេះការងារនៅសេសសល់គឺជាការងាររបស់តុលាការ ។
ចំពោះការអភិវឌ្ឍនិងអភិរក្សប្រាង្គប្រាសាទអង្គររបស់កម្ពុជា លោកឧបនាយករដ្ឋមន្ត្រីលើកឡើងថា រាជរដ្ឋាភិបាលកម្ពុជាបានសហការយ៉ាងល្អជាមួយអង្គការយូណេស្កូ រដ្ឋាភិបាលបារាំង និងរាជរដ្ឋាភិបាលជប៉ុនតាំងពីឆ្នាំ១៩៩៣ ហើយក៏បានបង្កើតឡើងនូវគណៈកម្មាធិការសម្របសម្រួលអន្តរជាតិ ដើម្បីអភិវឌ្ឍន៍ និងអភិរក្សតំបន់អង្គរ ។ គណៈកម្មការធិការនេះដែលមានប្រទេសចំនួន១៧ ព្រមទាំងអង្គការអន្តរជាតិចំនួន២៧ចូលរួមតាំងពីឆ្នាំ១៩៩៣ មកទទួលបានមូលនិធិសម្រាប់ការជួសជុលនិងអភិរក្សប្រាង្គប្រាសាទអង្គរមានចំនួន២៥០លានដុល្លារអាមេរិក ។
ទន្ទឹមនោះ ថ្មីៗនេះអាជ្ញាធរអប្សរាសហការជាមួយអង្គការទេសចរណ៍ពិភពលោកនិងប្រទេសអូស្ត្រាលី បានដាក់ចេញនូវផែនការដែលមានឈ្មោះថា ចំណាត់ការទៅលើបេតិកភណ្ឌនិងកម្មវិធីគ្រប់គ្រងចំនួនទេសចដែលមានការកើនឡើងរៀងរាល់ឆ្នាំ ដើម្បីធ្វើឱ្យមានការអភិរក្សប្រកបដោយចីរភាព ៕
ចែករំលែកព័តមាននេះ