ខេត្តកំពង់ស្ពឺ ៖ អ្នកសារព័ត៌មានជើងចាស់ម្នាក់ ដែលបម្រើការងារក្នុងអង្គភាពកាសែតកោះសន្តិភាពប្រចាំខេត្តកំពង់ស្ពឺ និងភ្នាក់ងារយកព័ត៌មាននៅមជ្ឈមណ្ឌលដើមអម្ពិល កំពុងជួបការលំបាកដោយសារគាត់មានជំងឺប្រចាំកាយធ្ងន់ធ្ងរ កំពុងសម្រាកព្យាបាលក្នុងបន្ទប់សង្គ្រោះបន្ទាន់នៃមន្ទីរពេទ្យបង្អែកខេត្តកំពង់ស្ពឺ ហើយសូមអំពាវនាវស្វែងរកជំនួយសង្គ្រោះផងដែរ ។
លោកនៅ ចំរើន អាយុ៦៥ឆ្នាំ មានតួនាទីជាអ្នកឆ្លើយឆ្លងព័ត៌មានកាសែតកោះសន្តិភាពជើងចាស់ម្នាក់ប្រចាំខេត្តកំពង់ស្ពឺ ដែលមានទីលំនៅក្នុងភូមិត្រពាំងតាមាន់ ឃុំព្នាយ ស្រុកសំរោងទង កំពុងតែមានជំងឺធ្ងន់ធ្ងរជាច្រើនប្រភេទ ហើយបច្ចុប្បន្នបានសម្រាកព្យាបាលនៅក្នុងមន្ទីរពេទ្យបង្អែក ខេត្តកំពង់ស្ពឺ ពេលនេះកំពុងជួបការលំបាកខ្វះខាតប្រាក់កាស ដើម្បីព្យាបាល ព្រោះក្រុមគ្រួសាររបស់គាត់ពុំមានជីវភាពធូរធាប៉ុន្មានឡើយ ទើបអំពាវនាវដល់សប្បុរសជននានា និងមិត្តភក្តិអ្នកសារព័ត៌មាន មេត្តាជួយឧបត្ថម្ភទៅតាមលទ្ធ
ភាព ។
លោកនៅ ចំរើន ពីអតីតលោកធ្លាប់ជាមន្ត្រីរាជការបម្រើការងារក្នុងមន្ទីរឃោសនាការខេត្តកំពង់ស្ពឺ ប៉ុន្តែបានបោះបង់ចោល ហើយងាកមកចាប់អាជីពជាអ្នកកាសែតរហូតដល់សព្វថ្ងៃនេះតែម្តង ។
សូមបញ្ជាក់ថា លោកនៅ ចំរើន ជាអ្នកសារព័ត៌មានជើងចាស់ម្នាក់ ជាអ្នកនិពន្ធសៀវភៅប្រលោមលោក ដែលបានចូលរួមចំណែកសរសេរអត្ថបទយ៉ាងច្រើន ដើម្បីរួមចំណែកលើកស្ទួយវិស័យសារព័ត៌មាន និងជួយកែលំអសង្គមផងដែរ ។ លោកបានចូលបម្រើការងារក្នុងអង្គភាពកាសែតកោះសន្តិភាពចាប់តាំងពីកាសែតមួយនេះកកើតដំបូងម្ល៉េះ រហូតដល់បច្ចុប្បន្នចំពោះមន្ត្រីរាជការ ប្រជាពលរដ្ឋក្នុងខេត្តកំពង់ស្ពឺចូលចិត្តរាប់អានលោកណាស់ ព្រោះលោកជាមនុស្សស្លូតបំផុត និងឆាប់រាប់អាន ។
ភរិយាលោកនៅ ចំរើន បានប្រាប់ឱ្យដឹងកាលពីព្រឹកថ្ងៃទី៦ មីនា ២០១៤ នៅក្នុងមន្ទីរពេទ្យបង្អែកខេត្តកំពង់ស្ពឺ ពេលនេះប្តីរបស់គាត់ធូរខ្លះហើយអាចនិយាយបាន និងហុតទឹកបបរបានតិចៗ ។ គាត់ចាប់ផ្តើមឈឺធ្ងន់កាលពីថ្ងៃទី២៧ កុម្ភៈ ២០១៤ កន្លងមកនេះ ដោយមានអាការខ្សោយអស់កម្លាំង វិលមុខ បន្ទាប់មកធ្លាក់ឈាមយ៉ាងច្រើន ទើបប្រញាប់ដឹកបញ្ជូនទៅកាន់មន្ទីរពេទ្យខេត្តចូលក្នុងបន្ទប់សង្គ្រោះបន្ទាន់ភ្លាមៗ ហើយដាក់បញ្ចូលឈាមអស់ចំនួន២ប្លោក ទើបបានធូរស្រាលបន្តិច ។ លោកស្រីបន្តថា ក្រោយពីគ្រូពេទ្យពិនិត្យរួចរាល់បានប្រាប់ថា ប្តីរបស់គាត់មានជំងឺច្រើនប្រភេទណាស់ ត្រូវការពេលវេលាព្យាបាលយូរ ម្តងមួយមុខៗ ។
ក្រុមគ្រូពេទ្យបាននិយាយថា អ្នកជំងឺឈ្មោះនៅ ចំរើន គាត់មានបញ្ហារលាកសួតធ្ងន់ធ្ងរបំផុត រហូតធ្លាក់ឈាមធ្វើឱ្យមានការបាត់បង់ឈាមច្រើន ។ គាត់មានជំងឺច្រើនទៀតដូចជា រលាកក្រពះ ពោះវៀន និងថ្លើម ដូច្នេះត្រូវការពេលវេលាច្រើនសម្រាប់ព្យាបាល រីឯថវិកាក៏ត្រូវចំណាយច្រើនដែរ ។ ដោយសារតែជីវភាពគ្រួសាររបស់លោកនៅ ចំរើន មានជីវភាពមិនសូវធូរធានោះទេ ម្យ៉ាងទៀតគ្មានអ្នកគោលជំហរផងនោះ និងសូមអំពាវនាវដល់សប្បុរសជននានា មិត្តភក្តិ ជាអ្នកសារព័ត៌មាន មេត្តាចែករំលែកទុក្ខលំបាកជួយឧបត្ថម្ភទៅតាមលទ្ធភាពរៀងៗខ្លួន ។
ចំពោះអង្គភាពសារព័ត៌មាន ដែលលោកបានបម្រើ បានផ្តល់នូវការឧបត្ថម្ភក៏មានកម្រិតដែរ ។ ដើម្បីជួយដោះស្រាយការខ្វះខាតដ៏ធំនេះ មានតែសូមអំពាវនាវដល់មិត្តភក្តិជិតឆ្ងាយ ដល់អ្នកសារព័ត៌មានរួមវិជ្ជាជីវៈ មេត្តាឧបត្ថម្ភ និងជួយលើកទឹកចិត្តក្នុងគ្រាលំបាកនេះដោយក្តីមេត្តាផង ។
ចែករំលែកព័តមាននេះ