រាជធានីភ្នំពេញ ​៖ នៅវិមានរដ្ឋសភាជាតិ ​នាព្រឹកថ្ងៃទី០៦ ​មីនា ​២០១៤ ​មានរៀបចំបា្ររព្ឋខួប​លើកទី១០៣​ ទិវាសិទ្ឋិនារីអន្តរជាតិ ​០៨ មីនា​ ក្រោមប្រធានបទ “​ សមភាពនៃ​ការអប់រំមាន​សារៈសំខាន់​ក្នុង​កិច្ចការអភិវឌ្ឍន៏​សង្គម ” ។

បើតាមអ្នកឆ្លើយឆ្លង​ព័ត៌មាន​កោះសន្តិភាព​បានបញ្ជាក់ឲ្យដឹងដែរថា​ ពិធីនេះ​បា្ររព្ឋធ្វើក្រោមអធិបតីភាព​ លោក ងួន ញិល​ ប្រធានស្តីទីរដ្ឋសភា ​ដោយមានការអញ្ជើញ​ចូលរួមផងដែរ​ពីសំណាក់​លោកស្រី   អ៊ឹង កន្ថាផាវី​ រដ្ឋមន្រ្តីក្រសួង​កិច្ចការនារី ​និង សមាជិក ​សមាជិការដ្ឋសភា ​រាជរដ្ឋាភិបាល ​និងមន្រ្តីរាជការមកពី​ស្ថាប័ននីតិបញ្ញត្តិ ​និងស្ថាប័ននីតិប្រតិបត្តិ ​តំណាងអង្គការជាតិ ​អន្តរជាតិ​ជាច្រើនរូបទៀត ។

សេចក្តីរាយការណ៏​បានបន្ថែមទៀតថា​ គោលបំណង​សំខាន់នៃការបា្ររព្ឋពិធី​ខួបលើកទី១០៣​ ទិវានារីអន្តរជាតិ០៨​ មីនា​ នាពេលនេះ​ គឺដើម្បីផ្តល់ឱកាសឲ្យបុរស ​ស្រ្តី និង យុវវ័យ​ ទទួលបាន​ចំណេះដឹង ជំនាញ និង ​មានសីលធ៌ម​ ដើម្បីក្លាយជាធនធានមនុស្ស​ដ៏មានសក្តានុពល​ សម្រាប់ពន្លឿនការអភិវឌ្ឍ​សេដ្ឋកិច្ច និងសង្គមជាតិ ៕