រាជធានីភ្នំពេញ ៖ លោកប៉ា សុជាតិវង្ស អភិបាលរាជធានីភ្នំពេញ បានដាក់ចេញនូវវិធានការក្តៅមួយដែលអាចឈានទៅដល់ការលុបចោលកិច្ចសន្យាជាមួយក្រុមហ៊ុនយកភាស៊ី និងចំណតផ្ញើម៉ូតូ រថយន្តតាមផ្សារទូទាំងរាជធានីភ្នំពេញ ប្រសិនបើនៅតែយកថ្លៃលើសសៀវភៅបន្ទុក បង្កការបាត់បង់សណ្តាប់ធ្នាប់ និងនាំឱ្យមានការថ្នាំងថ្នាក់ពីប្រជាពលរដ្ឋ ។
រាជធានីភ្នំពេញ ៖ លោកប៉ា សុជាតិវង្ស អភិបាលរាជធានីភ្នំពេញ បានដាក់ចេញនូវវិធានការក្តៅមួយដែលអាចឈានទៅដល់ការលុបចោលកិច្ចសន្យាជាមួយក្រុមហ៊ុនយកភាស៊ី និងចំណតផ្ញើម៉ូតូ រថយន្តតាមផ្សារទូទាំងរាជធានីភ្នំពេញ ប្រសិនបើនៅតែយកថ្លៃលើសសៀវភៅបន្ទុក បង្កការបាត់បង់សណ្តាប់ធ្នាប់ និងនាំឱ្យមានការថ្នាំងថ្នាក់ពីប្រជាពលរដ្ឋ ។
ការដាក់ចេញនូវវិធានការក្តៅរបស់លោកអភិបាលរាជធានីភ្នំពេញនេះ ក្នុងពេលលោកកោះប្រជុំជាបន្ទាន់មួយជាមួយប្រធានផ្សារ និងក្រុមហ៊ុនយកភាស៊ីតាមផ្សារនានាទូទាំងរាជធានីភ្នំពេញ នៅសាលារាជធានីភ្នំពេញ នាព្រឹកថ្ងៃទី៥ មីនា ដោយមានការចូលរួមពីអភិបាលខណ្ឌគ្រប់ខណ្ឌ ប្រធានផ្សារ លោកស្រី ស៊ុយ សុផាន តំណាងក្រុមហ៊ុនផ្តាច់មុខយកភាស៊ីស្ទើរគ្រប់ផ្សារនៅរាជធានីភ្នំពេញ និងមន្ត្រីពាក់ព័ន្ធក្រោមឱវាទសាលារាជធានីភ្នំពេញជាច្រើនរូបទៀត ។ មន្ត្រីសាលារាជធានីភ្នំពេញបានឱ្យដឹងថា នៅរាជធានីភ្នំពេញមានផ្សាររដ្ឋចំនួន២៥ ផ្សារឯកជនចំនួន២៦ ផ្សារទំនើបចំនួន១៨ និងផ្សារតូចៗ (ម៉ាត) មានជាង៩០ ដោយមិនទាន់គិតពីផ្សារក្រមួនតូចៗផ្សេងទៀតនោះទេ ។ លោកអភិបាលរាជធានីភ្នំពេញបានមានប្រសាសន៍យ៉ាងម៉ឺងម៉ាត់ថា ចាប់ពីពេលនេះទៅ សណ្តាប់ធ្នាប់នៅតាមផ្សារ ជាពិសេសនៅជុំវិញផ្សារ ត្រូវតែរៀបចំឱ្យបានប្រសើរឡើង ដោយមិនឱ្យមានភាពរញេ៉រញ៉ៃដូចមុនទៀតទេ ហើយកិច្ចការនេះប្រធាន និងគណៈកម្មការផ្សារ និងអាជ្ញាធរខណ្ឌត្រូវតែទទួលខុសត្រូវ ។
ម្យ៉ាងទៀត ស្នើឱ្យមានកងកម្លាំងសមត្ថកិច្ចចូលរួម ត្រូវដាក់កម្លាំងសន្តិសុខសណ្តាប់ធ្នាប់ខណ្ឌ ដោយមានអភិបាលរងខណ្ឌមួយរូបប្រចាំការជាប្រចាំ ហើយជាជំហានដំបូងនេះ អាជ្ញាធរខណ្ឌត្រូវជ្រើសយកផ្សារក្នុងមួយខណ្ឌមួយដើម្បីធ្វើជាគំរូមុនគេ ។ លោកប៉ា សុជាតិវង្ស មានប្រសាសន៍ទៀតថា ចំណែកក្រុមហ៊ុនដែលទទួលសិទ្ធិយកភាស៊ីតាមផ្សារនានា ក៏ត្រូវធ្វើការកែសម្រួលឱ្យបានស៊ីជម្រៅចាប់ពីពេលនេះតទៅ មិនអនុញ្ញាតឱ្យចេះតែយកភាស៊ីតាមចិត្តនោះទេ ដោយអនុវត្តតាមសៀវភៅបន្ទុក ហើយរយៈពេល១៥ថ្ងៃទៀតអ្នកយកភាស៊ីត្រូវតែមានពាក់ឯកសណ្ឋាន មានស្លាកឈ្មោះ និងមានអត្តលេខឱ្យបានត្រឹមត្រូវ បើមិនមានទេ យើងមិនអនុញ្ញាតឱ្យយកភាស៊ីតែម្តង ។ ចំពោះចំណតរថយន្ត និងម៉ូតូ ក៏ដូចអ្នកយកភាស៊ីតាមផ្សារទាំងនោះ បើក្រុមហ៊ុនអនុវត្តខុសពីច្បាប់ ឬកិច្ចសន្យា សាលារាជធានីភ្នំពេញមិនអនុគ្រោះនោះទេ គឺឈានទៅដល់ការលុបកិច្ចសន្យារបស់ក្រុមហ៊ុននោះចោលតែម្តង បើមិនសុខចិត្ត សុំឱ្យទៅដាក់ពាក្យបណ្តឹងទៅតុលាការចុះ ។ យើងពិតជាមិនអាចបណ្តែតបណ្តោយទៀតទេ ។
លោកអភិបាលរាជធានីបញ្ជាក់ថា នេះជាពេលវេលាសាកល្បងសមត្ថភាពមន្ត្រីរបស់យើង ទាំងប្រធានផ្សារ អភិបាលរងរាជធានី អភិបាលខណ្ឌ អភិបាលរងខណ្ឌ និងមន្ត្រីពាក់ព័ន្ធក្រោមឱវាទសាលារាជធានីភ្នំពេញទាំងអស់ ចាប់ពីពេលនេះតទៅ បើធ្វើការងារមិនកើតទេ ដកចេញ កុំឱ្យខូចឈ្មោះ និងខាតកៅអីរបស់គណបក្សប្រជាជនកម្ពុជាតទៅទៀត គឺដល់ពេលដែលត្រូវកែទម្រង់ឱ្យបានស៊ីជម្រៅហើយ ។ ក្នុងឱកាសនោះ លោកប៉ា សុជាតិវង្ស បានណែនាំឱ្យមន្ត្រីជំនាញពិនិត្យឯកសារដែលពាក់ព័ន្ធ ទាំងកិច្ចសន្យាភាស៊ី និងប្លង់តាមផ្សារនីមួយៗ និងត្រូវគូសប្លង់កំណត់ព្រំប្រទល់ឱ្យបានច្បាស់លាស់ ។ ជាមួយនេះ ស្នើឱ្យតាមផ្សារទាំងអស់ក្នុងរាជធានីភ្នំពេញ ត្រូវដាក់ប្រអប់សំបុត្រដើម្បីឱ្យប្រជាពលរដ្ឋមានមតិយោបល់ជុំវិញការដឹកនាំរបស់ប្រធានផ្សារនីមួយៗ និងមតិរបស់អាជីវករ ជាពិសេសពាក់ព័ន្ធទៅនឹងការបង់ថ្លៃនានារបស់ពួកគាត់ផងដែរ ហើយប្រអប់សំបុត្រនោះមានតែអភិបាលខណ្ឌទេ ដែលមានសិទ្ធិក្នុងការបើក និងកាន់កូនសោ ។
ទាក់ទិនទៅនឹងវិធានការរបស់លោកអភិបាលរាជធានីភ្នំពេញខាងលើនេះ ប្រជាពលរដ្ឋរាជធានីភ្នំពេញមានការត្រេកអរ និងគាំទ្រយ៉ាងខ្លាំង ហើយសង្ឃឹមថា អាជ្ញាធរមូលដ្ឋាន ជាពិសេសគណៈកម្មការ ឬប្រធានផ្សារ និងមន្ត្រីពាក់ព័ន្ធនឹងធ្វើកិច្ចការនេះឱ្យទទួលបានជោគជ័យ៕
ចែករំលែកព័តមាននេះ