ខេត្តកំពង់ធំ ៖ មន្ដ្រីនានាដែលស្និទ្ធជាមួយកោះសន្ដិភាពបានខ្សឹបប្រាប់ពីអំពើមិនប្រក្រតីជាច្រើន កំពុងកើតមាននៅមន្ទីរសេដ្ឋកិច្ចនិងហិរញ្ញវត្ថុខេត្ដកំពង់ធំ ។ តាមសេចក្ដីរាយការណ៍លាយឡំ និងខ្សឹបផងបានអះអាងថា ប្រធានមន្ទីរនិងមន្ដ្រីនៃមន្ទីរសេដ្ឋកិច្ចនិងហិរញ្ញវត្ថុខេត្ដកំពង់ធំ កំពុងរងនូវការរិះគន់អំពីរឿងពុករលួយតាមរយៈគាបសង្កត់ និងជំរិតទារប្រាក់ពីមន្ទីរអង្គភាពនានា និងក្រុមហ៊ុនជាច្រើននៅក្នុងខេត្ដ នៅពេលពួកគេរត់ការសូមបើកប្រាក់ម្ដងៗ ។
តាមសេចក្ដីរាយការណ៍ពីថ្នាក់ដឹកនាំនៃមន្ទីរចំនួនពីរបានឱ្យដឹងថា នៅមន្ទីរសេដ្ឋកិច្ចនិងហិរញ្ញវត្ថុខេត្ដកំពង់ធំបច្ចុប្បន្ន ទោះបីជារដ្ឋាភិបាលបានធ្វើកំណែទម្រង់ស៊ីជម្រៅ ជាពិសេសគឺការលុបបំបាត់អំពើពុករលួយនៅគ្រប់រូបភាព យ៉ាងណាក៏ដោយ ប៉ុន្ដែប្រធាននិងមន្ដ្រីនៃមន្ទីរមួយនេះនៅតែប្រព្រឹត្ដិអំពើពុករលួយស្មើដៃគ្នាដូចពេលមុនដដែល គ្រាន់តែមានចរិតទន់ភ្លន់ជាងមុនបន្ដិចប៉ុណ្ណោះ ។ ប្រភពដដែលបានឱ្យដឹងថា នៅពេលមន្ទីរអង្គភាពរត់ឯកសារសូមដកសាច់ប្រាក់មកប្រើប្រាស់ម្ដងៗគឺត្រូវបានប្រធានមន្ទីរសេដ្ឋកិច្ចនិងហិរញ្ញវត្ថុលោកសុខ សុផល និងលោកកាំង សួង ប្រធានការិយាល័យថវិការួមនិងមន្ដ្រីជំនាញ៥រូបទៀតរួមគ្នាជំរិតទារប្រាក់ពីអ្នករត់ឯកសាររបស់មន្ទីរអង្គភាពនានាតាមអំពើចិត្ដ ។ ឧទាហរណ៍រត់ការសូមដកសាច់ប្រាក់បុរេប្រទានពី១០លានរៀលឡើងទៅ គឺត្រូវបង់លុយជូនលោកប្រធានមន្ទីរសុខ សុផល ចំនួន២% ។ បង់ជូនលោកប្រធានការិយាល័យថវិកាជាង១% និងមន្ដ្រីពាក់ព័ន្ធរួមមាន អនុប្រធានមន្ទីរ អនុប្រធានការិយាល័យថវិកា អ្នកបោះត្រាចុះលេខលិខិត និងមន្ដ្រីទទួលបន្ទុកទៀតនោះ គឺមន្ទីរអង្គភាពនីមួយៗត្រូវចំណាយអស់ទឹកប្រាក់តិចបំផុត៦%នៃទឹកប្រាក់សរុបដែលត្រូវរត់ការសូមដកនោះ ។
សេចក្ដីរាយការណ៍បញ្ជាក់ទៀតថា ប្រសិនបើមន្ទីរអង្គភាពណាមួយមិនបំពេញបំណងនិងដឹងអំពីទម្លាប់របស់ប្រធាននិងមន្ដ្រីមន្ទីរសេដ្ឋកិច្ចនិងហិរញ្ញវត្ថុខេត្ដកំពង់ធំទេ ប្រាកដជាខ្ទង់ប្រាក់របស់មន្ទីរអង្គភាពទាំងអស់នោះដែលត្រូវដកយកមកចាយតាមគម្រោងការ ត្រូវកកស្ទះជាមិនខាន ។ ដូច្នោះ មន្ទីរអង្គភាពនីមួយៗគឺត្រូវបង្ខំចិត្ដចំណាយប្រាក់ខ្លះឱ្យទៅពួកគេជាថ្នូរនឹងបានប្រាក់មកចាយតាមគម្រោងការ ។
ម្សិលមិញនេះ កោះសន្ដិភាពពុំអាចសុំការបំភ្លឺបានទេ ព្រោះទូរស័ព្ទពុំអាចទាក់ទងបាន ។ ប៉ុន្ដែសង្ឃឹមថា លោកប្រធានមន្ទីរអាចនឹងធ្វើការបំភ្លឺលើរឿងអាស្រូវនេះ ហើយអាចសន្យាលុបបំបាត់នូវភាពមិនប្រក្រតីនេះឆាប់ជាមិនខាន ៕
ចែករំលែកព័តមាននេះ