ខេត្តកំពង់ឆ្នាំង ៖ ស្ត្រីម្នាក់ដោយសារតែក្តីមេត្តាដល់ប្អូនស្រីជីដូនមួយបង្កើតរបស់ខ្លួន បានសុខចិត្តឱ្យប្តីខ្លួនឯងយកធ្វើជាប្រពន្ធចុង ព្រោះនឹកឃើញថា ជាស្ត្រីមេមា៉យ ។ តែផ្ទុយទៅវិញប្រៀបដូចយកភ្នំភ្លើងមកទូលលើក្បាលរស់នៅមិនចុះសម្រុងនឹងគ្នារហូតទាស់ទែងខ្វែងគំនិតគ្នា ក្លាយជាសត្រូវឈ្លោះទាស់សម្តីគ្នា រហូតឈានដល់អំពើហិង្សា បង្កឡើងដោយស្ត្រីជាប្រពន្ធចុង និងជាប្អូនស្រីជីដូនមួយ បណ្តាលឱ្យស្ត្រីជាប្រពន្ធដើមរងរបួសចូលពេទ្យ ។
ទោះយា៉ងណា ខាងក្រោមនេះគឺជាការបកស្រាយរបស់ស្ត្រីជាប្រពន្ធដើមដែលកំពុងសម្រាកក្នុងមន្ទីរពេទ្យតែប៉ុណ្ណោះ ។ ចំណែកស្ត្រីជាប្រពន្ធចុង និងបុរសជាប្តី ពុំអាចសុំការបំភ្លឺបានទេជុំវិញរឿងរា៉វនេះ ។ ជួបជាមួយស្ត្រីរងគ្រោះដែលជាប្រពន្ធដើមនៅក្នុងមន្ទីរពេទ្យនាព្រឹកថ្ងៃទី៤ មីនា បានប្រឹងរៀបរាប់ដោយសំឡេងមិនសូវច្បាស់ថា រូបគាត់មានឈ្មោះ ជា សំប៊ឺន សព្វថ្ងៃអាយុ៥៧ឆ្នាំ មានកូនប្រុសស្រីចំនួន៤នាក់ (កូនប្តីមុន) និងមានទីលំនៅក្នុងភូមិអណ្តូងឫស្សី ឃុំស្រែថ្មី ស្រុករលាប្អៀរ ។ គាត់បានបន្តថា កាលពីជាង១៣ឆ្នាំមុន គាត់បានរៀបការជាមួយប្តីថ្មីម្នាក់ទៀតឈ្មោះ ម៉ក់ ចុន សព្វថ្ងៃមានអាយុ៧០ឆ្នាំហើយ ។ ក្រោយពេលរៀបការរួចគាត់បានទៅរស់នៅស្រុកកំណើតខាងប្តី គឺនៅក្នុងភូមិថ្មី ឃុំពង្រ ស្រុករលាប្អៀរ ដោយទុកឱ្យកូនៗរស់នៅឯស្រុកកំណើតនៅភូមិអណ្តូងឫស្សី ។ ចាប់តាំងពីពេលទៅរស់នៅជាមួយគ្នា រយៈពេលជាង១៣ឆ្នាំ ពួកគាត់បានខំប្រឹងចាប់ដៃគ្នាពីបាតដៃទទេ រហូតបានផ្ទះសម្បែងនៅគួរសមដូចគេឯង ។ ថ្វីបើពួកគាត់ទាំងពីរគ្មានកូនជាមួយគ្នាពិតមែន ក៏ពួកគាត់មានសេចក្តីសុខ និងមានសុភមង្គលក្នុងជីវិតរស់នៅដែរ បើទោះថាប្តីក្រោយនេះជាជនពិការជើងមែន គាត់ជាស្ត្រីជាអ្នករ៉ាប់រងការងារធ្ងន់ស្រាលក្នុងគ្រួសារទាំងអស់ ហើយប្តីរបស់គាត់បានស្រឡាញ់ចូលចិត្តគាត់មិនដែលមានការថ្នាំងថ្នាក់នឹងគ្នាម្តងណាឡើយ ។
ស្ត្រីរូបនោះបានបន្តថា ប៉ុន្តែក្រោយមកគាត់បានដឹងថា ប្តីគាត់បានលួចស្រឡាញ់គ្នាជាមួយប្អូនស្រីជីដូនមួយគាត់ម្នាក់ ឈ្មោះ ចិ ពៅ អាយុ៣៣ឆ្នាំ ជាស្រីមេមា៉យមានកូន២នាក់ ។ ដោយដឹងបែបនេះគាត់ក៏មិនថាអីដែរ ណាអាណិតប្តី ណាក៏អាណិតប្អូនជាស្ត្រីមេមា៉យដែរ ទើបសុខចិត្តសែនព្រេនបន្តិចបន្តួច ហើយបានឱ្យមករស់នៅជាមួយគ្នាតែម្តងទៅ ។ រយៈពេលជិត៣ឆ្នាំ ដែលប្រពន្ធចុងមករស់នៅជាមួយ គ្រួសាររបស់គាត់តែងមានរឿងឈ្លោះទាស់ទែងខ្វែងគំនិតគ្នា រហូតពុំដែលបានសុខម្តងណាឡើយ រហូតពេលខ្លះពួកគាត់ត្រូវឡើងប៉ុស្តិ៍នគរបាលទៀតផង ។ ដោយមើលទៅពិបាករស់នៅជាមួយគ្នាខ្លាំងពេក គាត់ក៏សម្រេចចិត្តមករស់នៅជាមួយកូនៗនៅភូមិអណ្តូងឫស្សីមួយរយៈ ។ ប៉ុន្តែយូរៗម្តងគាត់តែងឆ្លៀតទៅលេងប្តី និងមើលផ្ទះសម្បែងដែរ ព្រោះជារបស់ទ្រព្យដែលគាត់ទាំងពីរនាក់ខំរកជាង១៣ឆ្នាំកន្លងទៅ និងមិនមែនជាទ្រព្យរបស់ប្រពន្ធចុងឡើយ ។
អ្វីៗដែលនឹកស្មានមិនដល់នោះ កាលពីព្រឹកថ្ងៃទី១ មីនា គាត់បានទៅលេងប្តីដូចរាល់ដង ព្រោះចង់មើលទ្រព្យសម្បត្តិរបស់ខ្លួន ពេលទៅដល់បានជួបប្តីគាត់នៅក្រោមផ្ទះ ពេលនោះគាត់ក៏មិនបានដឹងថា ប្រពន្ធចុងនៅក្បែរទ្រុងមាន់ជិតនោះទេ ។ គាត់បានព្យាយាមសួរបញ្ជាក់ទៅប្តីគាត់ថា ម៉េចហើយឯង រវាងខ្ញុំនិងប្រពន្ធចុងឯងសម្រេចចិត្តជ្រើសរើសមួយណា? ខណៈនោះដែរ ស្ត្រីជាប្រពន្ធចុងដែលកំពុងតែឱ្យចំណីមាន់នៅក្បែរនោះ ពេលឮដូច្នេះក៏ស្រែកឡើង ថែមទាំងជេរដៀលត្មេះដល់គាត់ ព្រមទាំងទាញដំបងមកបុកចំភ្នែកគាត់ខាងឆ្វេងបណ្តាលឱ្យជាំខ្មៅ ។ ពេលនោះដោយដឹងថា គាត់គ្មានកម្លាំងតបត គាត់ព្យាយាមរត់ តែស្ត្រីជាប្រពន្ធចុងបានចោលគាត់នឹងដំបងចំត្រគៀកខាងស្តាំបណ្តាលឱ្យដួលទៅដី ហើយស្ត្រីជាប្រពន្ធចុងមិនព្រមដោះលែងគាត់ទេ ថែមទាំងរត់មកវាយចំក្បាលគាត់ចំនួន៤ដំបងថែមទៀត ធ្វើឱ្យគាត់ដួលសន្លប់នឹងកន្លែងតែម្តង ។ ក្រោយពេលកើតហេតុ កូនៗគាត់ដែលទៅជាមួយបានយកគាត់មកកាន់មន្ទីរពេទ្យដើម្បីព្យាបាល ។
ពាក់ព័ន្ធករណីខាងលើនេះ លោកសាញ់ ប៊ុនធឿន នាយនគរបាលបុ៉ស្តិ៍ស្តីទីនិយាយថា រឿងនេះលោកមិនច្បាស់ទេ បុ៉ន្តែគ្រួសារនេះពិតជាមានប្តីមួយប្រពន្ធពីរ រស់នៅជាមួយគ្នាមែន ហើយធ្លាប់ឡើងបុ៉ស្តិ៍ប៉ូលិសដែរពីរឿងប្រពន្ធចុង ប្រពន្ធដើមទាស់គ្នានេះ ។ ទោះយ៉ាងណាក៏ដោយ រឿងប្រពន្ធចុងវាយប្រពន្ធដើម ដល់ថ្នាក់ចូលពេទ្យបែបនេះ អាជ្ញាធរនិងមន្ត្រីនគរបាលមូលដ្ឋានហាក់មិនបានយកចិត្តទុកដាក់ជួយស្ត្រីរងគ្រោះនោះទេ ដោយសំអាងថា មិនឃើញមកដាក់ពាក្យប្តឹង ។ បុ៉ន្តែរឿងហេតុកើតឡើងតាំងពីថ្ងៃទី១ ដល់ថ្ងៃទី៤ មីនា មិនឃើញសមត្ថកិច្ចណាមកសួរនាំស្ត្រីរងគ្រោះនៅមន្ទីរពេទ្យឡើយ ៕
ចែករំលែកព័តមាននេះ