ខេត្តកំពត ៖ កម្លាំងសមត្ថកិច្ចរបស់ខណ្ឌរដ្ឋបាលព្រៃឈើកំពត ដឹកនាំដោយលោក ស៊ឹម ឡាប័ុង នាយខណ្ឌ និងកម្លាំងនគរបាលអន្តរាគមន៍របស់ការិយាល័យកណ្តាលនគរបាលព្រហ្មទណ្ឌខេត្ត ដឹកនាំដោយលោកឧត្តមសេនីយ៍ត្រី ម៉ៅ ច័ន្ទមធុរិទ្ធ ស្នងការរងនិងជានាយការិយាល័យកណ្តាល រួមនឹងកម្លាំងនគរបាលមូលដ្ឋានស្រុកទាំងពីរ បានរួមសហការជាមួយអង្គភាពរដ្ឋបាលព្រៃឈើកំពត បន្តយុទ្ធនាការបង្ក្រាបរោងសិប្បកម្មអត់ច្បាប់និងឈើខុសច្បាប់ដែលក្រុមអាជីវករធ្វើអាជីវកម្មស្តុក លាក់ទុកឈើនៅតាមរោងសិប្បកម្មរបស់ខ្លួន ។
តាមព័ត៌មានឱ្យដឹងថា នៅក្នុងរោងសិប្បកម្មនីមួយៗ មានឈើប្រណីត និងឈើហុបមិនទាន់ច្រៀករាប់រយកំណាត់ ហើយត្រូវបានសមត្ថកិច្ចចម្រុះប្រមូល និងដឹកយកមករក្សាទុកនៅខណ្ឌរដ្ឋបាលព្រៃឈើកំពត ដើម្បីកសាងសំណុំឯកសារបញ្ជូនទៅសាលាដំបូងខេត្ត ដោះស្រាយតាមច្បាប់ ។ នៅក្នុងយុទ្ធនាការបង្ក្រាបរោងសិប្បកម្មអត់ច្បាប់ និងឈើខុសច្បាប់នេះ បើគិតក្នុងរយៈពេល៤ថ្ងៃ គឺចាប់ពីថ្ងៃទី២៨ កុម្ភៈ មកដល់ថ្ងៃទី៤ មីនា ជាលទ្ធផលប្រមូលឈើហុបបានមិនតិចជាងពី៨០០ទៅ៩០០កំណាត់ឡើយ រួមនឹងម៉ាសុីនអារច្រៀកឈើជាច្រើនគ្រឿងផងដែរ ។ បើយោងតាមប្រភពព័ត៌មានពីប្រជាពលរដ្ឋនៅជុំវិញចំណុចរោងសិប្បកម្មអត់ច្បាប់និងអ្នកធ្វើសិប្បកម្មអត់ច្បាប់ បានលួចខ្សឹបប្រាប់ឱ្យដឹងថា នៅពេលសមត្ថកិច្ចកំពុងជញ្ជូនឈើខុសច្បាប់ទៅរក្សាទុកនៅខណ្ឌរដ្ឋបាលព្រៃឈើកំពត មានកម្លាំងក្លែងបន្លំធ្វើជាសមត្ថកិច្ចដែលចុះមកជួយការពារការបង្ក្រាបបទល្មើសខាងលើចំនួនជិត១០នាក់ បានដើរចលនាធ្វើសកម្មភាពតាមរោងសិប្បកម្មអត់ច្បាប់ទាំងនោះ បង្ខំឱ្យបង់ប្រាក់ទៅពួកគេពី១.០០០ដុល្លារក៏មាន ១.៥០០ដុល្លារក៏មាន ក្នុងរោងសិប្បកម្មនីមួយៗ ។
ពួកគេនោះ អះអាងថា ពួកគេជាមន្ត្រីរដ្ឋបាលព្រៃឈើកំពត បើគេមិនចាប់ហើយ អ្នកណាក៏មិនហ៊ានចាប់ដែរ ។ ប្រភពដដែលបានឱ្យដឹងទៀតថា ក្រោយពីក្រុមនេះទទួលបានប្រាក់ពីម្ចាស់រោងសិប្បកម្មហើយ ក៏បានប្រាប់ម្ចាស់រោងសិប្បកម្មទាំងនោះ ឱ្យជម្លៀសឈើតូចធំចេញឱ្យអស់ពីក្នុងរោងសិប្បកម្ម ឯម៉ាស៊ីនក៏ត្រូវដោះនិងរុះរើចេញឱ្យអស់ពីក្នុងទីតាំងរោងសិប្បកម្មដែរ ពីព្រោះខ្លាចក្រុមផ្សេងគេមកពិនិត្យនាំតែមានបញ្ហា ។ តាមប្រភពដដែលបានឱ្យដឹងថា រោងសិប្បកម្មអត់ច្បាប់ជាង១០ទីតាំង គឺបានទទួលដំណឹងពីក្រុមក្លែងបន្លំ ប្រាប់ឱ្យដឹងមុន និងបង់លុយឱ្យខ្លួន រួចប្រាប់ឱ្យម្ចាស់រោងសិប្បកម្មរុះរើម៉ាសុីន និងជម្លៀសឈើចេញឱ្យអស់ពីទីតាំងដូចគ្នា ។ មិនតែប៉ុណ្ណោះ ទោះបីបង់ប្រាក់ឱ្យក្រុមនេះហើយក្តី ក៏គេពិនិត្យឃើញនៅតាមរោងសិប្បកម្មនោះ ម្ចាស់ត្រូវចាក់សោរបងបិទគ្រប់ទីតាំងទាំងអស់ ។
សូមបញ្ជាក់ថា ទីតាំងសិប្បកម្មដែលចាញ់បោកក្រុមក្លែងបន្លំធ្វើជាកម្លាំងសមត្ថកិច្ច ដើរទារលុយ ហើយធានាអះអាងនោះ គឺភាគច្រើននៅក្នុងភូមិកោះឫស្សី ឃុំត្រពាំងល្បើក ស្រុកឈូក ។ ប្រជាពលរដ្ឋនៅក្នុងតំបន់ខាងលើ បានរិះគន់មកលើសមត្ថកិច្ចថា ពួកគាត់មានការសង្ស័យថា បើមិនមានអំពើឃុបឃិតណាមួយចេញពីផ្ទៃក្នុងនៃកម្លាំងដែលចុះសហការបង្ក្រាបនោះទេ ក៏មិនអាចមានជនទៅក្លែងបន្លំដើរយកប្រាក់ពីម្ចាស់ទីតាំងសិប្បកម្មអត់ច្បាប់ បានដោយងាយស្រួលបែបនេះឡើយ ៕
ចែករំលែកព័តមាននេះ