ខេត្តប៉ៃលិន ៖ ខ្ទមសសរឈើតូចៗរបស់អ្នកភូមិក្រីក្រតោកយ៉ាកចំនួន៩ខ្នងត្រូវមន្រ្តីអភិរក្សសត្វព្រៃ(MJP) និងមន្រ្តីបរិស្ថានមានគ្នាប្រហែល៣០នាក់ ដឹកនាំដោយលោក ស្រី រ៉ា ជាមន្រ្តីអនុរក្សបានចុះទៅធ្វើសកម្មភាពរុះរើ និងយករបស់របរប្រើប្រាស់អស់មួយចំនួនឱ្យចាកចេញ ។ ក្នុងនោះស្រ្តី២នាក់និងក្មេងស្រីតូចអាយុ៣ឆ្នាំម្នាក់ ដែលកំពុងស្នាក់នៅក្នុងខ្ទមនោះ ត្រូវគេនាំយកទៅទីស្នាក់ការ ដោយចោទពីបទសាងសង់លំនៅឋានលើដីបរិស្ថាន និងកាប់រុករានបំផ្លាញព្រៃឈើតំបន់អភិរក្ស ។
ចំណែកផ្ទះធំប្រក់ស័ង្កសីសសរជ្រុង និងជញ្ជាំងក្តារជាច្រើនខ្នងដែលសង់នៅលើដីអភិរក្សដូចគ្នាមិនត្រូវបានមន្រ្តីទាំងនោះរុះរើបំផ្លាញនោះទេ ខណៈដើមឈើតូចធំជាច្រើនកំពុងតែត្រូវបានគេយកម៉ាស៊ីនត្រង់ស៊ីន័ររុករានកាប់ និងដុតបំផ្លាញនៅក្នុងដែនដីអភិរក្ស និងមិនត្រូវបានចាប់ខ្លួនជនល្មើសណាម្នាក់នោះឡើយ ដែលទំនងជារបស់អ្នកគ្រាន់បើ ។ ហេតុការណ៍ដែលមន្រ្តីអភិរក្សសត្វព្រៃ និងមន្រ្តីបរិស្ថានចុះទៅរុះរើបំផ្លាញខ្ទម និងដេញចាប់ឃាត់ខ្លួននេះ បានកើតឡើងកាលពីវេលាម៉ោង១១ និង៣០នាទីព្រឹកថ្ងៃទី៣ មីនា ស្ថិតនៅចំណុចអូររុន ក្រោយទីស្នាក់ការមួយឈ្មោះ«តំបន់ប្រើប្រាស់ច្រើនយ៉ាងសំឡូត» ស្ថិតក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ។
ពលរដ្ឋដែលត្រូវមន្រ្តីអភិរក្សសត្វព្រៃ និងមន្រ្តីបរិស្ថានឃាត់ខ្លួន គឺ១-ឈ្មោះដង សាស់ ភេទស្រី អាយុ៣៣ឆ្នាំ ២-ឈ្មោះយឿន ស្រីមុំ ភេទស្រី អាយុ២១ឆ្នាំ និងកូនស្រី ៣-ឈ្មោះយឿន ចាន់រី អាយុ៣ឆ្នាំ ហើយរហូតមកដល់វេលាម៉ោង១និង៣០នាទីរសៀលថ្ងៃទី៤ មីនា ត្រូវបានដោះលែងវិញ ដោយឱ្យធ្វើកិច្ចសន្យាឈប់ទៅរស់នៅលើដីនោះតទៅទៀត ។
ប្រភពព័ត៌មានពីពលរដ្ឋម្នាក់ឈ្មោះអៀម សុន ភេទប្រុស អាយុ៥១ឆ្នាំ ដែលត្រូវបានមន្រ្តីអភិរក្សសត្វព្រៃ និងបរិស្ថានរុះរើបំផ្លាញខ្ទមរបស់គាត់ដែរនោះរៀបរាប់ឱ្យដឹងថា ដោយសារតែគ្មានដីសង់ផ្ទះ និងដីចម្ការធ្វើនឹងគេទើបគាត់ដាច់ចិត្តទាក់ទងទៅអាជ្ញាធរភូមិ សង្កាត់ និងមន្រ្តីបរិស្ថានសុំរស់នៅលើដីអភិរក្សបណ្តោះអាសន្ន និងបានទៅរស់នៅទីនោះប្រហែល២ទៅ៣ឆ្នាំមកហើយ ក៏ត្រូវមន្ត្រីបរិស្ថានចាប់គាត់ដាក់ពន្ធនាគារអស់រយៈពេល២ឆ្នាំចាប់ពីឆ្នាំ២០១១-២០១៣ ទើបដោះលែងឱ្យមានសេរីភាព លុះពេលចេញមកវិញ លោកក៏ទៅសុំដីដដែលនេះស្នាក់នៅនិងដាំដំណាំអាស្រ័យផលបន្តទៀតរហូតដល់ព្រឹកថ្ងៃទី៣ មីនា នេះ ក៏ត្រូវគេដេញចាប់បន្តទៀត ។ លោកនិយាយថាកាំបិតពូថៅ និងសម្ភារប្រើប្រាស់មួយចំនួន មាន់ពង់ក្នុងសម្បុក ម្ហូបអាហារ ត្រូវបានមន្រ្តីបរិស្ថានយកអស់ពីក្នុងខ្ទម ហើយក៏នាំគ្នារុះរើផ្ទះរបស់គាត់ចោលដោយគ្មានក្តីមេត្តាឡើយ ។ ពេលនេះពួកគាត់មិនដឹងជាទៅរស់នៅទីណានោះទេ ព្រោះគ្មានដី១ដុំនឹងគេសោះ ។ ចំណែកស្រ្តីពីរនាក់ និងក្មេងស្រីម្នាក់ត្រូវគេចាប់យកទៅទីស្នាក់ការតំបន់ច្រើនយ៉ាងសំឡូត ដោយឱ្យធ្វើកិច្ចសន្យាឈប់រស់នៅលើដីនេះបន្តទៀត ។
លោកហែម ហ៊ីម មេភូមិក្រចាប់បានរៀបរាប់ឱ្យដឹងថា ប្រជាពលរដ្ឋរបស់គាត់ជាង១០គ្រួសារ ដែលរស់នៅលើដីតំបន់អភិរក្សត្រូវមន្រ្តី អភិរក្សសត្វព្រៃ និងមន្រ្តីបរិស្ថានមានគ្នាប្រហែល៣០នាក់ ចុះទៅដេញចាប់ និងរុះរើបំផ្លាញខ្ទមស្នាក់នៅរបស់ពួកគេ ដោយចោទពីបទរុករានដុតបំផ្លាញព្រៃឈើក្នុងតំបន់ហាមឃាត់ ។ លោកបានបន្តទៀតថា ប្រជាពលរដ្ឋទាំងអស់ខាងលើរស់នៅលើដីនេះជាច្រើនឆ្នាំមកហើយ តែពួកគេអត់បានរុករានដីបន្តនោះទេគ្រាន់តែអាស្រ័យផលនៅលើដីវាលៗ ក្នុងម្នាក់ៗមានដីប្រហែលកន្លះហិកតា ដាំពោត និងដំឡូងមី គ្រាន់បានលក់ចិញ្ចឹមជីវិតប៉ុណ្ណោះ ។ ខណៈដែលមន្រ្តីចុះទៅធ្វើសកម្មភាពរុះរើ និងដេញចាប់ប្រជាពលរដ្ឋទាំងនេះ ពួកគេអត់បានជូនដំណឹងដល់លោកជាអាជ្ញាធរភូមិ និងប្រាប់ប្រជាពលរដ្ឋឱ្យចេញជាមុននោះទេ គឺដឹកនាំកម្លាំងស្ងាត់ៗ ចុះទៅធ្វើសកម្មភាពដេញតែម្តង ។ លោកមេភូមិបានបញ្ជាក់ទៀតថា ភាគច្រើនមន្រ្តីទាំងនេះជាបុគ្គលិកបណ្តែតដែលត្រូវគេរើសចេញពីភូមិភ្នំដំបងឱ្យការពារព្រៃឈើនៅតំបន់នោះ ។ តែគួរឱ្យស្តាយបើសិនជាយើងចុះទៅពិនិត្យព្រៃតំបន់ការពារភ្នំដំបងនេះជាក់ស្តែងនឹងភ្នែកវិញឃើញថា ត្រូវគេយកម៉ាស៊ីនត្រង់ស៊ីន័រកាប់និងដុតបំផ្លាញយកដីធ្វើចម្ការ និងសង់លំនៅឋានថ្មីៗជាច្រើនខ្នងថែមទៀតវាលអស់ទៅហើយ គឺស្ថិតនៅតំបន់អូរល្វាជ្រាំ ភូមិភ្នំដំបង សង្កាត់អូរតាវ៉ៅ សូម្បីតែលោកឡុង វុទ្ធី ដែលមេភូមិភ្នំដំបងក៏មានផ្ទះ១ខ្នងនៅក្នុងដីតំបន់អភិរក្សនេះដែរ ហើយមិនឃើញទៅរុះរើ ឬបង្ក្រាបនោះឡើយ ។
លោកស៊ីវ សាំ អាយុ៤៦ឆ្នាំ ជាអនុភូមិក្រចាប់បានបង្ហើបឱ្យដឹងតាមទូរស័ព្ទថា រហូតមកដល់រសៀលថ្ងៃទី៤ មីនា នេះស្រ្តីរងគ្រោះទាំងពីរនាក់ និងក្មេងស្រីតូចម្នាក់ត្រូវដោះលែងឱ្យមានសេរីភាពវិញ ដោយគ្រាន់តែឱ្យពួកគេផ្តិតមេដៃធ្វើកិច្ចសន្យាឈប់ទៅរស់នៅលើដីអភិរក្សនេះតទៅទៀត ។ លោកបានបន្តទៀតថា ដោយសារប្រជាពលរដ្ឋទាំងនេះអត់មានដីធ្លីរស់នៅ មិនដឹងជាខាងលោកទៅរកកន្លែងឯណាឱ្យពួកគេសង់ផ្ទះស្នាក់នៅបណ្តោះអាសន្ននោះទេ ។ ទាក់ទិនទៅនឹងបញ្ហានេះខាងលោកមានតែជម្រាបដល់អាជ្ញាធរខេត្ត ឱ្យជ្រាបជាព័ត៌មាន ដើម្បីជួយរកវិធីដោះស្រាយជូនពួកគេតែប៉ុណ្ណោះ ។ លោក ស្រី រ៉ា ជាមន្រ្តីអនុរក្សបានឆ្លើយតបតាមទូរស័ព្ទ ខណៈអ្នកយកព័ត៌មានសុំសម្ភាសន៍បានឱ្យដឹងថា បើចង់ចូលជួបនៅទីស្នាក់ការដើម្បីយកព័ត៌មាននោះ ខាងលោកមិនអនុញ្ញាតឱ្យចូលនោះទេ ទាល់តែទាក់ទងទៅមេខាងមន្រ្តីបរិស្ថានជាមុនសិន ព្រោះខាងលោកធ្វើអ្វីតាមបញ្ជាប៉ុណ្ណោះ ។ ចំណែកការចាប់ឃាត់ខ្លួនស្រ្តីទាំងនេះវិញ គឺលោកទទួលបញ្ជាពីថ្នាក់លើដែរ ដើម្បីចាប់យកពួកគេទៅអប់រំណែនាំឈប់ឱ្យបន្តរស់នៅលើដីអភិរក្សនេះតទៅទៀត ៕
ចែករំលែកព័តមាននេះ