រាជធានីភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានមានប្រសាសន៏ថា ការចូលរួមរបស់វិស័យឯកជនជាមួយរាជរដ្ឋាភិបាលមានភាពចំាបាច់ណាស់ ដើម្បីកម្ពុជាអាចត្រៀមខ្លួនចូលទៅក្នុងសហគមន៏សេដ្ឋកិច្ចអាស៊ានឆ្នាំ២០១៥ខាងមុខនេះ ។ សម្តេចបន្តថា សកម្មភាពកម្ពុជាឆ្ពោះទៅសហគមន៏អាស៊ានឆ្នាំ២០១៥ ប្រៀបដូចជាសកម្មភាពប្រណំាងទូកងយ៉ាងដូច្នេះដែរ ដែលចំាបាច់អ្នកអុំ ត្រូវតែអុំឲ្យស្រុះគ្នា ហើយអ្នកកាច់ចង្កូតត្រូវតម្រង់ទិសឲ្យត្រង់ ហើយថាថ្វីត្បិតតែរាជរដ្ឋាភិបាលជាអ្នកកាច់ចង្កូតនៅកន្សៃ ក៏ប៉ុន្តែការចង្អុរបង្ហាញទិសរបស់វិស័យឯកជនដែលជាអ្នកអុំនៅផ្នែកខាងមុខ ពិតជាមានសារៈសំខាន់ ។
សម្តេចនាយករដ្ឋមន្រ្តី ហ៊ុន សែន ថ្លែងបែបនេះបានធ្វើឡើងនៅព្រឹកថ្ងៃទី០៤ មីនា ២០១៤ ក្នុងឱកាសដែលសម្តេចតេជោបានអញ្ជើញជាអធិបតីភាពដ៏ខ្ពង់ខ្ពស់បើកវេទិការាជរដ្ឋាភិបាលជាមួយវិស័យឯកជនលើកទី១៧ ក្រោមប្រធានបទ ” សហគមន៏សេដ្ឋកិច្ចអាស៊ានឆ្នាំ២០១៥ កាលានុវត្តភាព និងការប្រឈមចំពោះកម្ពុជា ” នៅវិមានសន្តិភាពទីស្តីការនាយករដ្ឋមន្រ្តី ។
ក្នុងឱកាសនោះដែរសម្តេចតេជោ បានបញ្ជាក់ឲ្យដឹងទៀតថា រាជរដ្ឋាភិបាលកម្ពុជាពុំមានគោលការណ៏បង្កើតបន្ទុកពន្ឋថ្មី ឬ ដំឡើងពន្ឋបន្ថែមដល់ប្រជាជន និង ធុរជនក្នុងគោលដៅបង្កើនចំណូលថវិកាជាតិនោះទេ ។ ពោលគឺរាជរដ្ឋាភិបាល នឹងផ្តោតលើភាពពង្រឹងការអនុវត្តគោលនយោបាយនិងច្បាប់ដែលមានស្រាប់ តាមរយៈការអនុវត្តវិធានការយ៉ាងម៉ឺងម៉ាត់ និងមុតស្រួច ទំាងតាមវិធានការរដ្ឋបាល និង វិធានការគោលនយោបាយទំាងសម្រាប់រយៈពេលខ្លី មធ្យម និង វែង ។ ជាពិសេសការលើកកម្ពស់វប្បធ៌មបង់ពន្ឋ ការបង្រ្កាបអំពើរត់ពន្ឋ និងការគេចវេសពន្ឋគ្រប់រូបភាពឲ្យដល់ប្ញសគល់ ព្រមទំាងការកែលំអអភិបាលកិច្ចក្នុងការប្រមូលចំណូលទំាងផ្នែកគយ និង ផ្នែកពន្ឋដារ ។
ទន្ទឹមនឹងនេះ វិស័យឯកជនត្រូវតែបន្តខិតខំកសាងនិងអភិវឌ្ឍន៏សមត្ថភាពរបស់ខ្លួន ហើយត្រូវបោះបង់ចោលនូវទម្លាប់ចាស់ ដែលកន្លងមកតែងតែស្នើសុំការលើកទឹកចិត្តផ្នែកពន្ឋដារពីរដ្ឋមិនចេះឈប់នេះចេញ ហើយជំនួសមកវិញការផ្តល់នូវព័ត៌មាន និងអនុសាសន៏នានាជូនរាជរដ្ឋាភិបាល ពិសេសពាក់ព័ន្ឋនឹងការដោះស្រាយបញ្ហាប្រឈមនានា និង ចាប់យកឱកាសល្អៗដែលកើតចេញពីសមាហរណកម្មសេដ្ឋកិច្ចអាស៊ានឆ្នាំ២០១៥ ព្រមទំាងពង្រីកភាពប្រកួតប្រជែងរបស់កម្ពុជាទៅក្នុងក្របខណ្ឌតំបន់ និង ពិភពលោក ៕
ចែករំលែកព័តមាននេះ