រាជធានីភ្នំពេញ ៖ សមត្ថកិច្ចប្រដាប់អាវុធ២នាក់ ម្នាក់ត្រូវគេស្គាល់ថា ជាមន្ត្រីកងរាជអាវុធហត្ថនៅទីបញ្ជាការខេត្តកណ្តាល និងម្នាក់ទៀតជាមន្ត្រីយោធានៅកងយោធភូមិភាគពិសេសបានប្រទូស្តរ៉ាយដាក់គ្នាបណ្តាលឱ្យជ្រុះកាំភ្លើងខ្លីនៅលើថ្នល់ដោយសាររឿងជិះម៉ូតូលឿនតាមផ្លូវសាធារណៈ បង្កឱ្យមានការភ្ញាក់ផ្អើល កាលពីវេលាម៉ោង១០យប់ ថ្ងៃទី៣ មីនា ២០១៤ នៅចំណុចផ្លូវ២៧៨ កែងផ្លូវមុនីវង្ស ស្ថិតក្នុងសង្កាត់បឹងកេងកងទី១ ខណ្ឌចំការមន ។
ក្នុងហេតុការណ៍ខាងលើនេះ នគរបាលប៉ុស្តិ៍បឹងកេងកងទី១ដឹកនាំដោយលោកគល់ សុផាត នាយនគរបាលប៉ុស្តិ៍ និងមន្ត្រីកងរាជអាវុធហត្ថខណ្ឌចំការមនបានចុះអន្តរាគមន៍ឃាត់ខ្លួនមន្ត្រីយោធា និងមន្ត្រីកងរាជអាវុធហត្ថទាំង២រូប រួមជាមួយអាវុធខ្លីមួយដើមម៉ាកK54 នាំទៅកាន់ទីបញ្ជាការកងរាជអាវុធហត្ថខណ្ឌចំការមនដើម្បីសួរនាំពីរឿងហេតុដែលបង្កការប្រទូស្តរ៉ាយគ្នាតាមផ្លូវសាធារណៈរហូតមានជ្រុះអាវុធខ្លីបង្កការភ្ញាក់ផ្អើលដល់អ្នកដំណើរ។
ក្រោយការសួរនាំសមត្ថកិច្ចបានឱ្យដឹងថា អាវុធខ្លីដែលជ្រុះនៅលើដងផ្លូវនោះជារបស់ឈ្មោះនិល វុទ្ធី ភេទប្រុស អាយុ៣១ឆ្នាំ ជាមន្ត្រីកងរាជអាវុធហត្ថខេត្តកណ្តាល រីឯមន្ត្រីយោធាឈ្មោះខាំ ប៉ូរ៉ាស៊ី ភេទប្រុស អាយុ៤៩ឆ្នាំ បម្រើការនៅអង្គភាពភូមិភាគពិសេស ហើយពួកគេទាំង២នាក់ស្រវឹងស្រាដូចគ្នា។ មុនមានទំនាស់គ្នាឈ្មោះនិល វុទ្ធី បានជិះម៉ូតូម៉ាកស្មាស ពណ៌ក្រហម ពាក់ស្លាកលេខភ្នំពេញ១AX៥៨៥៥ ធ្វើដំណើរតាមបណ្តោយផ្លូវព្រះមុនីវង្សក្នុងទិសដៅពីត្បូងទៅជើងក្នុងល្បឿនលឿន ខណៈនោះឈ្មោះខាំ ប៉ូរ៉ាស៊ី បានជិះម៉ូតូម៉ាកណៃហតពណ៌ខ្មៅ ពាក់ស្លាកលេខភ្នំពេញ១BV៤៦៣៩ ធ្វើដំណើរស្របទិសគ្នាស្រែកដាក់ឈ្មោះនិល វុទ្ធី ថា ឯងជាចោរទេឬ បានជាជិះម៉ូតូលឿនយ៉ាងនេះ។
ផ្ទើមចេញពីពាក្យមួយម៉ាត់នេះ ក៏កើតជាទំនាស់រហូតភាគីទាំង២បានជិះម៉ូតូដេញគ្នាដល់ចំណុចកើតហេតុខាងលើឈ្មោះនិល វុទ្ធី បានដួលម៉ូតូ ហើយជ្រុះកាំភ្លើងខ្លីពីចង្កេះរួចក៏កើតការប្រទូស្តរ៉ាយគ្នាមួយប្រាវតែម្តង។
បន្ទាប់ពីសមត្ថកិច្ចសួរនាំដឹងដំណើររឿងរួចហើយ និងមិនមានហិង្សាអ្វីកើតឡើងធ្ងន់ធ្ងរ មន្ត្រីកងរាជអាវុធហត្ថខណ្ឌចំការមនបានអប់រំភាគីទាំង២ហើយអនុញ្ញាតឱ្យត្រឡប់ទៅផ្ទះវិញ និងបំពេញការងាររៀងៗខ្លួន៕
ចែករំលែកព័តមាននេះ