ខេត្តបាត់ដំបង ៖ សំណង់អគារមហាកុដិដ៏ធំសម្បើមមួយខ្នងដែលក្រុមជាងកំពុងសាងសង់ កំពុងធ្វើឱ្យ
ពុទ្ធបរិស័ទ និងអ្នកជំនាញមួយចំនួន មានក្ដីបារម្ភយ៉ាងខ្លាំងអំពី«គុណភាព»ដោយសារតែគេពិនិត្យឃើញ ជាក់ស្ដែងនូវផ្នែកខ្លះនៃសំណង់នេះ ធ្វើឡើងហាក់មិនត្រឹងត្រូវតាមបច្ចេកទេស និងមានភាពខ្ជីខ្ជាដែលផ្ដើមចេញពីការមិនយកចិត្តទុកដាក់របស់ក្រុមជាងទាំងនោះ ។ សំណង់អគារមហាកុដិដ៏ធំមួយនេះ មានទីតាំងនៅក្នុង«វត្តពោធិវង្ស» ស្ថិតក្នុងភូមិសង្កាត់ចំការសំរោង ក្រុងបាត់ដំបង ។
បើពិនិត្យលើគម្រោងនៃសំណង់មហាកុដិនេះ ធ្វើអំពីថ្មកម្ពស់២ជាន់ផ្ទាល់ដី មានទំហំ១៤,២ម៉ x ១៩,៨ម៉ ដែលមានបន្ទប់សរុបចំនួន២៤ ។ បច្ចុប្បន្នអគារនេះ សាងសង់បានប្រហែល៥០%ហើយ និងកំពុងសាងសង់បន្ត ក្រោមការព្រួយបារម្ភយ៉ាងខ្លាំងសំណាក់ព្រះសង្ឃ និងពុទ្ធបរិស័ទនានាអំពីបញ្ហា«គុណភាព» ដែលគេមើលឃើញថា ផ្នែកខ្លះនៃសំណង់នេះហាក់ធ្វើឡើងមិនត្រិមត្រូវតាមលក្ខណៈបច្ចេកទេស។
ពាក់ព័ន្ឌបញ្ហាបច្ចេកទេសនៃសំណង់នេះ ពុទ្ធបរិស័ទមួយចំនួនដែលបានពិនិត្យលើសំណង់អគារនេះ បានលើកឡើងថា មានចំណុចខ្លះ នៃសំណង់មហាកុដិនេះ ហាក់សាងសង់ឡើងដោយមិនស្របទៅនឹងបច្ចេកទេស ។ ចំណុចទាំងនោះមានដូចជា « ចាក់បណ្ដុះសសរមិនត្រង់ សសរ១ដើមចាក់តពី២ទៅ៣កំណាត់ ធ្នឹមខ្លះមានការចាក់ជួសមុខតំណរ និងកន្លែងខ្លះមានសភាពវៀចប៉ោង» ដែលពិនិត្យមើលទៅហាក់ដូចក្មេងធ្វើលេង និងដូចគ្មានភាពរឹងម៉ាំទៅតាមលក្ខណៈបច្ចេកទេស និងខ្ជីខ្ជាមិនយកចិត្តទុកដាក់សោះ ។ ប្រភពដដែលបានបញ្ជាក់ថា សសរខាងក្រោម និងសសរខាងលើផ្នែកខាងមុខនៃអគារនេះវៀចមិនស្របគ្នា និង មានទំហំមិនស្មើគ្នា ដែលមើលទៅគួរឱ្យបារម្ភបំផុតពីគុណភាព ។
ជុំវិញក្ដីបារម្ភអំពីសំណង់អគារមហាកុដិនេះ កោះសន្តិភាពមិនអាចស្វែងរកការទំនាក់ទំនងពីមេជាងសំណង់នេះ ដើម្បីបំភ្លឺបានទេ កាលពីរសៀលថ្ងៃទី២៣ សីហា ។ ដោយឡែក ប្រធានគណៈកម្មការវត្តពោធិវង្ស លោកខឹម ចាន់ ហៅ ប៉ាត បានប្រាប់កោះសន្តិភាពដែរ តាមទូរស័ព្ទនៅថ្ងៃដដែលនេះ តែហាក់មានការស្ទាក់ស្ទើរ និងមិនច្បាស់លាស់ លើដំណើរការសាងសង់សំណង់អគារមហាកុដិនេះ ។
ឆ្លើយនឹងសំណួរដំបូង លោកខឹម ចាន់ បានប្រាប់ថា លោកមិនដែលបានទៅពិនិត្យសំណង់មហាកុដិនេះទេ។ ប៉ុន្តែបន្តិចក្រោយមក លោកគណៈកម្មការវត្តរូបនេះ បែរជាផ្ដល់ចម្លើយផ្ទុយទៅវិញថា «ខ្ញុំតែងទៅពិនិត្យមើលការសាងសង់សំណង់នេះស្ទើររាល់ថ្ងៃ ហើយមិនមានចំណុចណាមួយ ដែលជាងធ្វើខុសបច្ចេកទេសទេ រីឯសសរក៏គ្មានវៀចឬចាក់ត២ឬ៣ដំណរស្អីដែរ ។ តើអ្នកណាជាអ្នកផ្ដល់ព័ត៌មាននេះ ទៅកោះសន្តិភាព.? »។
លោកខឹម ចាន់ ហៅ ប៉ាត មិនបានបំភ្លឺក្បោះក្បាយទេ នៅពេលសួរនាំបន្ត ហើយលោកបានប្រគេនទូរស័ព្ទទៅលោកគ្រូចៅអធិការវត្ត ព្រះនាម ភុំ ពេជ្រសាវង្ស ដើម្បីឲ្យព្រះអង្គជួយបកស្រាយជំនួស ។ ព្រះតេជគុណ ភុំ ពេជ្រសាវង្ស បានមានសង្ឃដីកាបំភ្លឺតបទៅនឹងការលើកឡើងរបស់ពុទ្ធបរិស័ទយ៉ាងដូច្នេះថា
«អាត្មាតែងតាមដានពិនិត្យមើលដំណើរការសាងសង់នេះរាល់ថ្ងៃ ។ អាត្មាមើលមិនឃើញថា ការសាងសង់នោះ ខុសបច្ចេកទេសត្រង់ណាទេ ។
ព្រោះអ្វីៗសុទ្ធតែបានធ្វើតាមប្លង់ ដែលវិស្វករគូសឲ្យទាំងអស់» ។ ប៉ុន្តែនៅពេលលើកជាសំណួរថា ពុទ្ធ បរិស័ទខ្លះបានប្រាប់ថា សសរខ្លះនៃអគារនោះ ត្រូវបានជាងចាក់បណ្ដុះឡើងតគ្នាពី២ ទៅ៣ដំណរក្នុង១ដើម ។ រីឯធ្នឹមខ្លះចាក់វៀចឬប៉ោង ខណៈកន្លែងខ្លះទៀតចាក់ជួសមុខគ្នា ដែលមើលទៅ ហាក់មិនមានភាពរឹងមាំ ត្រឹមត្រូវតាមបច្ចេកទេសទេ..! តើព្រះអង្គបានពិនិត្យឃើញមានដូច្នេះដែរទេ.? ព្រះតេជគុណ ភុំ ពេជ្រសាវង្ស បានមានសង្ឃដីកាតបថា « អាត្មាបានឃើញថា ពិតជាមានបែបនេះមែន តែមិនមានបញ្ហាអ្វីទេ »។
ព្រះអង្គបានបកស្រាយបែបនេះថា «សសរដែលចាក់តគ្នាពី២ ទៅ៣តំណរក្នុង១ដើមនោះ ដោយសារតែជាងខ្វះក្ដារពុម្ព ទើបមើលទៅមិនសមរម្យបែបនេះ ។ ប៉ុន្តែសសរទាំងនោះ មានភាពរឹងមាំល្អទេ ពេលជាងបូកស៊ីម៉ង់ត៍ទៅ គឺវាត្រង់ស្មើល្អវិញហើយ» ។ ព្រះអង្គបានបញ្ជាក់ថា ព្រះអង្គតែងតាមត្រូតពិនិត្យក្រុមជាងរាល់ថ្ងៃ ត្រូវធ្វើតាមប្លង់ ឬគម្រោងដែលវិស្វករគូសឲ្យ។ ព្រះអង្គមិនបានម៉ៅការសំណង់នេះ ផ្ដាច់ទៅឲ្យជាងធ្វើទេ គឺក្រុមជាងធ្វើការគិតកម្រៃមួយថ្ងៃៗតែប៉ុណ្ណោះ ។
ដូច្នេះ ព្រះអង្គត្រូវចុះពិនិត្យរាល់ពេលជាងធ្វើការ ។ ព្រះអង្គបានបន្ថែមថា សរសរមួយដើមៗមានភាពរឹងមាំល្អ ព្រោះព្រះអង្គបានប្រាប់ឱ្យជាងចាក់ទំហំធំជាងគម្រោងប្លង់។ រីឯគ្រឹះបាតក្រោម ក៏ព្រះអង្គឲ្យបុកបង្គោលគ្រឹះលើលពីគម្រោងប្លង់ដែរ ដើម្បីចៀសវាងការស្រុត ឬបាក់ដោយយថាហេតុ ។ ប៉ុន្តែយ៉ាងណាក្ដី ជាចុងក្រោយព្រះតេជគុណ ភុំ ពេជ្រសាវង្ស ហាក់បានស្ដីបន្ទោសខ្លះៗទៅលើក្រុមជាង ដែលខ្ជីខ្ជារមិនយកចិត្តទុកដាក់ ទើបធ្វើឲ្យសសរមេតុងឬធ្នឹមមានសភាពវៀចវ៉ចអាក្រក់មើលនេះ ។
ប៉ុន្តែផ្ទុយពីការពន្យល់របស់លោកគ្រូចៅអធិការវត្ត បើតាមមេជាងសំណង់ម្នាក់ ដែលមានបទពិសោធន៍ក្នុងការងារនេះ បានធ្វើការសន្និដ្ឋានតាមរយៈការពិនិត្យលើរូបភាពទាំងស្រុងនៃសំណង់មហាកុដិនេះ បានប្រាប់ថា «ខ្ញុំមិនបានដឹងថា តើសសរដែលមានតំណរកំណិតកំណាត់ និងមានសភាពវៀចវ៉ចទាំងនេះ ត្រូវគេបណ្ដុះដែកត្រឹមត្រូវតាមស្ដង់ដាដែរឬអត់នោះទេ ព្រោះគេបានចាក់បណ្ដុះឡើងជាសសររួចរាល់ហើយ។ ប៉ុន្តែបើមិនត្រឹមត្រូវទេ វានឹងអាចមានបញ្ហាទៅថ្ងៃក្រោយ តែបើមានបណ្ដុះដែកត្រិមត្រូវវាមិនមានបញ្ហាទេ»។
អ្នកជំនាញផ្នែកសំណង់រូបនេះបានលើកឡើងថា ជាធម្មតាសសរសំណង់មេតុង គេត្រូវធ្វើឡើងយ៉ាងប្រុងប្រយ័ត្នបំផុត គេមិនត្រូវធ្វើកំណិតកំណាត់បែបនេះទេ ហើយធ្នឹមក៏មិនត្រូវចាក់ជួសមុខគ្នាបែបនេះដែរ។ បើចាក់ជួសមុខគ្នាបែបនេះ បានន័យថា តំណរដែកមិនជាប់គ្នាទេ ហើយវាអាចនឹងមានបញ្ហានៅថ្ងៃក្រោយ។ ចំណែកឯការបូកស៊ីម៉ង់ត៏លើសរសរឬធ្នឹមឲ្យស្មើល្អ ក៏មិនអាចធ្វើឲ្យសរសរឬធ្នឹមរឹងម៉ាំដែរ វាគ្រាន់តែ
ធ្វើឱ្យស្មើស្អាតតែប៉ុណ្ណោះ។
ទោះយ៉ាងណា ជុំវិញបញ្ហានានានៃសំណង់មហាកុដិខាងលើនេះ ទាំងពុទ្ធបរិស័ទ ទាំងអ្នកជំនាញខាងសំណង់មួយចំនួន នៅតែបង្ហាញពីក្ដីបារម្ភអំពី«គុណភាព» និងបានស្នើឲ្យមានការត្រូតពិនិត្យឡើងវិញ ពីមន្ត្រីជំនាញ ដើម្បីចៀសវាងកុំឲ្យមានបញ្ហាធ្ងន់ធ្ងរទៅថ្ងៃក្រោយ ដែលអាចឈានដល់បង្កឲ្យមានមហន្តរាយដូចសំណង់នានានៅខេត្តព្រះស៊ីហនុ ដែលជាឧទាហរណ៍ស្រាប់ ។ (សម្រួលដោយ៖ ស្រីណា)
ចែករំលែកព័តមាននេះ