រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលបានចេញផ្សាយកាលពីថ្ងៃទី១ មីនា ឱ្យដឹងថា គណបក្សប្រជាជនកម្ពុជា ដាក់បេក្ខភាពឈរឈ្មោះបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ច្រើនជាងគេ ក្នុងរយៈពីរថ្ងៃដំបូងដែលគណៈកម្មាធិការជាតិរៀបចំការបោះឆ្នោតចាប់ផ្តើមទទួលពាក្យ ។
នៅថ្ងៃទី២៧ និង២៨ កុម្ភៈ មានគណបក្សចំនួន៣ដែលចុះឈ្មោះប្រកួតប្រជែងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺគណបក្សប្រជាជនកម្ពុជា គណបក្សសង្គ្រោះជាតិ និងគណបក្សហ្វុនស៊ិនប៉ិច ។ នៅក្នុងចំណោមគណបក្សទាំង៣នេះ គណបក្សប្រជាជនកម្ពុជាដាក់បេក្ខភាពរបស់ខ្លួនបានច្រើនជាងគេ គឺបានចំនួន២៣មណ្ឌលរាជធានី-ខេត្ត និង១៨៨មណ្ឌល ក្រុង ស្រុក ខណ្ឌ ។ ចំណែកគណបក្សសង្គ្រោះជាតិ ដាក់បាន៨មណ្ឌលរាជធានី ខេត្ត និង២៦មណ្ឌល ក្រុង ស្រុក ខណ្ឌ និងគណបក្សហ្វុ៊នស៊ិនប៉ិច ដាក់បាន១មណ្ឌល ក្រុង ស្រុក ខណ្ឌ ។ គណៈកម្មាធិការជាតិរៀបចំការបោះឆ្នោត ចាប់ផ្តើមចុះឈ្មោះគណបក្សនយោបាយ និងបេក្ខជនឈរឈ្មោះពីថ្ងៃទី២៧ កុម្ភៈ ដល់ថ្ងៃទី៣ មីនា ឆ្នាំ២០១៤ ។
គួររំលឹកថា គណៈកម្មាធិការជាតិរៀបចំការបោះឆ្នោត កាលពីថ្ងៃទី១៧ មករា ឆ្នាំ២០១៤ បានចេញផ្សាយចំនួនសមាជិកក្រុមប្រឹក្សារាជធានី ខេត្ត និងចំនួនសមាជិកក្រុមប្រឹក្សាក្រុង ស្រុក ខណ្ឌ សម្រាប់អាណត្តិទី២ ដែលនឹងត្រូវរៀបចំការបោះឆ្នោតនៅថ្ងៃទី១៨ ឧសភា ខាងមុខ ។ គ.ជ.ប បញ្ជាក់ថា យោងតាមអនុក្រឹត្យស្តីពីការកំណត់ចំនួនសមាជិកក្រុមប្រឹក្សារាជធានី ខេត្ត និងចំនួនសមាជិកក្រុមប្រឹក្សាក្រុង ស្រុក ខណ្ឌ សម្រាប់អាណត្តិទី២ លេខ២២ អនក្រ.បក ចុះថ្ងៃទី១៥ មករា ឆ្នាំ២០១៤ សមាជិកក្រុមប្រឹក្សាសរុបមានចំនួន៣.៣២៤នាក់ ។ គណៈកម្មាធិការរៀបចំការបោះឆ្នោត (គ.ជ.ប) បន្តថា ក្នុងចំណោមចំនួនសមាជិកក្រុមប្រឹក្សាទាំងអស់ខាងលើនេះ ចំនួនក្រុមប្រឹក្សារាជធានី-ខេត្ត សរុបចំនួន៣៩៣នាក់ និងចំនួនសមាជិកក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ សរុបមានចំនួន២.៩២១នាក់ ។ រាជធានី-ខេត្ត ដែលមានចំនួនសមាជិកក្រុមប្រឹក្សាចំនួន២១រូប គឺរាជធានីភ្នំពេញ ខេត្តកណ្តាល និងខេត្តកំពង់ចាម ។ ខេត្តដែលមានចំនួនសមាជិកក្រុមប្រឹក្សាចំនួន១៩រូបគឺខេត្តបាត់ដំបង ខេត្តព្រៃវែង ខេត្តសៀមរាប ខេត្តតាកែវ និងខេត្តត្បូងឃ្មុំ ។
ខេត្តមានក្រុមប្រឹក្សាចំនួន១៧រូបគឺ បន្ទាយមានជ័យ កំពង់ស្ពឺ កំពង់ធំ និងខេត្តកំពត ។ ខេត្តដែលមានចំនួនក្រុមប្រឹក្សាចំនួន១៥រូបគឺ កំពង់ឆ្នាំង ស្វាយរៀង ពោធិ៍សាត់ ក្រចេះ និងខេត្តព្រះសីហនុ ។ ខេត្តមានសមាជិកក្រុមប្រឹក្សា១៣រូបគឺ កោះកុង ព្រះវិហារ រតនគិរី ស្ទឹងត្រែង និងខេត្តឧត្តរមានជ័យ ។ ខេត្តដែលមានសមាជិកក្រុមប្រឹក្សាចំនួន៩រូបគឺ ប៉ៃលិន មណ្ឌលគិរី និងខេត្តកែប ។ រីឯក្រុមប្រឹក្សាក្រុង ស្រុក ខណ្ឌ នីមួយៗមានចំនួនសមាជិកច្រើនបំផុតត្រឹមតែ១៩រូប និងតិចបំផុត៧រូប ។ សូមរំលឹកថា កាលពីមុនរាជធានី ខេត្ត មានចំនួន២៤ និងក្រុង ស្រុក ខណ្ឌ មានចំនួន១៩៤ បច្ចុប្បន្នរាជធានី-ខេត្ត មានចំនួន២៥ និងក្រុង ស្រុក ខណ្ឌ មានចំនួន១៩៧រូប ។ កាលពីខែវិច្ឆិកា ឆ្នាំ២០១៣ គ.ជ.ប ក៏បានចេញសេចក្តីប្រកាសព័ត៌មានមួយបញ្ជាក់ថា កាលបរិច្ឆេទក្នុងការបោះឆ្នោតជ្រើសរើសក្រុមប្រឹក្សាខេត្ត រាជធានី និងក្រុង ស្រុក ខណ្ឌ អាណត្តិទី២ នឹងប្រព្រឹត្តទៅនៅថ្ងៃទី១៨ ឧសភា ឆ្នាំ២០១៤ ខាងមុខ ។
តាមច្បាប់បោះឆ្នោតជ្រើសរើសក្រុមប្រឹក្សាខេត្ត រាជធានី និងក្រុង ស្រុក ខណ្ឌ មាត្រា២បានចែងថា ក្រុមប្រឹក្សាមានអាណត្តិ៥ឆ្នាំ ហើយផុតអាណត្តិនៅពេលក្រុមប្រឹក្សាថ្មីចូលកាន់តំណែង ។ ការបោះឆ្នោតអាណត្តិទី១ ដើម្បីជ្រើសរើសក្រុមប្រឹក្សារាជធានីខេត្ត និងក្រុង ស្រុក ខណ្ឌ ប្រព្រឹត្តទៅកាលពីថ្ងៃទី១៧ ឧសភា ឆ្នាំ២០០៩ និងមានគណបក្សនយោបាយចំនួន៥បានចូលរួមក្នុងការបោះឆ្នោតនៅពេលនោះ ៕
ចែករំលែកព័តមាននេះ