រាជធានីភ្នំពេញ ៖ ខណៈពេលសាលារាជធានីភ្នំពេញ កំពុងប្រគល់ប័ណ្ណកម្មសិទ្ធិដីធ្លីនៅនឹងកន្លែងដល់អ្នកភូមិបឹងកក់ចំនួន១៧គ្រួសារ បែរជាសកម្មជនមកពីសហគមន៍បុរីកីឡា សហគមន៍ថ្មគោល និងបឹងកក់ នាំមុខដោយអ្នកស្រីទេព វន្នី និងមានការចូលរួមជាមួយអង្គការក្រៅរដ្ឋាភិបាលមួយចំនួន មានព្រះសង្ឃខ្លះ
រាជធានីភ្នំពេញ ៖ ខណៈពេលសាលារាជធានីភ្នំពេញ កំពុងប្រគល់ប័ណ្ណកម្មសិទ្ធិដីធ្លីនៅនឹងកន្លែងដល់អ្នកភូមិបឹងកក់ចំនួន១៧គ្រួសារ បែរជាសកម្មជនមកពីសហគមន៍បុរីកីឡា សហគមន៍ថ្មគោល និងបឹងកក់ នាំមុខដោយអ្នកស្រីទេព វន្នី និងមានការចូលរួមជាមួយអង្គការក្រៅរដ្ឋាភិបាលមួយចំនួន មានព្រះសង្ឃខ្លះ និងអ្នកចូលរួមស្ថិតក្នុងសម្លៀកបំពាក់ស អាវស ប្រមាណជា៦០នាក់ បាននាំគ្នាដង្ហែក្បួនតាមបែបសាសនាឆ្ពោះទៅកាន់តុលាការកំពូលនាព្រឹកថ្ងៃទី៣ មីនា ដើម្បីទាមទារឱ្យមានការដោះលែងលោកវន់ ពៅ និងអ្នកឯទៀត ដែលកំពុងជាប់នៅមណ្ឌលអប់រំកែប្រែទី៣ ត្រពាំងផ្លុង ខេត្តកំពង់ចាម ដែលជាប់ឃុំ២១នាក់ ។
ក្បួនដង្ហែនេះមិនមានការអនុញ្ញាតពីសាលារាជធានីភ្នំពេញទេ ហើយត្រូវកម្លាំងសមត្ថកិច្ចខណ្ឌដូនពេញដាក់បារ៉ាស់ដែកធ្វើការរារាំងនៅចំណុចកែងវិថីព្រះស៊ីសុវត្ថិ និងផ្លូវលេខ១៧៨ ស្ថិតក្នុងសង្កាត់ជ័យជម្នះ ខណ្ឌដូនពេញ និងមានការប្រទាញប្រទង់គ្នារវាងកម្លាំងសណ្តាប់ធ្នាប់ខណ្ឌដូនពេញ ខណៈពេលសមត្ថកិច្ចដកហូតយកស្គរ និងអាគុយទៅរក្សាទុកនៅសាលាខណ្ឌ ។ នគរបាលខណ្ឌដូនពេញនិយាយថា បន្ទាប់ពីមានការដាក់បារ៉ាស់រារាំងក្រុមអ្នកតវ៉ា មិនឱ្យធ្វើដំណើរទៅកាន់តុលាការកំពូល និងមានការប៉ះទង្គិចគ្នារវាងកម្លាំងសណ្តាប់ធ្នាប់ខណ្ឌដូនពេញរួចមក ក្បួនដង្ហែរបស់សកម្មជនទាំងនោះបានមកប្រមូលផ្តុំគ្នានៅរូបសំណាកតេជោយ៉ត តេជោមាស លើកំណាត់វិថីព្រះស៊ីសុវត្ថិ មុខវត្តឧណ្ណាលោម ហើយធ្វើពិធីបួងសួង និងដុតធូប ដែលម្នាក់ៗមានកាន់ផ្កាឈូក ។
ក្រុមអ្នកតវ៉ាបានអះអាងថា កងកម្លាំងប៉ូលិស និងកម្លាំងសណ្តាប់ធ្នាប់ខណ្ឌបានដាក់បារ៉ាស់រារាំងពួកគេមិនឱ្យជួបជុំនៅមុខតុលាការកំពូលរាជធានីភ្នំពេញទេ ហើយក្រុមអ្នកភូមិបានបង្វែរការជួបជុំនៅមុខវត្តឧណ្ណាលោមជួរមាត់ទន្លេវិញ ឯការជួបជុំលើកនេះមិនមែនគ្រាន់តែជាការស្រែកក្តែងៗ និងដាក់បណ្តាសាដូចលើកមុនទេ បុ៉ន្តែអ្នកតវ៉ានឹងមានរៀបចំពិធីជូនពរដល់មន្ត្រីស្មោះត្រង់ ហើយសម្តែងតួធ្វើជាលោកតាដំបងដែកដាក់ទណ្ឌកម្មលើមន្ត្រីចិត្តអាក្រក់ផងដែរ ។ ពួកគេអះអាងថា ក្រុមអ្នកភូមិធ្វើដោយអហិង្សា បែរជាសមត្ថកិច្ចប្រើហិង្សាដាក់បងប្អូនសហគមន៍បែបនេះ ។ យើងធ្វើបែបនេះដើម្បីរំលឹកថា សំណុំរឿងក្តីសុំនៅក្រៅឃុំរបស់បាតុករ២១នាក់ ដែលមានទាំងលោកវន់ ពៅ កំពុងស្ថិតនៅដៃតុលាការកំពូល ខណៈដែលតុលាការសាលាដំបូងរាជធានីភ្នំពេញ និងតុលាការសាលាឧទ្ធរណ៍ បានសម្រេចជាបន្តបន្ទាប់មិនអនុញ្ញាតឱ្យជនទាំងនោះស្ថិតនៅក្រៅមន្ទីរឃុំឃាំងឡើយ។ មន្ត្រីសាលាខណ្ឌដូនពេញឱ្យដឹងថា សហគមន៍ទាំងបី និងអង្គការក្រៅរដ្ឋាភិបាល រួមទាំងសហជីពមួយចំនួនតូចបានព្យាយាមនាំគ្នាដង្ហែក្បួនគ្មានច្បាប់អនុញ្ញតពីសាលារាជធានីភ្នំពេញម្តងជាពីរដង ហើយពេលនេះត្រូវរារាំងពួកគេមិនឱ្យទៅប្រមូលផ្តុំនៅមុខតុលាការកំពូល បែរជានាំគ្នាធ្វើពិធីនៅមុខរូបសំណាកតេជោយ៉ត តេជោមាស មុខវត្តឧណ្ណាលោម ។ ក្រោយពីចប់ពិធីបួងសួង ក្រុមអ្នកពូកែតវ៉ាបាននាំគ្នាមកសាលាខណ្ឌដូនពេញដើម្បីសុំយកស្គរ និងអាគុយទៅវិញ តែត្រូវបានអាជ្ញាធរឱ្យធ្វើកិច្ចសន្យា រួចពួកគេនាំគ្នារំសាយទៅវិញនៅម៉ោង១និង១០នាទីនារសៀលថ្ងៃដដែល ។
គួររំលឹកថា ជនសង្ស័យចំនួន២៣នាក់ដែលត្រូវបានអាជ្ញាធរមានសមត្ថកិច្ចចាប់ខ្លួននៅកន្លែងផ្សេងពីគ្នា គឺក្រុមលោកវន់ ពៅ រួមទាំងកម្មករសរុបទាំងអស់១០នាក់ត្រូវបានចាប់ខ្លួននៅចំណុចរោងចក្រយ៉ាកជីន ជិតតំបន់សេដ្ឋកិច្ចពិសេសកំបូលកាលពីថ្ងៃទី២ មករា ២០១៤ និង១៣នាក់ផ្សេងទៀតចាប់ខ្លួននៅចំណុចសួនឧស្សាហកម្មកាណាឌីយ៉ា ផ្លូវចោមចៅ កាលពីថ្ងៃទី៣ មករា ២០១៤ ក្នុងអំឡុងពេលមានការតវ៉ាឱ្យដំឡើងប្រាក់ខែកម្មករកាត់ដេរ ។ អ្នកទាំង២៣នាក់ត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តកំពង់ចាម ។ ក្នុងចំណោមអ្នកទាំង២៣នាក់ មាន២នាក់ត្រូវបានសាលាដំបូងរាជធានីភ្នំពេញ សម្រេចដោះលែងឱ្យនៅក្រៅឃុំជាបណ្តោះអាសន្នកាលពីថ្ងៃទី៨ កុម្ភៈ ២០១៤ ។ ហើយកាលពីថ្ងៃទី១១ កុម្ភៈ ២០១៤ វេលាម៉ោង១១និង៣០នាទីព្រឹក សាលាឧទ្ធរណ៍បានសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញនៅដដែល ដោយមិនអនុញ្ញាតឱ្យជនទាំង២១នាក់កំពុងជាប់នៅក្នុងពន្ធនាគារត្រពាំងផ្លុង ខេត្តកំពង់ចាម ស្ថិតនៅក្រៅឃុំជាបណ្តោះអាសន្នតាមការស្នើសុំរបស់មេធាវីជនជាប់ចោទទាំងនោះទេ ៕
ចែករំលែកព័តមាននេះ