រាជធានីភ្នំពេញ ៖ ហេតុការណ៍ភ្ញាក់ផ្អើលមួយបានកើតឡើងនៅតាមដងផ្លូវ ហើយនគរបាលខណ្ឌដង្កោ និងខណ្ឌពោធិ៍សែនជ័យ ក៏បានសហការគ្នាចេញអន្តរាគមន៍ ពួនស្ទាក់ផងដែរ បន្ទាប់ពីបុរសម្នាក់ជិះម៉ូតូ១គ្រឿង ក្នុងល្បឿនយ៉ាងលឿន ដេញតាមម៉ូតូ១គ្រឿងទៀត ដែលកំពុងជិះខាងមុខដោយបុរសម្នាក់ និងមានឌុបស្ត្រីម្នាក់ពីក្រោយ ហើយអ្នកដេញតាមនោះបានស្រែកថាចោរៗ ជាប់មិនដាច់ពីមាត់ទៀតផង ។
ខណៈនោះ ប្រជាពលរដ្ឋមួយចំនួនបានជួយដេញតាម និងមួយចំនួនទៀតត្រៀមដំបង ព្រនង់ប្រុងជើងការ លុះមួយសន្ទុះក្រោយមក ម៉ូតូដែលព្យាយាមបើករត់គេចខ្លួននោះ ត្រូវបានកម្លាំងនគរបាលប៉ុស្តិ៍បឹងធំ ខណ្ឌពោធិ៍សែនជ័យ ឃាត់បាននាំយកទៅសាកសួរ ទើបដឹងថា មិនមែនជារឿងដេញតាមចោរលួច ឬចោរប្លន់នោះឡើយ គឺជារឿងស្នេហាត្រីកោណ ។ បុរសម្នាក់ដែលជិះម៉ូតូដេញតាមពីក្រោយអះអាងថា ខ្លួនបានឃើញប្រពន្ធដែលមិនទាន់លែងលះគ្នាដាច់ស្រេចនៅឡើយ ជិះម៉ូតូជាមួយនឹងបុរសម្នាក់ និងចោទបុរសនោះថាជាសហាយ ។ ពេលនោះខ្លួនក៏ជិះម៉ូតូដេញតាម ប៉ុន្តែដេញមិនទាន់ ទើបស្រែកថាចោរៗ បង្កឱ្យមានការភ្ញាក់ផ្អើល ក្នុងបំណងឱ្យនគរបាល និងប្រជាពលរដ្ឋជួយដេញចាប់ ។ ហេតុការណ៍នេះកើតឡើងកាលពីវេលាម៉ោង៧ និង២០នាទីព្រឹក ថ្ងៃទី២ មីនា នៅតាមផ្លូវវត្តស្លែងបែកចាន ស្ថិតក្នុងភូមិខ្ចៅ សង្កាត់បឹងធំ ខណ្ឌពោធិ៍សែនជ័យ ។ បុរសដែលចោទថា ប្រពន្ធផិតក្បត់នេះឈ្មោះ នូវ សំណាង អាយុ៣៨ឆ្នាំ មុខរបររត់ម៉ូតូឌុប មានទីលំនៅក្នុងឃុំព្រះនិព្វាន ស្រុកគងពិសី ខេត្តកំពង់ស្ពឺ ចំណែកស្ត្រីជាប្រពន្ធឈ្មោះ សូត្រ មន អាយុ៣៦ឆ្នាំ ជាកម្មការិនីរោងចក្រកាត់ដេរ ។ រីឯបុរសដែលត្រូវចោទថា ជាប្រុសសហាយឈ្មោះ លី ហៀង អាយុ៥៧ឆ្នាំ មានទីលំនៅក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីមន្ត្រីនគរបាលមួយរូប ឱ្យដឹងថា មុនពេលកើតហេតុ បុរសម្នាក់បានជិះម៉ូតូ១គ្រឿងម៉ាកស៊ុយហ៊្សុយគីស្មាស់ ពណ៌ខ្មៅ ពាក់ស្លាកលេខ ភ្នំពេញ 1O-7684 តែម្នាក់ឯងបានដេញតាមពីក្រោយម៉ូតូ១គ្រឿងទៀត ម៉ាកស៊ុយហ៊្សុយគីអេចសេលូ សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CC-0933 បើកបរដោយបុរសម្នាក់ និងមានឌុបស្ត្រីម្នាក់ពីក្រោយផង ។ ខណៈនោះ អ្នកដេញតាមពីក្រោយ ស្រែកថាចោរៗជាប់មិនដាច់ពីមាត់ ដែលបង្កឱ្យមានការភ្ញាក់ផ្អើលយ៉ាងខ្លាំង ហើយកម្លាំងនគរបាលខណ្ឌដង្កោ និងខណ្ឌពោធិ៍សែនជ័យ បានចេញពួនស្ទាក់គ្រប់ផ្លូវ រហូតពួកគេជិះដល់ភូមិខ្ចៅ សង្កាត់បឹងធំ ទើបឃាត់ខ្លួនបាន រួចនាំទៅសាកសួរ ។ ក្រោយពេលបែកធ្លាយរឿងនោះភ្លាម ភាគីទាំង៣ គឺប្តី ប្រពន្ធ និងបុរសជាប់ចោទ បានប្រកែកយកត្រូវរៀងៗខ្លួន ដោយបុរសជាប្តីដែលអះអាងថា ប្រពន្ធលួចលាក់មានសហាយ និយាយថា ខ្លួនជាបុរសពោះម៉ាយ១ភ្លើង បានសែនព្រេនជាមួយស្ត្រីឈ្មោះ សូត្រ មន ជាស្ត្រីមេម៉ាយ៣ភ្លើង (លែងប្តី៣នាក់រួចហើយ) ចាប់ដៃគ្នាជាប្តីប្រពន្ធរយៈពេលជាង៧ឆ្នាំមកហើយ ចាប់តាំងពីឆ្នាំ២០០៦មកម៉្លេះ និងមានកូនប្រុសម្នាក់អាយុ៦ឆ្នាំ ម្យ៉ាងទៀតខ្លួនគឺជាប្តីទី៤ ។ កាលពីមុន ការរស់នៅចុះសម្រុងគ្នាណាស់ ប៉ុន្តែក្រោយមកចេះតែមានការរកាំរកូស ដោយសារតែនាងមានសហាយ លួចលាក់ជាមួយបុរសឈ្មោះ លី ហៀង ក្បត់ចិត្តខ្លួន និងមានបំណងយកបុរសនោះធ្វើជាប្តីទី៥ ។ មិនតែប៉ុណ្ណោះ កាលពីប៉ុន្មានខែមុន ខ្លួនបានតាមទាន់ម្តងរួចមកហើយ ក្នុងពេលដែលពួកគេកំពុងនៅជាមួយគ្នា ហើយពេលនោះខ្លួនបាននាំទៅកាន់ប៉ុស្តិ៍កន្ទោក ខណ្ឌពោធិ៍សែនជ័យ ដើម្បីដោះស្រាយគ្នា និងធ្វើកិច្ចសន្យាឈប់ឱ្យបុរសនោះទាក់ទងប្រពន្ធខ្លួនទៀត ។
ប៉ុន្តែក្រោយមក ពួកគេនៅតែបន្តណាត់ជួបគ្នាជាបន្តបន្ទាប់ រហូតដល់ព្រឹកថ្ងៃកើតហេតុ ប្រពន្ធបានដេញគាត់ឱ្យទៅរត់ម៉ូតូឌុប ដោយនិយាយថា ថ្ងៃនេះជាថ្ងៃអាទិត្យ មានមនុស្សដើរលេងច្រើន និងអាចរកប្រាក់បានច្រើន ។ ពេលនោះគាត់បានចេញទៅរត់ឌុប ហើយពេលទៅដល់ត្រង់មុខវត្តជន្លង់ម្លូ ស្រាប់តែប្រទះឃើញបុរសដែលជាប្រុសសហាយ ជិះសំដៅទៅទិសខាងត្បូង តាមបណ្តោយផ្លូវជាតិលេខ៣ ។ ខណៈឃើញដូច្នេះ គាត់បានបត់ម៉ូតូត្រឡប់ក្រោយវិញ និងដេញតាមពីក្រោយ រហូតដល់វត្តស្លែង ទើបឃើញប្រពន្ធរបស់គាត់ឡើងជិះម៉ូតូជាមួយបុរសសហាយនោះ ក៏ដេញតាមពីក្រោយ ប៉ុន្តែតាមមិនទាន់ ទើបស្រែកថាចោរៗដូច្នេះ ។ ដោយឡែក ស្ត្រីជាប្រពន្ធនិយាយថា រវាងនាង និងបុរសឈ្មោះ នូវ សំណាង មិនមានអ្វីជាប់ពាក់ព័ន្ធនឹងគ្នានោះទេ ព្រោះបានលែងលះគ្នាជាង១ឆ្នាំមកហើយ ព្រោះការរស់នៅមិនចុះសម្រុងនឹងគ្នា ហើយនាងទាក់ទងជាមួយបុរសផ្សេងទៀត ដើម្បីរកអនាគត ប៉ុន្តែត្រូវអតីតប្តីនេះ តាមរករឿងរហូត ។ ការលែងលះគ្នានោះ គឺដោយសារតែអតីតប្តីនេះចេះតែរករឿងគ្មានហេតុផល និងវាយធ្វើបាបនាងជាបន្តបន្ទាប់ មិនតែប៉ុណ្ណោះវាយទាំងម្តាយរបស់នាង បណ្តាលឱ្យបាក់ដៃថែមទៀតផង ។
រីឯបុរសជាប់ចោទជាសហាយ និយាយថា គាត់មានប្រពន្ធ២នាក់រួចមកហើយ ចំណែកនាង សូត្រ មន មិនមែនជាសហាយស្មន់អ្វីទេ ។ តាមពិតនាងបានប្រាប់ថា លែងលះជាមួយប្តីដាច់ស្រេចហើយ ទើបគាត់ដាក់ចិត្តស្រឡាញ់នាង និងមានបំណងយកនាងធ្វើជាប្រពន្ធទី៣ ហើយគាត់ប្រុងចុះសំបុត្រអាពាហ៍ពិពាហ៍ជាមួយនាងទៀតផង ។ នៅព្រឹកថ្ងៃកើតហេតុនោះ គាត់ទៅឌុបនាងក្នុងបំណងទៅធ្វើសក់ចូលរួមពិធីបុណ្យគេនៅវេលាល្ងាច ស្រាប់តែមានរឿងបែបនេះកើតឡើងតែម្តង ។ មន្ត្រីនគរបាលឱ្យដឹងថា ក្រោយពេលជជែកគ្នាបែកផ្សែង ភាគីខាងប្តីដើម បានហៅមន្ត្រីតុលាការម្នាក់ទៅជួយដោះស្រាយ បន្ទាប់មកប្តីដើមនោះ បានទាមទារឱ្យប្រពន្ធ និងបុរសជាប់ចោទជាសហាយនោះ ចេញសងប្រាក់ដែលជំពាក់បំណុលគេថ្លៃធ្វើផ្ទះចំនួន១.៨០០ដុល្លារ ។
ប៉ុន្តែទាមទារយក៣០០ដុល្លារដល់ដៃមុន ដើម្បីយកទៅលោះយកកាតគ្រីម៉ូតូដែលបញ្ចាំគេ ព្រមទាំងទាមទារចំនួន៥០ដុល្លារផ្សេងទៀត សម្រាប់ធ្វើសោហ៊ុយត្រឡប់ទៅផ្ទះវិញ ហើយនាងជាប្រពន្ធ និងបុរសជាប់ចោទ ក៏បានព្រមព្រៀងចេញឱ្យទាំងអស់ ដើម្បីបញ្ចប់រឿង ៕
ចែករំលែកព័តមាននេះ