រាជធានីភ្នំពេញ ៖ កិច្ចប្រជុំបិទទ្វារតាមការគ្រោងទុកសម្រាប់ព្រឹកថ្ងៃទី៣ មីនា នៅវិមានព្រឹទ្ធសភា ក្រុមការងារគណបក្សប្រជាជន កម្ពុជា និងគណបក្សសង្គ្រោះជាតិ បានឯកភាពគ្នាលើ៣ចំណុច និងបានកំណត់យកថ្ងៃទី១០ មីនា ជួបពិភាក្សាគ្នាជាថ្មី ។
រាជធានីភ្នំពេញ ៖ កិច្ចប្រជុំបិទទ្វារតាមការគ្រោងទុកសម្រាប់ព្រឹកថ្ងៃទី៣ មីនា នៅវិមានព្រឹទ្ធសភា ក្រុមការងារគណបក្សប្រជាជន កម្ពុជា និងគណបក្សសង្គ្រោះជាតិ បានឯកភាពគ្នាលើ៣ចំណុច និងបានកំណត់យកថ្ងៃទី១០ មីនា ជួបពិភាក្សាគ្នាជាថ្មី ។ សេចក្តីថ្លែងការណ៍រួម បានលើកឡើងថា ដោយអនុវត្តតាមស្មារតីសេចក្តីថ្លែងការណ៍រួម នៃជំនួបកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី១៦ ខែកញ្ញា ឆ្នាំ២០១៣ និងអនុវត្តតាមស្មារតីសេចក្តីប្រកាស កាលពីថ្ងៃទី១៨ កុម្ភៈ ឆ្នាំ២០១៤ គណៈកម្មការចម្រុះមកពីគណបក្សទាំងពីរដែលមានអាសនៈក្នុងរដ្ឋសភា បានជួបប្រជុំគ្នា និងបានឯកភាពគ្នាលើ៣ចំណុចមាន៖
១-ការរៀបចំការចុះឈ្មោះអ្នកបោះឆ្នោត និងបញ្ជីឈ្មោះអ្នកបោះឆ្នោត ដើម្បីធានានិងការពារសិទ្ធិបោះឆ្នោតរបស់ប្រជាពលរដ្ឋគ្រប់រូប ។
២-រៀបចំបង្កើតច្បាប់ស្តីពីហិរញ្ញវត្ថុរបស់គណបក្សនយោបាយ ។
៣-ក្របខ័ណ្ឌកំណែទម្រង់ការបោះឆ្នោតផ្សេងៗទៀតដូចជា ៈ ការកែទម្រង់ការបោះឆ្នោត យន្តការនៃការដោះស្រាយការបោះឆ្នោត ប្រព័ន្ធផ្សព្វផ្សាយ និងមធ្យោបាយផ្សព្វផ្សាយសម្រាប់គណបក្សនយោបាយ…។ល។
លោក សុន ឆ័យ តំណាងគណៈកម្មការចម្រុះរបស់គណបក្សសង្គ្រោះជាតិ បានថ្លែងប្រាប់អ្នកសារព័ត៌មានក្រោយកិច្ចប្រជុំថា ការជួបគ្នានាថ្ងៃទី៣ មីនា ដោយសារតែមានការជួបគ្នារបស់ថ្នាក់ដឹកនាំកំពូលគណបក្សទាំងពីរ កាលពីថ្ងៃទី១៦ កញ្ញា ឆ្នាំ២០១៣ ដែលបានព្រមព្រៀងគ្នានិយាយពីការកែទម្រង់ការបោះឆ្នោត និងការជួបគ្នារបស់ក្រុមការងារបច្ចេកទេស កាលពីថ្ងៃទី១៨ កុម្ភៈ និងបានព្រមព្រៀងគ្នាបង្កើតគណៈកម្មការចម្រុះ ដែលមានសមាសភាពស្មើគ្នា ដើម្បីធ្វើការសិក្សា កែទម្រង់ការបោះឆ្នោតនៅថ្ងៃខាងមុខ ។
លោក សុន ឆ័យ បានថ្លែងទៀតថា ការព្រមព្រៀងគ្នា កាលពីថ្ងៃទី១៨ កុម្ភៈ កន្លងមកនេះ គណបក្សទាំងពីរបានឯកភាពគ្នាបង្កើតឱ្យមានសមាសភាពរបស់គណៈកម្មការចម្រុះស្មើគ្នាព្រមព្រៀងឱ្យមានសិក្ខាសាលាថ្នាក់ជាតិដើម្បីស្តាប់មតិយោបល់ដោយចំហ ទទួលសំណូមពរផ្សេងៗនិងយោបល់ពីអង្គការជាតិ-អន្តរជាតិនានាក្នុងការយកគំនិតមកពិចារណា ។ ការធ្វើសិក្ខាសាលានេះដើម្បីគោរពតាមគោលការណ៍លទ្ធិប្រជាធិបតេយ្យ ។ លោក សុន ឆ័យ ថ្លែងថា ក្នុងកិច្ចប្រជុំដែលមានរយៈពេលយូរនេះ ដោយសារតែការពិភាក្សា បានលើកយកចំណុចជាច្រើនមកពិភាក្សាគ្នា ហើយគណបក្សសង្គ្រោះជាតិបានលើកចំណុចធំៗមួយចំនួន ប៉ុន្តែការពិភាក្សាគ្នាបានឯកភាព៣ចំណុច ក្នុងនោះមានទី១-ការរៀបចំ ការចុះឈ្មោះអ្នកបោះឆ្នោត និងបញ្ជីឈ្មោះអ្នកបោះឆ្នោត ដើម្បីធានា និងការពារសិទ្ធិបោះឆ្នោត របស់ប្រជាពលរដ្ឋគ្រប់រូប ។ ទី២-រៀបចំបង្កើតច្បាប់ស្តីពីហិរញ្ញវត្ថុរបស់គណបក្សនយោបាយ ។ ទី៣-ក្របខណ្ឌកំណែទម្រង់ការបោះឆ្នោតផ្សេងៗទៀត ដូចជា ការកែទម្រង់ការបោះឆ្នោត យន្តការនៃការដោះស្រាយការបោះឆ្នោត ប្រព័ន្ធផ្សព្វផ្សាយ និងមធ្យោបាយផ្សព្វផ្សាយសម្រាប់គណបក្សនយោបាយ ។ ក៏ប៉ុន្តែមានចំណុចផ្សេងទៀតគណៈកម្មការចម្រុះមិនបានឯកភាពគ្នាទេ ។ លោកសុន ឆ័យ បញ្ជាក់ថា បន្ទាប់ពីកិច្ចពិភាក្សានិងយល់ព្រមគ្នា គណៈកម្មការចម្រុះនេះមិនទាន់ចប់នៅឡើយទេ គឺយើងនឹងពិភាក្សាគ្នានៅថ្ងៃទី១០ មីនា ខាងមុខបន្តទៀត ដើម្បីកំណត់យកអ្វីសម្រាប់ធ្វើជាប្រធានបទក្នុងសិក្ខាសាលាថ្នាក់ជាតិនៅថ្ងៃខាងមុខ និងពេលណាជួបពិភាក្សាជាមួយអង្គការជាតិ និងអន្តរជាតិ ក្នុងការផ្តល់អនុសាសន៍ ។
លោកប៊ិន ឈិន តំណាងគណៈកម្មការចម្រុះខាងគណបក្សប្រជាជនកម្ពុជាលើកឡើងថា កិច្ចប្រជុំរវាងភាគីទាំងពីរបាននិយាយពីបញ្ហាសំខាន់គឺ រៀបចំការចុះឈ្មោះអ្នកបោះឆ្នោត និងបញ្ជីឈ្មោះអ្នកបោះឆ្នោត ដើម្បីធានានិងការពារសិទ្ធិបោះឆ្នោតរបស់ប្រជាពលរដ្ឋគ្រប់រូប ។ ភាគីទាំងពីរបានឯកភាពគ្នាដាក់ចូលទៅក្នុងក្របខ័ណ្ឌកំណែទម្រង់ការបោះឆ្នោត និងបានឯកភាពរៀបចំបង្កើតច្បាប់ស្តីពីហិរញ្ញវត្ថុ របស់គណបក្សនយោបាយ ។ ប្រធានបទនេះ ត្រូវបានគណៈកម្មការឯកភាពគ្នា និងមានចំណុចជាច្រើនទៀតត្រូវយកទៅពិភាក្សាបន្តទៀត ។ លោក ប៊ិន ឈិន បានលើកឡើងទៀតថា ដើម្បីឈានដល់សម្រេចកិច្ចនៃកំណែទម្រង់ការបោះឆ្នោតនៅថ្ងៃអនាគតនោះ ត្រូវឆ្លងកាត់ពេលវេលាច្រើន មានការធ្វើវេទិកាសាធារណៈនិងរហូតដល់មានសិក្ខាសាលាថ្នាក់ជាតិសម្រាប់ទទួលមតិយោបល់ពីប្រជាជននិងអង្គការជាតិ-អន្តរជាតិ ។ ដូច្នេះដើម្បីឱ្យមានកំណែទម្រង់ការបោះឆ្នោតល្អនោះក្រុមការងារគណៈកម្មការ នឹងជួបគ្នាបន្តទៀត ។ លោកសុន ឆ័យ ក៏បានលើកឡើងទៀតថា កំណែទម្រង់ការបោះឆ្នោតនៅថ្ងៃអនាគតមានច្រើនចំណុច ដូចជាយន្តការនៃការដោះស្រាយវិវាទនៃការបោះឆ្នោត ក្នុងនោះក៏និយាយពីមន្ត្រីរាជការកងកម្លាំងប្រដាប់អាវុធ និងសមត្ថកិច្ចផងដែរ ព្រោះអ្នកទាំងនោះត្រូវតែអនុវត្តការងាររបស់ខ្លួន ត្រូវតែអព្យាក្រឹត មិនត្រូវយកតួនាទីទៅបម្រើនយោបាយឬបក្សណាមួយនោះទេ ។ ជាក់ស្ដែង កន្លងមកមានមន្ត្រីការងារខ្លះកាន់បក្សនយោបាយបានយកអំណាចរបស់ខ្លួនទៅគំរាមកំហែងអ្នកដទៃ ។ គណៈកម្មការចម្រុះអាចធ្វើអ្វីដែលអាចធ្វើបាន ចំពោះបញ្ហានយោបាយវិញមានតែថ្នាក់ដឹកនាំកំពូលទេ ដែលដោះស្រាយបាន ហើយសង្ឃឹមថា ថ្នាក់ដឹកនាំកំពូលគណបក្សទាំងពីរនឹងជួបគ្នានៅពេលឆាប់ៗនេះ ។
លោក ប៊ិន ឈិន បានសម្តែងការស្វាគមន៍ចំពោះការជួបចរចាគ្នារបស់ថ្នាក់ដឹកនាំ និងថ្លែងថា គណបក្សប្រជាជនកម្ពុជា បើកទ្វារជានិច្ចសម្រាប់ការចរចាជាមួយគណបក្សសង្គ្រោះ ជាតិ ។ យ៉ាងណាក្តី ទោះបីជាសមាជិកជាប់ឆ្នោតអាណត្តិទី៥នៃរដ្ឋសភារបស់គណបក្សសង្គ្រោះជាតិមិនចូលប្រជុំ ក៏រដ្ឋសភានៅតែដំណើរការដដែល ហើយការចូលប្រជុំសភា ឬមិនចូលប្រជុំសភា ជារឿងរបស់សមាជិកជាប់ឆ្នោតគណបក្សសង្គ្រោះជាតិ ព្រោះថា អ្វីៗទាំងអស់ត្រូវតែកែតម្រូវនៅរដ្ឋសភានោះទេ ។ ចំពោះការចូលសភា ឬមិនចូលសភា លោក សុន ឆ័យ បានលើកឡើងថា គោលជំហររបស់គណបក្សសង្គ្រោះជាតិ នៅតែទាមទារដូចអ្វីដែលថ្នាក់ដឹកនាំលើកឡើង គឺទាមទាររកយុត្តិធម៌នៃការបោះឆ្នោតកន្លងមក ក៏ប៉ុន្តែជម្រើសរបស់គណបក្សសង្គ្រោះជាតិ ចូលប្រជុំសភា លុះត្រាតែមានការបោះឆ្នោតឡើងវិញ ។ ការធ្វើកំណែទម្រង់ការបោះឆ្នោតនេះ ក៏ជាចំណុចមួយសម្រាប់ដោះស្រាយបញ្ហានយោបាយមួយចំណុចដែរ ហើយក៏ជាចំណុចមួយដែលថ្នាក់ដឹកនាំកំពូលនឹងជួបគ្នានោះផងដែរ ។ ដូច្នេះការជួបគ្នានោះ ប្រសិនបើមានការមូលមាត់គ្នាយ៉ាងម៉េចនោះ វាអាចឈានដល់យល់ព្រមគ្នាត្រង់ចំណុចណាមួយនោះ ធ្វើឱ្យមានកិច្ចប្រជុំថ្នាក់ដឹកនាំកំពូលផងដែរ ។
លោក ប៊ិន ឈិន ថ្លែងទៀតថា ជំហររបស់គណបក្សសង្គ្រោះជាតិយ៉ាងម៉េចក៏ដោយ ចំពោះការសម្បទានគ្នាយ៉ាងម៉េចនោះ អាស្រ័យលើថ្នាក់ដឹកនាំ តែចំពោះការបោះឆ្នោតមុនអាណត្តិនោះ ប្រហែលជាមិនអាចទៅរួចទេ ព្រោះថា ប្រសិនបើបោះឆ្នោតមុនអាណត្តិគឺវាខុសច្បាប់ ។ ការបង្កើតគណៈកម្មការចម្រុះលើការបោះឆ្នោតនេះ មិនអាចធ្វើការបោះឆ្នោតនៅអាណត្តិនេះបានទេ តាមខ្ញុំប៉ាន់ស្មាននោះ ប្រហែលជាអាណត្តិក្រោយ ទើបធ្វើការបានសម្រាប់គណៈកម្មការចម្រុះនេះ ៕
ចែករំលែកព័តមាននេះ