ខេត្តកំពង់ចាម ៖ សេចក្តីរាយការណ៍បឋមបានឲ្យដឹងថា បុរសម្នាក់តូចចិត្តពិការជើងធ្វើអត្តឃាតខ្លួនឯង ហើយមានជំងឺប្រចាំកាយទៀត ដែលរស់នៅស្រុកកងមាស ខេត្តកំពង់ចាម ត្រូវបានសមត្ថកិច្ចសង្ស័យថា បានដុតផ្ទះឆេះខ្ទេច ដោយមានទំហំ…
ខេត្តកំពង់ចាម ៖ សេចក្តីរាយការណ៍បឋមបានឲ្យដឹងថា បុរសម្នាក់តូចចិត្តពិការជើងធ្វើអត្តឃាតខ្លួនឯង ហើយមានជំងឺប្រចាំកាយទៀត ដែលរស់នៅស្រុកកងមាស ខេត្តកំពង់ចាម ត្រូវបានសមត្ថកិច្ចសង្ស័យថា បានដុតផ្ទះឆេះខ្ទេច ដោយមានទំហំ 6mx8m ធ្វើអំពីឈើប្រក់សង្កសី ជញ្ជាំងស្លឹក បណ្ដាលឲ្យគាត់បានស្លាប់ ហើយហេតុការណ៍នេះបានកើតឡើងនៅវេលាម៉ោង១១និង២០យប់ថ្ងៃទី២១ ខែសីហានេះ ។
បុរសពិការជើងខាងលើមានឈ្មោះ ស៊ុន លាងហ៊ាន់ ភេទប្រុស អាយុ៤០ឆ្នាំ ស្លាប់ដេកម្នាក់ឯងនៅលើផ្ទះឈើនោះ ។
លោក ថុង ភូរីវុទ្ធ អធិការស្តីទីស្រុកកងមាសប្រាប់ថា ក្រោយពីទទួលបានដំណឹងថា មានអគ្គិភ័យកើតឡើងខាងលើ រូបលោកបានដឹកនាំរថយន្តពន្លត់អគ្គិភ័យរបស់ស្រុកប្រញាប់ចេញទៅជួយអន្តរាគមន៍បាញ់ទឹក តែដោយសារចម្ងាយផ្លូវ៤០គីឡូម៉ែត្រ ឆ្ងាយទម្រាំ និងទៅដល់ផ្ទះនោះបានឆេះអស់ទៅហើយ ។
លោកអធិការស្តីទីកងមាសបន្តថា ផ្អែកតាមការពិនិត្យភ្លើងបានឆាបឆេះពីត្រង់កន្លែងកូនម្ចាស់ផ្ទះដេក ដែលពិការជើង ហើយភ្លើងបានឆេះរាលពេញផ្ទះតែម្តង ។ ក្នុងពេលកើតហេតុស្ត្រីចំណាស់ជាម្តាយមិនបាននៅផ្ទះនេះទេ រួមនឹងចៅ២នាក់ទៀត ត្រូវបានទៅដេកផ្ទះអ្នកភូមិក្បែរនោះ នេះចាត់ទុកជាសំណាងណាស់ ប្រសិនបើនៅជុំគ្នាអាច និងមានគ្រោះថ្នាក់ដល់ចៅៗមិនខានឡើយ ។
ក្រោយហេតុការណ៍ភ្លើងឆេះទើបម្តាយមកដល់បានត្រឹមសោកស្តាយកូនប្រុសស្លាប់ រួមនឹងផ្ទះត្រូវបានឆេះម៉ដ្ឋ ចំពោះសម្ភារខូចខាតរួមមាន ម៉ូតូសង់កូរ៉េ១គ្រឿង ម៉ាស៊ីសាំងបូមទឹក១គ្រឿង លុយ១០០ដុល្លាអាមេរិក អង្ករ១បេ៥០គីឡូ សៀវភៅគ្រួសារ សំបុត្រកំណើត អត្តសញ្ញាណប័ណ្ណ និងសម្ភារមួយចំនួនសម្រាប់ប្រើប្រាស់នៅក្នុងផ្ទះឆេះអស់ទាំងស្រុង ។
មូលហេតុ សង្ស័យកូនរបស់គាត់ដែលស្លាប់នោះជាអ្នកដុត ព្រោះគាត់មានជំងឺរាំរ៉ៃ និងធ្លាប់បានដុតកន្លងមកជាច្រើនដង តែត្រូវបានក្រុមគ្រួសារ និងអ្នកជិតខាងជួយទាន់ពេលវេលា ៕កែសម្រួលដោយ ៖ សុឃាក់
ចែករំលែកព័តមាននេះ