រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសអញ្ជើញជាអធិបតីភាព ក្នុងពិធីបិទសន្និបាតបូកសរុបលទ្ធផលការងារទេសចរណ៍ឆ្នាំ២០១២-២០១៣ និងលើកទិសដៅអនុវត្តបន្ត «ទេសចរណ៍កម្ពុជា ឆ្ពោះទៅសមាហរណកម្មអាស៊ានឆ្នាំ២០១៥ » បានមានប្រសាសន៍អំពាវនាវទៅកាន់អាជ្ញាធរគ្រប់ទីកន្លែងទាំងអស់ ត្រូវដំណើរការសំខាន់គ្រប់គ្រងលើបញ្ហាស៊ីសា ដោយហាមមិនឱ្យធ្វើអាជីវកម្មជាដាច់ខាត ។ មិនមែនទៅបិទហាងរបស់គេទេ គឺហាមបញ្ឈប់ការធ្វើអាជីវកម្មការជក់ស៊ីសានេះ ប៉ុន្តែក្នុងករណីមិនរាងចាលគឺត្រូវបិទហាងតែម្តងនៅកន្លែងធ្វើអាជីវកម្មនេះ ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍បែបនេះនារសៀលថ្ងៃទី២៨ កុម្ភៈ នៅសាលបុរីកោះពេជ្រ ក្នុងឱកាសបិទសន្និបាតបូកសរុបលទ្ធផលការងារទេសចរណ៍ឆ្នាំ២០១២-២០១៣ និងអបអរសាទរទិវាជាតិទីក្រុងស្អាតឆ្នាំ២០១៤ ។ សម្តេចតេជោនាយករដ្ឋមន្ត្រីមានប្រសាសន៍បន្តថា បន្ទាប់ពីការលេចឡើងនៅខេត្តសៀមរាប និងនៅរាជធានីភ្នំពេញ គឺអាជីវកម្មនានាដែលបាននិងកំពុងប្រកប ហើយក៏ត្រូវបានទប់ស្កាត់ក្នុងរយៈពេលប៉ុន្មានថ្ងៃកន្លងមកនេះ បានក្លាយទៅជាប្រធានបទក្តៅគគុកមួយដែលត្រូវចាត់ការបន្ទាន់ ។ «យើងត្រូវបិទក្រោលសេះ នៅមុនពេលសេះចេញផុត ឬក៏សេះណាទើបនឹងចេញពីក្រោល យើងត្រូវចាប់ចូលក្រោយវិញ» នៅត្រង់ថា បញ្ហានេះនៅមិនទាន់យឺតពេលពេកទេ តែយើងត្រូវធ្វើសកម្មភាពបន្ទាន់បំផុតអំពីបញ្ហាស៊ីសា ។ ទាក់ទិននឹងស៊ីសា មិនមាននៅក្នុងបម្រាមទាក់ទិនជាមួយនឹងការហាមឃាត់ទេ ក៏ប៉ុន្តែគេបានយកទៅពិសោធន៍រួចហើយ គឺវាមានជាតិគ្រឿងញៀនកម្រិតខ្ពស់តែម្តង ។
សម្តេចតេជោមានប្រសាសន៍ថា ឥឡូវនេះបណ្តាកន្លែងកម្សាន្តមួយចំនួនបានបើកធ្វើអាជីវកម្មលើបញ្ហាស៊ីសាហ្នឹង ។ ខេត្តសៀមរាបក៏បានប្រតិបត្តិការធ្វើការងារនេះ និងនៅភ្នំពេញក៏បានប្រតិបត្តិការលើការងារនេះដែរ ។ តាមព័ត៌មានគ្រាន់តែកន្លែងមួយមានទីតាំង២ជ្រកក្រោមស្លាកខារ៉ាអូខេ និងទីតាំងមណ្ឌលកម្សាន្ត មានយុវជនក្មេងៗក្រោមអាយុ១៨ឆ្នាំ ភាគច្រើនជាសិស្សសាលាចំនួន៩៦នាក់ ក្នុងនោះស្រីចំនួន៣៣នាក់ យកទៅអប់រំរួចប្រគល់ឱ្យទៅឪពុកម្ដាយ ។ ដូច្នេះចំណុចនេះជាចំណុចត្រូវដោះស្រាយ ។
សម្ដេចតេជោមានប្រសាសន៍ថា បញ្ហានេះពិនិត្យឃើញថា ត្រូវចាត់ការបន្ទាន់ ហើយប្រគល់ឱ្យអាជ្ញាធរជាតិប្រយុទ្ធប្រឆាំងគ្រឿងញៀនដឹកនាំការងារ ។ ដូច្នេះលោកអភិបាលខេត្តនានាដែលនៅទីនោះ ត្រូវចាត់ការឱ្យបានហ្មត់ចត់ ពិនិត្យមើលក្នុងភូមិសាស្ត្ររបស់ខ្លួនទាំងអស់ដើម្បីបញ្ចប់សារធាតុគ្រឿងញៀនកម្រិតខ្ពស់សីុសានេះ ។ សីុសានេះបើមើលឱ្យមែនទែនទៅគឺជាកញ្ឆា គ្រាន់តែឧបករណ៍ ដែលគេយកមកប្រើមានលក្ខណៈខុសគ្នា ។ ឥឡូវគេគិតកែទម្រង់ទំនើប គឺជក់ទាំងក្មេង ជក់ទាំងវ័យកណ្ដាល វ័យមធ្យម ។ តាមការដឹងគឺមកពីប្រទេសអេហ្សុីប …។ ដូច្នេះសូមឱ្យយកចិត្តទុកដាក់លើបញ្ហានេះ គឺជាប្រភេទគ្រឿងញៀនទាញយុវជនចូលទៅកាន់ទីនោះតែម្ដង គ្រោះថ្នាក់ខ្លាំងណាស់។
សម្ដេចតេជោនាយករដ្ឋមន្ត្រី បានអំពាវនាវដល់អាជ្ញាធរនិងអ្នកធ្វើអាជីវកម្មទាំងឡាយដែលបានធ្វើមុខរបរនេះត្រូវបញ្ឈប់ជាបន្ទាន់ ។ សូមមេត្ដាយោគយល់ទៅដល់សង្គមជាតិរបស់យើង សូមយោគយល់ដល់អនាគតរបស់កូនខ្មែរ…សូមមេត្ដាកុំចង់បានផលចំណេញហើយបង្កើតនូវទុក្ខសោកដល់យុវវ័យយុវនារីរបស់កម្ពុជា ។ សូមបញ្ឈប់ទៅវា អត់ចំណេញធ្វើមហាសេដ្ឋីដោយសារតែការលក់ឱ្យគេចូលជក់ក្នុងរឿងហ្នឹងទេ បង្កើតនូវការខូចខាតដល់យុវជនរបស់យើង ។
សម្តេចតេជោ បានអំពាវនាវដល់មាតាបិតា អាណាព្យាបាលទាំងឡាយ សូមមេត្តាជួយអប់រំកូនចៅរបស់ខ្លួនដែលវាបានទៅហើយ ត្រូវអប់រំទាញត្រឡប់មកវិញ ។ សូមកុំដល់គេបិទហាង បែរជាទៅទិញយកមកជក់នៅតាមផ្ទះទៅវិញ គឺសូមកុំឱ្យមាន ព្រោះសីុសានេះវាជាគ្រឿងញៀនមួយប្រភេទ វាអាចទាក់ទាញយុវនារីទៅជក់បាន ។ ចំពោះស្ត្រីខ្មែរគឺមិនងាយមានអ្នកជក់បារីទេ ប៉ុន្តែផ្ទុយទៅវិញកូនសិស្សបែរជាទៅជក់ដូចដែលមន្ទីរពិសោធន៍អាជ្ញាធរជាតិប្រយុទ្ធប្រឆាំងគ្រឿងញៀនបានធ្វើការពិសោធន៍រួចហើយ ។
សម្តេចតេជោ បានអង្វរករ និងអំពាវនាវឱ្យបញ្ឈប់ជាបន្ទាន់ ហើយអាជ្ញាធរទាំងអស់ត្រូវសម្លឹងមើល បើសិនជាមានការស្ម័គ្រចិត្តពីអ្នកប្រកបអាជីវកម្មនេះមិនចាំបាច់រវល់ទៅដល់អាជ្ញាធរទេ ។ អីុចឹងអ្នកធ្វើអាជីវកម្មទាំងឡាយ បំផ្លាញវាចោលទៅ លុបវាចោលទៅ ដូច្នេះសូមមាតាបិតា អាណាព្យាបាល អ្នកជក់ខ្លួនឯង ក៏ត្រូវតែចូលរួម ត្រូវយល់ដឹងថា ស៊ីសា គឺជាប្រភេទសារធាតុគ្រឿងញៀនហើយ ។
អ្នករកស៊ីធ្វើអាជីវកម្មស៊ីសា ត្រូវតែបញ្ឈប់ អាជ្ញាធរត្រូវតាមដានពិនិត្យមើល គឺមិនបិទហាងរបស់គេទេ ប៉ុន្តែសូមឱ្យបញ្ឈប់ការធ្វើអាជីវកម្ម ប៉ុន្តែក្នុងករណីមិនរាងចាល គឺឈានទៅដល់ការបិទតែម្តង ។ ឥឡូវជ្រើសរើសទៅ បើសាកល្បង គឺត្រូវបិទរាប់ខែ ឬរាប់ឆ្នាំ…។សម្តេចបានអំពាវនាវដល់គ្រប់ទីកន្លែងទាំងអស់ ត្រូវអនុវត្ត ។ សូមមគ្គុទ្ទេសក៍ទេសចរណ៍ត្រូវគិតគូរយកចិត្តទុកដាក់ប្រុងប្រយ័ត្នចំពោះភ្ញៀវទេសចរ ស្រាប់តែនាំភ្ញៀវទេសចរទៅជក់សុីសា ដល់ចេញពីកម្ពុជា ដើររកទិញសុីសាពីអេហ្សុីបមកទៀត ។ ដូច្នេះសូមឱ្យយកចិត្តទុកដាក់ខ្លាំងអំពីបញ្ហានេះ ។
សម្តេចតេជោ មានប្រសាសន៍បញ្ជាក់ថា កម្ពុជា ជាគោលដៅទេសចរណ៍ធម្មជាតិ មិនមែនជាគោលដៅទេសចរណ៍ផ្លូវភេទ ឬទេសចរណ៍គ្រឿងញៀនទេ ។ យើងខិតខំប្រឹងប្រែងខ្លាំងណាស់អំពីបញ្ហាហ្នឹង ប៉ុន្តែបញ្ហារបស់យើងគឺនៅក្នុងចំណោមយុវជន និងមនុស្សនៅក្នុងប្រទេសកម្ពុជារបស់យើង ។ មនុស្សមួយចំនួនពិតជាមានការសាកល្បងហើយ គឺមិនអត់ទេ ។ ដូច្នេះសូមអង្វរករ ហើយបើមិនស្តាប់ គឺមានតែដោះស្រាយដោយអាជ្ញាធរហើយ ៕
ចែករំលែកព័តមាននេះ