ខេត្តឧត្តរមានជ័យ ៖ ស្ត្រីម្នាក់ដែលឃាតករបានទូរស័ព្ទហៅទាំងយប់ឱ្យទៅជួប រួចសម្លាប់កាប់ក្បាលយ៉ាងឃោរឃៅព្រៃផ្សៃបំផុតកាលពីចន្លោះម៉ោង៩ទៅ១០យប់ថ្ងៃទី២ កញ្ញា ឆ្នាំ២០១៣ កន្លងទៅ រហូតមកដល់ពេលនេះ ការវែកមុខឃាតករនៅតែរកពន្លឺមិនទាន់ឃើញថា តើជនជាឃាតករនោះសម្លាប់ដើម្បីអ្វី ព្រោះតែការសម្លាប់នេះមានចរិតព្រៃផ្សៃគួរឱ្យថ្កោលទោស ដោយសម្លាប់កាត់ក្បាល ។ រីឯស្ត្រីរងគ្រោះ បានបន្សល់ទុកកូនស្រីចំនួន២នាក់ឱ្យជីដូនចិញ្ចឹមបីបាច់ថែរក្សាមកដល់សព្វថ្ងៃ ។
ស្ត្រីជាជីដូនឈ្មោះ ស៊ុម គឹមហេង ហៅយាយសឿ អាយុ៦០ឆ្នាំ រៀបរាប់ថា ប្តីរបស់គាត់ឈ្មោះប្រិម សារ៉ាន់ អាយុ៦៨ឆ្នាំ ។ គាត់មានកូនចំនួន៦នាក់ (ស្រី៥នាក់) ហើយកូនស្រីដែលក្រុមឃាតករសម្លាប់ដោយកាត់ក្បាលយ៉ាងសាហាវនោះឈ្មោះ ប្រិម សាវ៉ាន អាយុ២៥ឆ្នាំ មានកូនស្រី២នាក់ដែលបន្សល់ទុកឱ្យរូបគាត់ជាអ្នកចិញ្ចឹមបីបាច់ថែរក្សា បន្ទាប់ពីម្តាយពួកគេស្លាប់ចោលទៅ ។
លោកយាយរៀបរាប់ថា កូនស្រីរបស់គាត់ មុននឹងស្លាប់នោះមានប្តី២នាក់រួចមកហើយ ដែលប្តីទី១-ឈ្មោះ ខះ ដោយសារតែតូចចិត្តខឹងនឹងប្រពន្ធ ក៏លេបថ្នាំសម្លាប់ខ្លួនក្នុងអំឡុងឆ្នាំ២០០៩ និងមានកូនស្រីចំនួន២នាក់ កូនច្បងឈ្មោះ ខះ មី អាយុ៨ឆ្នាំ និងកូនប្អូនឈ្មោះ ខះ មាន អាយុ៥ឆ្នាំ ។ គាត់បន្តថា ក្រោយមកកូនស្រីគាត់ក៏មានប្តីម្នាក់ទៀតឈ្មោះទូច ដែលបុរសនេះមានប្រពន្ធរួចហើយ និងបានកូនស្រីមួយឈ្មោះ ទូច នីតា អាយុ២ឆ្នាំ បុ៉ន្តែបន្ទាប់ពីម្តាយស្លាប់ចោលទៅ ក៏ត្រូវឪពុកយកទៅឱ្យប្រពន្ធដើមរបស់គេជាអ្នកចិញ្ចឹម ។
លោកយាយរៀបរាប់ទៀតថា រហូតមកដល់ពេលនេះ ពួកគាត់ទាំងពីរនាក់ប្តីប្រពន្ធ និងប្រជាពលរដ្ឋរស់នៅក្នុងស្រុកអន្លង់វែងគ្រប់ៗរូប ចង់ដឹងចង់ឃើញ និងរង់ចាំមើលស្នាដៃសមត្ថកិច្ច និងធ្វើការអំពាវនាវដ៏ទទូចដល់សមត្ថកិច្ច មេត្តាជួយវែករកមុខឃាតករដែលបានសម្លាប់កូនស្រីគាត់ដ៏សាហាវនោះយកមកផ្តន្ទាទោសទៅតាមផ្លូវច្បាប់ផង បើពុំដូច្នោះទេអ្នកស្លាប់ក៏បិទភ្នែកមិនជិត ហើយជនដៃដល់ជាឃាតករ ក៏អាចបន្តប្រព្រឹត្តអំពើបែបនេះទៀតជាមិនខាន ដោយសារតែយល់ថា ប៉ូលិសមិនអាចវែកមុខឃើញ ។
ទាក់ទិននឹងហេតុការណ៍នេះ នារសៀលថ្ងៃទី២៧ កុម្ភៈ កោះសន្តិភាពបានទូរស័ព្ទសាកសួរលោកវរសេនីយ៍ទោ ហម ភីរម្យ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត និងត្រូវបានប្រាប់ថា ឃាតករដែលបានសម្លាប់កាត់ក្បាលស្ត្រីម្នាក់យ៉ាងសាហាវព្រៃផ្សៃនោះ គឺសមត្ថកិច្ចបានកសាងសំណុំរឿងដើម្បីសុំដីកាបង្គាប់តាមចាប់ខ្លួនហើយ បុ៉ន្តែសព្វថ្ងៃនេះជនជាឃាតករកំពុងតែគេចខ្លួន ។ ទោះបីជាបែបណា សមត្ថកិច្ចនៅតែបន្តធ្វើការស្រាវជ្រាវស្វែងរកចាប់ខ្លួនឱ្យខាងតែបាន ដើម្បីនាំខ្លួនជននោះយកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ