រាជធានីភ្នំពេញ៖ បច្ចុប្បន្នការផ្តល់សេវាហិរញ្ញវត្ថុរបស់គ្រឹះស្ថានធនាគារ និងហិរញ្ញវត្ថុកម្ពុជាមានការរីកចម្រើនគួរឱ្យកត់សម្គាល់ទាំងទំហំឥណទាន និងទំហំប្រតិបត្តិការ ប៉ុន្តែការអប់រំចំណេះដឹងផ្នែកហិរញ្ញវត្ថុដល់អតិថិជនត្រូវបានអ្នកសេដ្ឋកិច្ចមើលឃើញថាមានការយឺតពេលបន្តិចទៅហើយ និងបើបន្តមិនយកចិត្តទុកដាក់អាចនឹងហួសពេល ។
បើតាមអ្នកសេដ្ឋកិច្ច និងជាទីប្រឹក្សានៃក្រុមហ៊ុន EMC លោក ង៉ែត ជូរ បានឱ្យដឹងថា «ខ្ញុំបានបញ្ជាក់ពីភាពចាំបាច់ក្នុងការអប់រំចំណេះដឹងហិរញ្ញវត្ថុដល់អតិថិជនរបស់មីក្រូហិរញ្ញវត្ថុចាប់តាំងពីឆ្នាំ ២០១១ មកម្លេះ ។ ប៉ុន្តែគ្រឹះស្ថានមីក្រូហិរញ្ញវត្ថុស្ទើរតែទាំងអស់ហាក់មិនយកចិត្តទុកដាក់ ឬបានយកចិត្តទុកដាក់នឹងបញ្ហានេះតិចតួចបំផុត ។ ក្រោយមករបាយការណ៍ស្រាវជ្រាវមួយដែលធ្វើឡើងនៅឆ្នាំ ២០១៧ បានបង្ហាញថាមានតែប្រជាជនខ្មែរប្រមាណ ១៨% ប៉ុណ្ណោះដែលមានចំណេះដឹងមូលដ្ឋានផ្នែកហិរញ្ញវត្ថុ» ។
លោក គូសបញ្ជាក់បន្ថែមថា «ស្ថានភាពឥឡូវហាក់ដូចជាយឺតពេលបន្តិចក្នុងការអប់រំចំណេះដឹងហិរញ្ញវត្ថុដល់អតិថិជន ។ ប៉ុន្តែបើមិនបានយកចិត្តទុកដាក់ធ្វើឱ្យបានខ្លាំងចាប់ពីពេលនេះទេ គឺអាចនឹងហួសពេលហើយ ។ ព្រះពុទ្ធទូន្មានថា អវិជ្ជាជាប្រភពនៃសេចក្តីទុក្ខ ។ ភាពអវិជ្ជាផ្នែកចំណេះដឹងហិរញ្ញវត្ថុមិនមែនជាទុក្ខរបស់ហិរញ្ញវត្ថុនោះទេ ផ្ទុយទៅវិញវាជាទុក្ខរបស់អ្នកប្រើប្រាស់ និងអ្នកផ្តល់សេវាហិរញ្ញវត្ថុ» ។
ទាក់ទងនិងចំណេះដឹងផ្នែកហិរញ្ញវត្ថុនេះបើតាមការធ្វើបទបង្ហាញរបស់ថ្នាក់ដឹកនាំធនាគារជាតិនៃកម្ពុជានាពេលកន្លងមកបង្ហាញថាក្នុងបរិបទនាពេលបច្ចុប្បន្នកម្ពុជាមានប្រជាជនពេញវ័យអាយុចាប់ពី ១៨ ឆ្នាំឡើងទៅមាន ១០ លាននាក់ បុរសមាន ៤៨% ស្ត្រីមាន ៥២% ហើយនៅចំនួនសរុបនេះមានប្រមាណ ២៩% នៅមិនទាន់ទទួលបានការប្រើប្រាស់សេវាហិរញ្ញវត្ថុនៅឡើយ ។
លោក ជា ចាន់តូ ទេសាភិបាលធនាគារជាតិនៃកម្ពុជាធ្លាប់មានប្រសាសន៍ថា បច្ចុប្បន្នវិស័យធនាគារមានការរីកចម្រើនគួរជាទីកត់សម្គាល់ ជាក់ស្តែង ទ្រព្យសកម្មរបស់ធនាគារហិរញ្ញវត្ថុ បានបន្តកើនឡើង ១៨០ ទ្រីលានរៀល ស្មើប្រមាណ ៤៥ ប៊ីលានដុល្លារអាមេរិក, មូលនិធិកម្ចី ១៦ ទ្រីលានរៀល ស្មើប្រមាណ ៤ ប៊ីលានដុល្លារអាមេរិក, ដើមទុនមានកំណើន ជាង ២១ ទ្រីលានរៀល ស្មើប្រមាណ ៥ ប៊ីលានដុល្លារអាមេរិក, ប្រាក់បញ្ញើរអតិថិជនបន្តកើនឡើង ១០៧ ទ្រីលានរៀល ប្រហាក់ប្រហែល ២៦ ប៊ីលានដុល្លារអាមេរិក និងឥណទានបានកើនឡើងជាង ១១១ ទ្រីលានរៀល ប្រហែល ២៧ ប៊ីលានដុល្លារអាមេរិក ។
លោកបញ្ជាក់ថា «បច្ចុប្បន្នវិស័យធនាគារកំពុងដំណើរការនៅកម្ពុជារួមមាន៖ ធនាគារពាណិជ្ជមានចំនួន ៤៤ កន្លែង ក្នុងនោះមានធនាគារក្នុងស្រុកចំនួន ១៤ ធនាគារបុត្រសម្ព័ន្ធចំនួន ១៧ សាខាមានចំនួន ១៣, ធនាគារឯកទេសចំនួន ១៥ ក្នុងនោះធនាគាររដ្ឋចំនួន ១ ធនាគារក្នុងស្រុក ១១ និងធនាគារបុត្រសម្ព័ន្ធ ៨, និងមានគ្រឹះស្ថានម៉ាក្រូហិរវត្ថុទទួលប្រាក់បញ្ញើរពីសាធារណៈជនមានចំនួន ៧, គ្រឹះស្ថានម៉ាក្រូហិរវត្ថុមិនទទួលទទួលប្រាក់បញ្ញើរចំនួន ៧៤, គ្រឹះស្ថានអភិវឌ្ឍន៍ជនបទ ២៥៦, ក្រុមហ៊ុនកិច្ចសន្យាហិរញ្ញវត្ថុ ១៥ , តំណាងអ្នកផ្ទេភាគី ៤, គ្រឹះស្ថានផ្តល់សេវាទូទាត់ ១៦, ក្រុមហ៊ុនក្រេឌីតរង ចំនួន ៦, ការិយាល័យតំណាងធនាគារបរទេស ៦ និងអាជីវកម្មប្តូរប្រាក់មានចំនួនជិត ៣ ពាន់កន្លែង» ៕ កែសម្រួលដោយ ៖ សុឃាក់
ចែករំលែកព័តមាននេះ