ខេត្តកំពត ៖ រោងសិប្បកម្មកែច្នៃធ្វើគ្រឿងសង្ហាររឹម គ្រែ តុ ទូ ទ្វារ ដ៏ធំមួយកន្លែងត្រូវបានសមត្ថកិច្ចជំនាញរដ្ឋបាលព្រៃឈើដឹកនាំដោយលោកស៊ឹម ឡាប៉័ង នាយខណ្ឌរដ្ឋបាលព្រៃឈើខេត្ត និងកម្លាំងបង្ក្រាបបទល្មើស ការិយាល័យកណ្តាលនគរបាលព្រហ្មទណ្ឌនៃស្នងការដ្ឋាននគរបាលខេត្តដឹកនាំដោយលោកឧត្តមសេនីយ៍ត្រី ម៉ៅ ច័ន្ទមធុរិទ្ធ ស្នងការរងបានចុះទៅបង្ក្រាបនិងប្រមូលឈើហុប ឈើដុល ប្រភេទឈើលេខ១ លេខ២ និងលេខ៣ បានជាង៤០០កំណាត់ ព្រមទាំងរឹបអូសម៉ាស៊ីន ច្រៀកឈើ៥គ្រឿងដឹកមករក្សាទុកនៅខណ្ឌរដ្ឋបាលព្រៃឈើកំពត ។
លោកស៊ឹម ឡាប័ុង នាយខណ្ឌរដ្ឋបាលព្រៃឈើកំពតបានប្រាប់កោះសន្តិភាពថា មុនពេលឈានទៅបង្ក្រាបឈើខុសច្បាប់នៅក្នុងទីតាំងសិប្បកម្មកែច្នៃមួយកន្លែងដែលស្ថិតនៅក្នុងភូមិពោធិ៍ដុះ ឃុំបឹងនិមល ស្រុកឈូក ដែលជាសិប្បកម្មឥតច្បាប់ ហើយមានស្តុកឈើគ្រប់ប្រភេទនេះ ដំបូងលោកបានចាត់បញ្ជាមន្ត្រីរដ្ឋបាលព្រៃឈើចុះសើុបអង្កេត ស្រាវជ្រាវពីពីរទៅបីថ្ងៃមុន ដើម្បីប្រមូលព័ត៌មានពិត រួចទើបរាយការណ៍ជូនទៅលោកអភិបាលខេត្តសុំយោបល់និងការឯកភាព ។
លោកនិយាយទៀតថា ក្រោយពីបានចំណារឯកភាពពីលោកខូយ ឃុនហ៊ួរ អភិបាលខេត្ត លោកក៏បានសុំដីកាពីព្រះរាជអាជ្ញាអមតុលាការខេត្ត ដើម្បីចេញដីកាចុះបង្ក្រាប និងរឹបអូសវត្ថុតាងបទល្មើស ។ ទើបនៅល្ងាចថ្ងៃទី២៧ កុម្ភៈ លោកបានសហការជាមួយកម្លាំងក្រុមអន្តរាគមន៍និងបង្ក្រាបរបស់ការិយាល័យកណ្តាលនគរបាលព្រហ្មទណ្ឌខេត្ត ដែលដឹកនាំដោយលោកឧត្តមសេនីយ៍ម៉ៅ ច័ន្ទមធុរិទ្ធ ស្នងការរងចុះបង្ក្រាប ព្រមទាំងរឹបអូសបានឈើប្រណីតប្រភេទច្រៀកហើយខ្លះ និងឈើដុលមិនទាន់ច្រៀកជាង៤រយកំណាត់នាំមករក្សាទុកនៅខណ្ឌរដ្ឋបាលព្រៃឈើកំពត ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់ ។
លោកជួន សារ៉ា នាយផ្នែករដ្ឋបាលព្រៃឈើកែបឱ្យដឹងថា ម្ចាស់រោងសិប្បកម្មថ្លើមធំអត់ច្បាប់មួយនេះ ក្រោយពីដឹងថា មានកម្លាំងសមត្ថកិច្ចចុះបង្ក្រាបហើយ និងដោយពួកគេដឹងមុនក៏បានគេចខ្លួនពីរោងសិប្បកម្មបានមុនដែរ ។ សង្ស័យខ្មោចស្រុកឱ្យដៃទើបខ្មោចព្រៃគេចខ្លួនទាន់ពេល ។ គួរកត់សម្គាល់ថា រោងសិប្បកម្មជាច្រើនកន្លែងនៅក្នុងចំណុចភូមិ-ឃុំខាងលើនេះ កន្លងមកគឺនាយសង្កាត់រដ្ឋបាលព្រៃឈើស្រុកឈូក និងស្រុកជុំគិរី បានរាយការណ៍ទៅខណ្ឌរដ្ឋបាលព្រៃឈើកំពត តែមួយចំនួនតូចដែលមានច្បាប់។
រីឯរោងសិប្បកម្មមួយចំនួនធំដែលគ្មានច្បាប់ ដែលសម្បូរណ៌ទៅដោយខ្លាញ់ ត្រូវបាននាយសង្កាត់មេព្រៃ ស្រុកឈូក និងស្រុកជុំគិរី ពុំបានរាយការណ៍ទៅខណ្ឌរដ្ឋបាលព្រៃឈើកំពតបានដឹងនិងបង់ចំណូលចូលរដ្ឋឡើយ សង្ស័យទុកសម្រាប់ផលប្រយោជន៍ផ្ទាល់ខ្លួន។
ជាក់ស្តែងដូចជារោងសិប្បកម្មដែលស្តុកឈើរាប់រយម៉ែត្រគូបកំពុងធ្វើអាជីវកម្មខុសច្បាប់ខាងលើ បើយោងតាមប្រភពព័ត៌មានពីអ្នកស្រុកនៅក្បែរនោះឱ្យដឹងថា រោងសិប្បកម្មនេះបានធ្វើអាជីវកម្មជាច្រើនឆ្នាំមកហើយ ប៉ុន្តែដោយលោកនាយសង្កាត់លាក់បាំង សម្រាប់ផលប្រយោជន៍ផ្ទាល់ខ្លួន ក៏យូរឆ្នាំដែរ ។ លុះមានការស្រាវជ្រាវដឹងនិងចុះបង្ក្រាប ទើបនាយខណ្ឌដឹងពីទង្វើលាក់បាំងរបស់កូនចៅ ។
ប្រភពពីពលរដ្ឋដដែលឱ្យដឹងទៀតថា នៅក្នុងភូមិសាស្ត្រខាងលើនេះ នៅមានសិប្បកម្មឥតច្បាប់ជាច្រើនទៀតដែលបង់លុយឱ្យមន្ត្រីរដ្ឋបាលព្រៃឈើស្រុកជុំគិរី និងស្រុកឈូក ដែលចាំបាច់ត្រូវបង្ក្រាបហើយ មន្ត្រីណាពុករលួយ ល្មមស្រឿសរសៃហើយ ដើម្បីជាគំរូ តើទុកដល់ណាទៀត ?ការលាក់ឈើច្រើនម្លឹងៗ ពុករលួយមិនធម្មតាឡើយ អាចពុករលួយមានដង្កូវចោះទៀតផង ។ មេព្រៃសង្កាត់ធ្វើការបែបនេះ គេលែងហៅថា មេព្រៃហើយ ។ តាមក្រុមអ្នកវិភាគនិយាយ គួរហៅថា «មេខ្មូត» វិញត្រូវជាង ៕
ចែករំលែកព័តមាននេះ