រាជធានីភ្នំពេញ ៖ បន្ទាប់ពីការខិតខំប្រឹងប្រែងហ្វឹកហាត់ និងការប្រកួតនាពេលកន្លងមក ជាបទពិសោធន៍ ក៏ដូចជាការនាំផ្លូវឆ្ពោះទៅរកភាពជោគជ័យនោះ កីឡាករវាយកូនបាល់លំដាប់កំពូលរបស់កម្ពុជា ប៊ុន កេន្នី ដែលជាកូនខ្មែរកាត់បារាំងមួយរូប បានសម្រេចបំណងរបស់ខ្លួនដោយទទួលជ័យជម្នះដណ្តើមបានជើងឯកព្រឹត្តិការណ៍ប្រកួតវាយកូនបាល់ឯកត្តជនផ្នែកបុរសនៃក្របខ័ណ្ឌ BMW Malaysian National Circuit 2014 ជើងទី១ ឆ្នាំ២០១៤ ក្នុងទីក្រុងកូឡាឡាំពួ ប្រទេសម៉ាឡេសុី ក្រោយពីផ្តួលជើងខ្លាំងម្ចាស់ផ្ទះ Muhammad Ashaari Zainal Abidin ក្នុងលទ្ធផល៦-៤ និង៦-៣ នាវគ្គផ្តាច់ព្រ័ត្រកាលពីថ្ងៃទី២៦ កុម្ភៈ កន្លងទៅ ។
សម្រាប់ការប្រកួតដែលមានអ្នកចូលរួមរហូតដល់១២៨នាក់នោះ ប៊ុន កេន្នី បានចាប់ផ្តើមជាមួយនឹងជ័យជម្នះលើកីឡាករម្ចាស់ផ្ទះ Muhammad Nazif Armaan ក្នុងលទ្ធផល៦-០ និង៦-១ ហើយនៅជុំទីពីរ និងទីបីបន្តឈ្នះកីឡាករក្នុងស្រុកពីររូបទៀត គឺ Mohd Faiz Din និង Sheikh Ameer Abdulah ។ នៅជុំទីបួន រូបគេបានយកឈ្នះលើកីឡាករ Joshua Jordan ជនជាតិម៉ាឡេសុីម្នាក់ទៀត ក្នុងលទ្ធផល៦-២ និង៦-៣ ។ ឈានដល់វគ្គមួយភាគបួនផ្តាច់ព្រ័ត្រ កេន្នី បានយកឈ្នះកីឡាករឥណ្ឌូណេសុី Indra Wijaya ក្នុងលទ្ធផល៦-១ និង៦-៣ ហើយបន្តយកឈ្នះកីឡាករសិង្ហបុរី Joshua Liu ក្នុងលទ្ធផល៦-២ និង៦-០ ចុងក្រោយដែលនាំឱ្យរូបគេទទួលជ័យជម្នះ គឺគេបានបំបាក់កីឡាករម្ចាស់ផ្ទះMuhammad Ashaari ក្នុងលទ្ធផល៦-៤ និង៦-៣ ។
ក្នុងការវិលត្រឡប់ដែលមានការរង់ចាំស្វាគមន៍យ៉ាងកក់ក្តៅពីសំណាក់គ្រូបង្វឹក និងមិត្តរួមអាជីព ប៊ុន កេន្នី បានថ្លែងអំណរគុណដល់សហព័ន្ធកីឡាវាយកូនបាល់កម្ពុជា និងអគ្គលេខាធិការ លោក ទេព រិទ្ធីវិទ្ធ ចំពោះការជឿជាក់យ៉ាងខ្លាំងមកលើរូបគេ ហើយនិងផ្តល់ឱកាសឱ្យគេបានចេញទៅចូលរួមក្នុងការប្រកួតនេះ ។ ជាមួយនេះ កេន្នី ក៏អរគុណផងដែរដល់លោកគ្រូបង្វឹក Braen Aneiros និងសមាជិកផ្សេងទៀតរបស់គាត់ សម្រាប់ការបង្វឹកដល់រូបគេ ។ លោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា ឱ្យដឹងថា កេន្នី បានបញ្ចប់ការប្រកួតនេះក្នុងរយៈពេលយ៉ាងខ្លី ដើម្បីឈ្នះពានរង្វាន់សំខាន់ជាលើកទី១ បើគិតចាប់តាំងពីរូបគេបានឈ្នះពានរង្វាន់ Tanimex-Cup ឆ្នាំ២០១១ នៅប្រទេសវៀតណាម ។ លោកអគ្គលេខាធិការសហព័ន្ធកីឡាវាយកូនបាល់ បានបញ្ជាក់ថា លោកពិតជារីករាយណាស់សម្រាប់លទ្ធផលរបស់ ប៊ុន កេន្នី ។ វាជាជ័យជម្នះដ៏គួរឱ្យកត់សម្គាល់មួយសម្រាប់កីឡាវាយកូនបាល់កម្ពុជា ហើយវាក៏ជាមោទនភាពចំពោះប្រទេសកម្ពុជា ដែលបានបង្ហាញឱ្យអន្តរជាតិបានឃើញពីសក្តានុពលរបស់ប្រទេសយើងផងដែរ ។
បន្ទាប់ពីជ័យជម្នះដែលទទួលបាននេះរួច ប៊ុន កេន្នី នឹងត្រៀមធ្វើដំណើរទៅកាន់ប្រទេសឥណ្ឌានាពេលខាងមុខទៀត ដើម្បីចូលរួមប្រកួតក្នុងព្រឹត្តិការណ៍ Futures 3 ក្នុងខែមីនា មុនពេលចូលរួម Devis Cup ក្នុងខែមេសា ដែលនឹងឈានចូលមកដល់ក្នុងពេលឆាប់ៗនេះ ៕
ចែករំលែកព័តមាននេះ