ខេត្តកំពត ៖ មានករណីគ្រោះថ្នាក់ចរាចរដ៏រន្ធត់មួយបានកើតឡើងកាលពីវេលាម៉ោង៣និង០០នាទីទៀបភ្លឺថ្ងៃទី១៩ ខែសីហា ឆ្នាំ ២០១៩ លើកំណាត់ផ្លូវជាតិលេខ៣៣ កំពត-កំពង់ត្រាច ត្រង់ចំណុចចន្លោះបង្គោលគីឡូម៉ែត្រលេខ៤ និងលេខ៥…
ខេត្តកំពត ៖ មានករណីគ្រោះថ្នាក់ចរាចរដ៏រន្ធត់មួយបានកើតឡើងកាលពីវេលាម៉ោង៣និង០០នាទីទៀបភ្លឺថ្ងៃទី១៩ ខែសីហា ឆ្នាំ ២០១៩ លើកំណាត់ផ្លូវជាតិលេខ៣៣ កំពត-កំពង់ត្រាច ត្រង់ចំណុចចន្លោះបង្គោលគីឡូម៉ែត្រលេខ៤ និងលេខ៥ ស្ថិតក្នុងភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត បង្កឡើងរវាងរថយន្តម៉ាកហ៊ីយ៉ាន់ដាយសន្តោងរ៉ឺម៉ក និងរថយន្តម៉ាកHighlander បុកគ្នាក្នុងទិសដៅស្របគ្នាពីលិចទៅកើត ។
ប្រភពពីសមត្ថកិច្ចបានឲ្យដឹងថា ក្នុងហេតុការនេះបណ្តាលឲ្យអ្នកជិះក្នុងរថយន្ត Highlander ដែលជាមន្ត្រីនគរបាលអន្តោប្រវេសន៍ប៉ុស្តិ៍ព្រែកចាកចំនួន៥នាក់ស្លាប់៣នាក់នៅកន្លែងកើតហេតុ និងស្លាប់១នាក់ទៀតពេលបញ្ជូនដល់មន្ទីរពេទ្យ រងរបួសស្រាលម្នាក់ ។
ប្រភពដដែលបន្តថា រថយន្តម៉ាកហ៊ីយ៉ាន់ដាយ ពណ៌ស សណ្ដោងរ៉ឺម៉កដឹកស៊ីម៉ង់ត៍ក្បាលពាក់ផ្លាកលេខ ព្រះសីហនុ 3A-1861 បើកបរក្នុងទិសដៅពីលិចទៅកើតលុះដល់ចំណុចកើតហេតុក៏ស្រាប់តែរថយន្តម៉ាក Highlander បុកពីក្រោយយ៉ាងពេញទំហឹងដាច់ផ្លាកលេខរថយន្តខាងមុខបាត់ រួចរថយន្តហ៊ីយ៉ាន់ដាយដែលបើកបរពីមុខត្រូវគេបុកនោះបានអូសជាច្រើនរយម៉ែត្រពីកន្លែងបុកទើបឈប់ ហើយអ្នកបើកបរឃើញហេតុការដូច្នេះក៏ចុះរត់គេចខ្លួនបាត់ ។
រថយន្តដែលបុកគូថគេពីក្រោយម៉ាក Highlander ពណ៌ស្ករ ពាក់ផ្លាកលេខ ភ្នំពេញ 2Z-0241 បើកបរដោយឈ្មោះ ងួន សារ៉ាត់ ភេទប្រុស អាយុ៣៤ឆ្នាំ មុខរបបប៉ូលិសអន្តោប្រវេសន៍ នៅព្រែកចាក ស្លាប់ពេលបញ្ជូនទៅដល់មន្ទីរពេទ្យ និងមានអ្នករួមដំណើរ៤នាក់ទៀតមានទី១-ឈ្មោះ ញឹប ភីរក្ស ភេទប្រុស មានទីលំនៅនៅភ្នំពេញ មុខរបរមន្ត្រីអន្តោប្រវេសន៍មានឋានន្តរសក្តិជាវីរសេនីយ៍ឯក, ទី២-ឈ្មោះ តាន់ ផេង ភេទប្រុស អាយុ៣៧ឆ្នាំ នៅភ្នំពេញ ជាមន្ត្រីប៉ុស្តិ៍អន្តោប្រវេសន៍ មានឋានន្តរសក្តិវីរសេនីយទោ, ទី៣-ឈ្មោះ ឃី ឡុក ភេទប្រុស អាយុ៤០ឆ្នាំ មុខរបបមន្ត្រីអន្តោប្រវេសន៍មានឋានន្តរសក្តិវីរសេនីយទោ អ្នកទាំងបីស្លាប់នៅក្នុងរថយន្ដនោះតែម្ដង ។ ទី៤-ឈ្មោះ ថៃ វីរ ភេទប្រុស អាយុ៣៥ឆ្នាំ មុខរបរមន្ត្រីអន្តោប្រវេសន៍មានឋានន្តរសក្តិអនុសេនីយ៍ឯក រងរបួសស្រាលបញ្ជូនទៅមន្ទីរពេទ្យបង្អែកខេត្តកំពត ។
ក្រោយកើតហេតុយានយន្តទាំងពីរគ្រឿងត្រូវបានសមត្ថកិច្ចស្ទូចយកទៅរក្សាទុកនៅអធិការដ្ឋាននគរបាលស្រុកទឹកឈូរង់ចាំដោះស្រាយតាមច្បាប់នៅពេលក្រោយ ៕
កែសម្រួលដោយ ៖ សំណាង
ចែករំលែកព័តមាននេះ