ខេត្តបាត់ដំបង ៖ លោកចាន់ ម៉ៅ អាយុ៦២ឆ្នាំ ជាឪពុកជនរងគ្រោះម្នាក់ដែលស្លាប់ស្អុយរលួយនៅខាងក្រៅមណ្ឌលកែប្រែគ្រឿងញៀននៅស្រុកបវេលបានប្រាប់កោះសន្តិភាពតាមទូរស័ព្ទនៅរសៀលថ្ងៃទី២៦ កុម្ភៈ២០១៤ ថា កូនប្រុសរបស់គាត់អាចស្លាប់ដោយការប្រើអំពើហិង្សាឃោរឃៅនៅក្នុងមណ្ឌល រួចត្រូវគេអូសយកទៅចោលនៅខាងក្រៅមណ្ឌលដើម្បីបំភ័ន្តភ្នែក និងបំបាត់ដានក្រោយពីកូនប្រុសគាត់ព្យាយាមរត់ចេញពីមណ្ឌលមិនបានសម្រេចកាលពីជាងមួយសប្តាហ៍មុន ។
លោកចាន់ ម៉ៅ បានបញ្ជាក់ថា តាមដែលលោកបានសួរនាំអំពីដំណើររឿងនេះពីកូនប្រុសរបស់លោកមិនមែនស្លាប់ដោយសារខ្យល់គ ឬក្រោមហេតុផលផ្សេងៗដូចការសន្និដ្ឋានរបស់បុគ្គលិកគ្រប់គ្រងមណ្ឌលកែប្រែគ្រឿងញៀន គ្រាដែលកូនប្រុសលោករត់ចេញពីមណ្ឌលជាមួយអ្នកញៀនថ្នាំជាង១០នាក់ទៀតនោះទេ។ លោកនិយាយថា សន្តិសុខម្នាក់បានបញ្ជាក់ប្រាប់លោកយ៉ាងច្បាស់អំពីរឿងនេះថា ពេលដែលក្រុមអ្នកញៀនថ្នាំជាច្រើននាក់បានសម្រុករត់ចេញពីមណ្ឌលទាំងកណ្តាលថ្ងៃត្រង់ គឺសន្តិសុខបានចាប់កូនប្រុសគាត់ជាប់ រួចរុញចូលទៅក្នុងមណ្ឌលវិញ ខណៈមានអ្នកញៀនថ្នាំ១២នាក់បានរត់រួចពីមណ្ឌលតាមទ្វារមុខ។
ដូច្នេះបានន័យថា កូនប្រុសរបស់គាត់មិនបានរត់រួចពីក្នុងមណ្ឌលដូចការលើកឡើងរបស់អ្នកគ្រប់គ្រងមណ្ឌលឈ្មោះប៊ុនធឿននោះទេ។ លោកចាន់ ម៉ៅ បានបញ្ជាក់ថា ទាំងបុគ្គលិក ទាំងសន្តិសុខមួយចំនួនហាក់ដូចជាមានការបិតបាំងអំពីរឿងនេះ ពេលដែលលោកសួរនាំសូម្បីតែក្រុមយុវជនញៀនថ្នាំនៅក្នុងមណ្ឌលនេះក៏គេហាមមិនឱ្យនិយាយអំពីរឿងនេះដែរ។
សូមបញ្ជាក់ថា ឈ្មោះសុទ្ធ រចនា អាយុ២៥ឆ្នាំ រស់នៅភូមិដូង ឃុំបឹងរាំង ស្រុកកំរៀង ត្រូវអាណាព្យាបាលបញ្ជូនមកស្នាក់នៅក្នុងមណ្ឌលអប់រំកែប្រែគ្រឿងញៀននៅក្នុងភូមិដំណាក់ដង្កោរ ឃុំក្តុលតាហែន ស្រុកបវេល កាលពីថ្ងៃទី១៣ តុលា ២០១៣ ដែលក្រុមគ្រួសារអះអាងថា ដោយសារញៀនថ្នាំ និងមានវិបត្តិផ្លូវចិត្តធ្ងន់ធ្ងរ។ ក្រោយពីមកស្នាក់នៅក្នុងមណ្ឌលនេះបានជា៤ខែ សុទ្ធ រចនា និងអ្នកញៀនថ្នាំជាង១០នាក់ទៀតបានព្យាយាមរត់ចេញពីក្នុងមណ្ឌលនៅវេលាម៉ោង១១ថ្ងៃត្រង់ ថ្ងៃទី១៧ កុម្ភៈ ២០១៤ ហើយបានបាត់ខ្លួនរហូតមិនដឹងថា ពួកគេទៅណាមកណាទេ។ លុះនៅព្រឹកថ្ងៃទី២៥ កុម្ភៈ ស្រាប់តែឈ្មោះសុទ្ធ រចនា ត្រូវគេប្រទះឃើញដេកស្លាប់ស្អុយរលួយនៅកណ្តាលវាលស្រែខាងលិចមណ្ឌលអប់រំកែប្រែគ្រឿងញៀននេះប្រហែលជា៣០០ម៉ែត្រ ដោយគ្មានមូលហេតុធ្វើឱ្យមានការភ្ញាក់ផ្អើលយ៉ាងខ្លាំង៕
ចែករំលែកព័តមាននេះ