រាជធានីភ្នំពេញ៖ កម្ពុជាដែលកាលពីគ្រាមុនជាប្រទេសមួយត្រូវទទួលរងនូវការហ៊ុំព័ទ្ធ និងឯកោទាំងខាងនយោបាយនិងសេដ្ឋកិច្ច ប៉ុន្តែបច្ចុប្បន្នកម្ពុជាបានក្លាយទៅជាប្រទេសដែលកំពុងធ្វើសមារហណកម្មខ្លួនយ៉ាងសកម្មចូលទៅក្នុងរចនាសម្ព័ន្ធ និងនិម្មាបនកម្មតំបន់ និងពិភពលោក នឹងកំពុងតែដើរតួនាទីយ៉ាងសកម្មដោយស្មើសិទ្ធិ និងស្មើភាពគ្នាក្នុងគ្រប់កិច្ចការតំបន់ និងនៅលើឆាកអន្តរជាតិ។ នេះបើតាមមន្ត្រីជាន់ខ្ពស់ក្រសួងពាណិជ្ជកម្មថ្លែងក្នុងកម្មវិធី ផ្គូរផ្គងអាជីវកម្ម សម្រាប់សហគ្រាសកែច្នៃម្ហូបអាហារ និងផលិតផលកសិកម្ម ឆ្នាំ២០១៩ កាលពីថ្ងៃទី ១៦សីហានេះ។
លោកបណ្ឌិត សំ សិរីរតន៍ រដ្ឋលេខាធិការក្រសួងពាណិជ្ជកម្មមានប្រសាសន៍ថា ផ្អែកលើកិច្ចខិតខំប្រឹងប្រែងរបស់រាជរដ្ឋាភិបាល បានជំរុញឱ្យសេដ្ឋកិច្ចកម្ពុជាមានការវិវឌ្ឍន៍ ទៅមុខប្រកបដោយភាពវិជ្ជមាន និងធន់នឹងវិបត្តិ ដែលមានកំណើនប្រមាណជាង ៧ ភាគរយ ក្នុងមួយឆ្នាំ។
ជាក់ស្តែង កាលពីឆ្នាំ២០១៨ កន្លងទៅ កម្ពុជាសម្រេចបានកំណើនសេដ្ឋកិច្ចខ្ពស់ក្នុងរង្វង់ ៧.៥ ភាគរយ ដែលកំណើន នេះទទួលបានពីវិស័យកសិកម្ម សន្ទុះកើនឡើងនៃវិស័យ ទេសចរណ៍ វិស័យកម្មមន្តសាល សំណង់ កំណើននៃការលក់ដុំ-លក់រាយ វិស័យសេវាកម្ម វិស័យដឹកជញ្ជូន និងទូរគមនាគមន៍ និងវិស័យ បន្ទាប់សបន្សំផ្សេងទៀត។
លោកបណ្ឌិតបានគូសបញ្ជាក់ថា «ចំពោះវិស័យពាណិជ្ជកម្មនេះវិញ កម្ពុជាបានបើកទីផ្សារទូលំទូលាយ និងនាំចេញទំនិញទៅកាន់ទីផ្សារចំនួន ១៤៧ប្រទេស ក្នុងទំហំប្រមាណ ៦០% នៃ ផ.ស.ស និងនាំចូលទំនិញមកបម្រើការផលិត និងប្រើប្រាស់ពី ១៣៥ប្រទេស ក្នុងទំហំប្រមាណ ៦៥% នៃ ផ.ស.ស។
កាលពីឆ្នាំ២០១៨ កន្លងទៅ កម្ពុជាបាននាំចេញ ទំនិញទៅកាន់ទីផ្សារអន្តរជាតិមានតម្លៃប្រមាណ ១៣.០៤៨ លានដុល្លារ រីឯការនាំចូលមកវិញមានតម្លៃ ១៨.៥៩០ លានដុល្លារ ដែលធ្វើឱ្យទំហំពាណិជ្ជកម្មអន្តរជាតិ សម្រេចបានក្នុងចំនួនទឹកប្រាក់ប្រមាណ ៣១.៦៣៨ លានដុល្លារអាមេរិក ។ ហើយដៃគូពាណិជ្ជកម្មសំខាន់ៗ របស់កម្ពុជា រួមមានៈ សហរដ្ឋអាមេរិក ចិន ហុងកុង សិង្ហបូរី កាណាដា ថៃឡង់ដ៍ និងវៀតណាម ជាដើម»។
លោកបណ្ឌិតលើកឡើងថា ផ្អែកលើភាពរីកចម្រើននេះ បានជំរុញឱ្យសេដ្ឋកិច្ចកម្ពុជា បានឈានដល់តំណាក់កាលប្រែប្រួល ថ្មីដែលជាដំណាក់កាលមួយឆ្ពោះទៅរកការសម្រេចបាននូវឋានៈជាប្រទេស ដែលមានប្រាក់ចំណូលមធ្យម កម្រិតទាប ហើយក្នុងកម្មវិធីនយោបាយរបស់រាជរដ្ឋាភិបាលកម្ពុជានីតិកាលទី៦នេះ ក៏បានគូសបញ្ជាក់ យ៉ាងច្បាស់ថា
អណត្តិនេះសំដៅឆ្លើយតបទៅនឹងបំណងប្រាថ្នាដ៏ពិសិដ្ឋរបស់ប្រជាជនកម្ពុជា ព្រមទាំង សំដៅដល់ការកសាងមូលដ្ឋានគ្រឹះ ចាំបាច់ទាំងឡាយឆ្ពោះទៅរកគោលដៅនៃចក្ខុវិស័យកម្ពុជា ជាប្រទេស ទទួលបានប្រាក់ចំណូលមធ្យមកម្រិតខ្ពស់ ក្នុងឆ្នាំ២០៣០ និងជាប្រទេសដែលមានប្រាក់ចំណូលខ្ពស់ក្នុង ឆ្នាំ២០៥០ ខាងមុខ ៕ (កែសម្រួលដោយ ៖ បុប្ផា)
ចែករំលែកព័តមាននេះ