រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា ចង់ឃើញស្ថានភាពនៅក្នុងទីក្រុងហុងកុង ប្រទេសចិន មានភាពស្ថានភាពដូចប្រក្រតីឡើងវិញឲ្យបានឆាប់ ដើម្បីឱ្យប្រជាជនរស់នៅដោយសុខសន្តិភាព។ នេះបើយោងតាមសេចក្តីថ្លែងការណ៍របស់ក្រសួងការបរទេស និងសហប្រតិបត្តិកាអន្តរជាតិកម្ពុជា។
ការចង់បានរបស់កម្ពុជា ខណៈដែលប្រជាជននៅទីក្រុងហុងកុង ប្រទេសចិន បានកំពុងតែមានបាតុកម្មយ៉ាងខ្លាំង។
យោងតាមសេចក្តីថ្លែងការណ៍របស់ក្រសួងការបរទេសកម្ពុជា ចេញផ្សាយកាលពីថ្ងៃទី១៧ សីហា ឆ្នាំ២០១៩ បានឲ្យដឹងថា ប្រទេសកម្ពុជាគោរព «គោលនយោបាយចិនមួយ» ហើយចាត់ទុកស្ថានការណ៍ដែលកំពុងវិវត្តន៍នៅក្នុងទីក្រុងហុងកុង ជាកិច្ចការផ្ទៃក្នុងរបស់សាធារណរដ្ឋប្រជាមានិតចិន។
ប្រទេសកម្ពុជា គាំទ្រនូវរាល់ចំណាត់ការចំបាច់នានា របស់រដ្ឋាភិបាលនៃសាធារណរដ្ឋប្រជាមានិតចិន និងតំបន់រដ្ឋបាល ពិសេសទីក្រុងហុងកុង ដើម្បីរក្សាសន្តិភាព សណ្តាប់ធ្នាប់សាធារណៈ សន្តិសុខជាតិ និងការរួមរស់នៅជាមួយគ្នាប្រកបដោយភាពសុខដុមរមនាក្នុងសង្គម ដោយអនុលោមទៅតាមច្បាប់ និងបទប្បញ្ញត្តិទាំងឡាយរបស់ប្រទេស និងការប្រតិបត្តិជាអន្តរជាតិ។
ប្រទេសកម្ពុជា ចង់ឃើញការត្រឡប់មករកប្រក្រតីភាពឱ្យបានឆាប់ នូវជីវភាពរស់នៅប្រកបដោយសុខសន្តិភាពរបស់ប្រជាជនហុងកុងទាំងមូល៕ (កែសម្រួលដោយ ៖ បុប្ផា)
ចែករំលែកព័តមាននេះ