រាជធានីភ្នំពេញ ៖ បុរស២នាក់បងប្អូន និងជាកូនវីរកងទ័ព បានរងរបួសធ្ងន់ទាំងសងខាង បន្ទាប់ពីមានទំនាស់គ្នា រឿងដើរលេងចូលផ្ទះពេលយប់ជ្រៅ ហើយឈានទៅប្រើអំពើហិង្សាវាយកាប់ចាក់គ្នា យ៉ាងស៊ីសាច់ហុតឈាមបណ្តាលឱ្យឈាមហូរពេញផ្ទះ។
ហេតុការណ៍នេះបានបង្កឱ្យមានការភ្ញាក់ផ្អើលឡើងកាលពីម៉ោង១១យប់ ថ្ងៃទី២២ ខែមិថុនា ឆ្នាំ២០២៦ នៅចំណុចផ្ទះរបស់ខ្លួន ស្ថិតនៅតាមបណ្តោយផ្លូវបេតុង ភូមិទ្រុងមាន់ សង្កាត់អូបែកក្អម ខណ្ឌសែនសុខ រាជធានីភ្នំពេញ។ លុះនៅវេលាម៉ោង១១និង ៣០នាទីព្រឹក ថ្ងៃទី២៣ ខែមិថុនា ឆ្នាំ២០២៦ បន្ទាប់ពីឡោមព័ទ្ធអស់ ១យប់ សមត្ថកិច្ចក៏បានសហការជាមួយឪពុក ដែលជាវីរកងទ័ព បើកទ្វារក្នុងគោលបំណងនាំខ្លួនជនសង្ស័យជាបង ដែលបានចាក់សោនៅក្នុងផ្ទះ ស្រាប់តែប្រទះឃើញដេកនៅក្នុងថ្លុកឈាម រួចក៏ទាក់ទងហៅរថយន្តសង្គ្រោះ ដើម្បីបញ្ជូនទៅមន្ទីរពេទ្យ ផងដែរ។
ជនដៃដល់ត្រូវជាបង មានឈ្មោះ សោម ចាន់តារា ហៅ អាធុយ ភេទប្រុស អាយុ ៤២ឆ្នាំ មុខរបរនៅផ្ទះ ស្នាក់នៅផ្ទះកើតហេតុខាងលើ ធ្លាប់ប្រើប្រាស់គ្រឿងញៀន និងបានរងរបួសធ្ងន់។ ចំណែកជនរងគ្រោះត្រូវជាប្អូន ឈ្មោះ សោម ចាន់សីហា ភេទប្រុស អាយុ ៣៨ឆ្នាំ មុខរបររត់កង់បី ស្នាក់នៅផ្ទះកើតហេតុ ក៏បានរងរបួសធ្ងន់ដែរ។
តាមស្ត្រីជាម្តាយបានឱ្យដឹងថា គាត់និងកូនប្រុស ២នាក់ បានស្នាក់នៅជាមួយគ្នា ដោយឪពុកជាវីរកងទ័ព ប្រចាំនៅខេត្តកោះកុង។ កូនប្រុសច្បងជាមនុស្សធ្លាប់ប្រើប្រាស់គ្រឿងញៀន ទោះជាណែនាំ ក៏លែងស្តាប់ដែរ។ ហើយនៅយប់ថ្ងៃកើតហេតុ កូនប្រុសពៅ ដែលជាអ្នករត់ម៉ូតូកង់បី បានចូលផ្ទះយប់ជ្រៅ ទាំងមានស្ថានភាពស្រវឹង ទើបបង្កឱ្យមានទំនាស់គ្នាមួយបង ដោយសារតែបងខឹងនឹងប្អូនមកផ្ទះយប់ជ្រៅ រំខានដល់ការសម្រាករបស់ខ្លួន ។
តាមព័ត៌មានបានឱ្យដឹងទៀតថា ការទាស់ទែងគ្នានេះ ក៏ឈានទៅប្រើអំពើហិង្សាកាប់ចាក់គ្នា បណ្តាលឱ្យបុរសជាប្អូនរងរបួសធ្ងន់ ហើយត្រូវបានម្តាយនិងអ្នកជិតខាងហៅម៉ូតូកង់បី បញ្ជូនទៅសង្គ្រោះនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ។ ដោយឡែកជនសង្ស័យជាបង មុនដំបូងឡើយគេពុំដឹងថា មានរបួសនោះទេ ដោយរូបគេបានចូលក្នុងផ្ទះបិទទ្វារសម្ងំលាក់ខ្លួន ទើបសមត្ថកិច្ចកងរាជអាវុធហត្ថ និងនគរបាលខណ្ឌសែនសុខ បានឡោមព័ទ្ធអស់ ១យប់។ បន្ទាប់មក ម្តាយបានទាក់ទងទៅឪពុក ដែលជាកងទ័ពឱ្យមកជួយ និងបានសហការជាមួយសមត្ថកិច្ច ដោយមានប្រដាប់ដោយដែកទាស់ និងដំបងឆក់ ដើម្បីបើកទ្វារចូល ក្នុងគោលបំណងចាប់ខ្លួន ស្រាប់តែប្រទះឃើញបុរសជាបង បានរងរបួសធ្ងន់ ដេកក្នុងថ្លុកឈាមនៅជាន់ទី១ ហើយក៏បានហៅរថយន្តសង្គ្រោះ មកដឹកយកទៅព្យាបាល។ នៅព្រឹកថ្ងៃដដែលនេះ សមត្ថកិច្ចបានដកហូតកាំបិតផ្គាក់ និងដំបងដែក ដែលបងប្អូនទាំង ២ នាក់ ប្រើប្រាស់សម្រាប់វាយកាប់ចាក់គ្នាផងដែរ៕
ចែករំលែកព័តមាននេះ