រាជធានីភ្នំពេញ ៖ ប្រជាពលរដ្ឋមកពីសហគមន៍បឹងកក់ បុរីកីឡា ថ្មគោល សមាគម សហជីព និងបណ្តាញសង្ឃឯករាជ្យ ប្រមាណជា១០០នាក់/អង្គ បាននាំគ្នាកាន់បដាពាក្យស្លោក ផ្កាឈូក និងធូប ប្រមូលផ្តុំគ្នា និងដង្ហែក្បួនជុំវិញតុលាការកំពូលចំនួន៣ជុំ ដែលស្ថិតនៅកែងផ្លូវលេខ២១៤ និងវិថីសុធារស សង្កាត់ចតុមុខ ខណ្ឌដូនពេញ កាលពីវេលាម៉ោង៨ និង៣០នាទីព្រឹក ថ្ងៃទី២៥ កុម្ភៈ ដើម្បីដាក់ញត្តិសុំឱ្យតុលាការកំពូល ពន្លឿនការកាត់ក្តីឱ្យបានឆាប់រហ័សបំផុត ចំពោះករណីចាប់ខ្លួនលោក ចាន់ ពុទ្ធិស័ក្តិ សកម្មជនការពារសិទ្ធលំនៅឋានក្នុងតំបន់បឹងកក់ លោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធ និងលោក ថេង សារឿន សកម្មជនការពារសិទ្ធិមនុស្ស ព្រមទាំងកម្មករចំនួន១៨នាក់ទៀត ។
នៅវេលាម៉ោង៩ព្រឹក ថ្ងៃដដែល ក្រោយពីនាំគ្នាអុជធូប និងម្នាក់ៗនៅនឹងដៃ មានកាន់ផ្កាឈូក និងពាក្យស្លោកផង បានដង្ហែជាក្បួនដឹកនាំដោយសង្ឃព្រះនាម ប៊ុត ប៊ុនតិញ អ្នកស្រី ទេព វន្នី លោក ម៉ម សូណង់ដូ លោក រ៉ុង ឈុន និងសកម្មជនផ្សេងៗទៀត បានដើរចំនួន៣ជុំតុលាការកំពូល ដើម្បីសម្តែងការគាំទ្រឱ្យមានការដោះលែងអ្នកដែលចាត់ទុកថា ជាសកម្មជនសិទ្ធិលំនៅឋាន សិទ្ធិមនុស្ស និងកម្មករដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ ចាម ។ តំណាងសកម្មជនទាំង៤នាក់ ដឹកនាំដោយអ្នកស្រី ទេព វន្នី ត្រូវបានតុលាការកំពូលអនុញ្ញាតឱ្យយកញត្តិទៅដាក់នៅផ្នែករដ្ឋបាល តែគ្មានមន្ត្រីណាម្នាក់ដែលទទួលញត្តិនោះសន្យាថាយ៉ាងណានោះទេ គ្រាន់តែប្រាប់ទៅសកម្មជនថា នឹងរាយការណ៍ជូនថ្នាក់លើ ។ នេះបើតាមមន្ត្រីសាលាខណ្ឌដូនពេញប្រាប់ឱ្យដឹង ។ យោងតាមញត្តិរបស់សកម្មជនបឹងកក់ ដែលដាក់ចូលទៅរដ្ឋបាលតុលាការកំពូល ឱ្យដឹងថា គោលបំណងដង្ហែក្បួន៣ជុំ និងដាក់ញត្តិចូលតុលាការកំពូលនេះ គឺសូមឱ្យតុលាការជួយពន្លឿនការកាត់ក្តីឱ្យបានឆាប់បំផុត ករណីចាប់ខ្លួនលោក ចាន់ ពុទ្ធិស័ក្តិ សកម្មជនការពារសិទ្ធិលំនៅឋាន ក្នុងតំបន់បឹងកក់ លោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធ និងលោក ថេង សារឿន សកម្មជនការពារសិទ្ធិមនុស្ស ព្រមទាំងកម្មករចំនួន១៨នាក់ទៀត ដោយសុំឱ្យផ្តល់យុត្តិធម៌ដល់ពួកគេទាំងនោះឱ្យរួចខ្លួនចេញពីពន្ធនាគារ ។
មន្ត្រីសាលាខណ្ឌដូនពេញ ឱ្យដឹងថា នៅវេលាម៉ោងជិត១០ព្រឹក ថ្ងៃដដែល លោក សម រង្សុី ប្រធានគណបក្សសង្គ្រោះជាតិ បានជិះរថយន្តពណ៌ស អមដំណើរដោយអង្គរក្ស បានឈប់រថយន្តនៅច្រកចូលខាងជើងតុលាការកំពូល ដែលសកម្មជនប្រមូលផ្តុំគ្នា ហើយបានថ្លែង និងឆ្លើយសំណួរទៅអ្នកសារព័ត៌មាន និងវិទ្យុក្នុងស្រុកថា លោកមកកាន់ទីនេះដើម្បីចូលរួម ក៏ដូចជាទាមទារឱ្យមានការដោះលែងសកម្មជនសិទ្ធិលំនៅឋាន សកម្មជនការពារសិទ្ធិមនុស្ស ប្រធានសមាគមសេដ្ឋកិច្ចក្រៅប្រព័ន្ធ និងកម្មករចំនួន១៨នាក់ទៀត ឱ្យរួចពីការឃុំខ្លួន ហើយសុំឱ្យរាជរដ្ឋាភិបាល ត្រូវចាប់ខ្លួនជនដៃដល់ដែលបាញ់សម្លាប់កម្មករ យកមកផ្តន្ទាទោសផង ។ ជាមួយគ្នានេះ លោក សម រង្សុី ក៏បានឆ្លើយតបទៅវិទ្យុក្នុងស្រុកមួយថា បើសិនជាករណីចាំបាច់ លោកនឹងដាក់បញ្ហានេះក្នុងការចរចាជាមួយគណបក្សប្រជាជនកម្ពុជា ។ នៅវេលាម៉ោង១០ និង៣០នាទីព្រឹក បន្ទាប់ពីលោក សម រង្សុី ចាកចេញទៅ សកម្មជនបឹងកក់ បុរីកីឡា ថ្មគោល សមាគម សហជីព និងបណ្តាញព្រះសង្ឃ បាននាំគ្នារំសាយក្រោមការឃ្លាំមើលពីកម្លាំងសមត្ថកិច្ច ហើយក្នុងការប្រមូលផ្តុំនៅមុខតុលាការកំពូលនេះ មិនមានការរារាំងពីអាជ្ញាធរឡើយ ។
គួរបញ្ជាក់ថា មនុស្សចំនួន២៣នាក់ ដែលមានក្រុមសកម្មជនសិទ្ធិមនុស្ស សកម្មជនដីធ្លី និងកម្មករ ត្រូវបានអាជ្ញាធរមានសមត្ថកិច្ច ចាប់ខ្លួននៅកន្លែងផ្សេងគ្នា គឺក្រុមលោក វន់ ពៅ រួមទាំងកម្មករសរុបទាំងអស់១០នាក់ ត្រូវចាប់ខ្លួននៅចំណុចរោងចក្រយ៉ាក ជីន ជិតតំបន់សេដ្ឋកិច្ចពិសេសកំបូល កាលពីថ្ងៃទី២ ខែមករា ឆ្នាំ២០១៤ ។ ចំណែក១៣នាក់ផ្សេងទៀត ចាប់ខ្លួននៅចំណុចសួនឧស្សាហកម្មកាណាឌីយ៉ា ផ្លូវចោមចៅ កាលពីថ្ងៃទី៣ ខែមករា ឆ្នាំ២០១៤ ក្នុងអំឡុងពេលមានការតវ៉ាឱ្យដំឡើងប្រាក់ឈ្នួលគោលដល់កម្មកររោងចក្រកាត់ដេរ ។ មនុស្សទាំង២៣នាក់នេះ ត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តកំពង់ចាម ហើយក្នុងចំណោមនេះ មាន២នាក់ ត្រូវបានសាលាដំបូងរាជធានីភ្នំពេញ សម្រេចដោះលែងឱ្យនៅក្រៅឃុំជាបណ្តោះអាសន្ន កាលពីថ្ងៃទី៨ កុម្ភៈ ឆ្នាំ២០១៤។
កាលពីថ្ងៃទី១១ កុម្ភៈ ឆ្នាំ២០១៤ វេលាម៉ោង១១ និង៣០នាទីព្រឹក សាលាឧទ្ធរណ៍ បានសម្រេចតម្កល់ការសម្រេចរបស់សាលាដំបូងរាជធានីភ្នំពេញ ឱ្យនៅដដែល ដោយមិនអនុញ្ញាតឱ្យមនុស្សទាំង២១នាក់ ដែលកំពុងជាប់ឃុំនៅក្នុងពន្ធនាគារត្រពាំងផ្លុង ខេត្តកំពង់ចាម ស្ថិតនៅក្រៅឃុំជាបណ្តោះអាសន្នតាមការស្នើសុំរបស់មេធាវីជនជាប់ចោទទេ ៕
ចែករំលែកព័តមាននេះ