ខេត្តកំពង់ស្ពឺ ៖ ស្ត្រីម្នាក់មានជីវភាពក្រលំបាកសុំដីសហគមន៍រស់នៅដើរជីកត្រពាំង និងចាក់អង្ក្រងលក់យកលុយតិចតួចទិញអង្កដាំបាយហូបចិញ្ចឹមម្តាយចាស់ជរា ប្តីពិការជិះលើរទេះរុញ ថែមទាំងផ្គត់ផ្គង់លុយកាក់អោយកូនប្រុស២នាក់រៀនបានដាច់ចិត្តលើកដៃសំពះក្រែងមានសប្បុរសជនទាំងក្នុង និងក្រៅប្រទេសជួយជាពិសេសកាកបាទក្រហមកម្ពុជាផងដែរ ។
រៀបរាប់ប្រាប់អ្នកព័ត៌មានទាំងទឹកមុខស្រងូតស្រងាត់ថា អ្នកស្រីមានឈ្មោះ លុយ អាន អាយុ៣៨ឆ្នាំ មុខរបរដើរជីកត្រពាំងក្នុងព្រៃ និងដើរចាក់អង្ក្រងស្នាក់នៅកន្លែងតំបន់តេទឹកពុះ (សុំដីសហគមន៍ស្នាក់នៅ) ក្នុងភូមិពុទ្រា ឃុំត្រពាំងជោ ស្រុកឱរ៉ាល់ មានប្តីឈ្មោះ មឹក ញ៉ាញ់ អាយុ៣៦ឆ្នាំ ពិការជាង២ឆ្នាំមកហើយ មានកូនប្រុស២នាក់ កូនបងអាយុ១៥ឆ្នាំ និងកូនប្អូនអាយុ១២ឆ្នាំ ថែមទាំងមើលថែម្តាយជរាម្នាក់ទៀតមានឈ្មោះ គាំ ឡា អាយុ៨៦ឆ្នាំ ។
អ្នកស្រីបានបន្តថា យប់ម៉ោង១០ទៅហើយក្រុមគ្រួសារគេដទៃចូលសំរាកអស់ហើយ ចំណែកអ្នកស្រីវិញនៅចិតត្រពាំងទុកសំរាប់លក់នៅពេលព្រឹក ដោយរាល់ថ្ងៃអ្នកស្រីដើរជីកត្រពាំងក្នុងព្រៃ និងចាក់អង្ក្រងបានប្រាក់តិចតួចគ្រាន់បានទិញអង្កដាំបាយហូបគ្រាន់បានរស់នៅដូចគេឯង ក្នុងមួយថ្ងៃអ្នកស្រីរកចំណូល១ម៉ឺនទៅ២ម៉ឺនរៀលប៉ុណ្ណោះ ។ ជួនកាលថ្ងៃខ្លះលក់អត់ដាច់ក៏មានដេកអត់បាយទាំងអស់គ្នា ហើយខែនេះជាខែវស្សាភ្លៀងខ្យល់ សាចទទឹកជោកមិនបានសំរាកទេ អ្នកស្រីមានការអាណិតប្តី អាណិតម្តាយចាស់ និងកូនប្រុស២នាក់ខ្លាំងណាស់ ។
សម្រាប់ការរស់នៅសព្វថ្ងៃមានការលំបាកខ្លាំងណាស់បានព្រឹកខ្វះល្ងាច ប៉ុន្តែអ្នកស្រីមិនតូចចិត្តឡើយអោយតែបានរស់នៅជួបជុំអ្នកមានគុណ ប្តីពិការជិះលើរទេះ និងកូនសំលាញ់ទាំង២នាក់ អ្នកស្រីសុខចិត្ត ។ ពេលព្រឹកឡើងត្រូវរុញប្តីទៅងូតទឹក មើលថែទឹកត្រជាក់ទឹកក្តៅ ណាមើលថែម្តាយជរា រួចហើយបន្តដើរទៅជីកត្រពាំង និងចាក់អង្ក្រង បានត្រឡប់មកវិញដាក់លក់នៅកន្លែងស្នាក់នៅ នៅសល់លក់មិនអស់ យប់ឡើងឆ្លៀតពេលចិតត្រពាំងជ្រក់លក់បន្ត ។
ជួនពេលខ្លះថ្ងៃឈប់សំរាកកូនៗទាំង២ជួយដើរជីក និងចាក់អង្ក្រងដែរ ទោះជាលំបាកវេទនាយ៉ាងណាក៏ដោយអ្នកស្រីមិនបោះបង់ប្តីកំសត់ ម្តាយជរា និងកូនទាំង២នាក់នេះដែល ទើបដាច់ចិត្តលើកម្រាមដៃ១០ក្រែងមានសប្បុរសជនជួយ និងជាពិសេសសម្តេចកិត្តិព្រឹត្តបណ្ឌិត ប៊ុន រ៉ានីហ៊ុន សែន ប្រធានកាកបាទក្រហមកម្ពុជា ក្រែងបានជួយក្រុមគ្រួសារអ្នកស្រីបានធូរ បានដីផ្ទះសម្បែងនៅដូចគេឯងផងទាន ។
ដោយឡែកលោកយាយ គាំ ឡា អាយុ៨៦ឆ្នាំ រស់នៅជាមួយកូនកូនប្រសារ និងចៅកំសត់ទាំង២នោះថា គាត់មករស់នៅជាមួយកូនគ្រាន់ជួយជំនួសដៃជើងតិចតួច ណាមួយខ្លួនចាស់ជរាហើយមានជំងឺថែមទៀតផង រាល់ថ្ងៃគាត់អាណិតកូនស្រីណាស់ប្រឹងប្រែងដើររកលុយចិញ្ចឹមគាត់ជាម្តាយ ចិញ្ចឹមប្តីពិការជិះលើរទេះរុញ និងចៅៗទៀតគាត់មិនដឹងថា ជួយយ៉ាងណាទេហើយមិនដែលបានហូបឆ្ងាញ់ដូចគេឡើយ ចឹងមានតែសង្ឃឹមលើសប្បុរសជនដែលនៅទីជិតទីឆ្ងាយតែងតែធ្វើបុណ្យទាន ណាមួយជិតដល់រដូវភ្ជុំបិណ្យផងក្រែងបានហូបឆ្ងាញ់នឹងគេម្តង ៕
កែសម្រួលដោយ ៖ សំណាង
ចែករំលែកព័តមាននេះ