ខេត្តកំពត ៖ ក្មេងស្រីម្នាក់បានទៅឃ្វាលគោជាមួយក្មេងៗឯទៀតនៅជើងភ្នំប្រាសាទសំបូទៅដោយព្រៃ ប៉ុន្តែត្រូវបានបាត់ខ្លួនកាលពីរសៀលថ្ងៃទី15 ខែសីហា ឆ្នាំ2019 ។ បន្ទាប់ពីបាត់ខ្លួនក្រុមគ្រួសារក្មេងស្រីរងគ្រោះរួមនឹងអ្នកភូមិបានតាមរកគ្រប់ទីកន្លែងទាំងយប់អាធ្រាត្ររហូតដល់ភ្លឺនៅតែរកមិនឃើញ ។ ស្រាប់តែវេលាម៉ោង9ព្រឹកថ្ងៃទី16…
ខេត្តកំពត ៖ ក្មេងស្រីម្នាក់បានទៅឃ្វាលគោជាមួយក្មេងៗឯទៀតនៅជើងភ្នំប្រាសាទសំបូទៅដោយព្រៃ ប៉ុន្តែត្រូវបានបាត់ខ្លួនកាលពីរសៀលថ្ងៃទី15 ខែសីហា ឆ្នាំ2019 ។ បន្ទាប់ពីបាត់ខ្លួនក្រុមគ្រួសារក្មេងស្រីរងគ្រោះរួមនឹងអ្នកភូមិបានតាមរកគ្រប់ទីកន្លែងទាំងយប់អាធ្រាត្ររហូតដល់ភ្លឺនៅតែរកមិនឃើញ ។
ស្រាប់តែវេលាម៉ោង9ព្រឹកថ្ងៃទី16 សីហា នគរបាលប៉ុស្តិ៍បានប្រទះឃើញសពក្មេងស្រីអណ្ដែតទឹកក្នុងរណ្ដៅកាយដីនៅជើងភ្នំជម្រៅ2ម៉ែត្រ រួចក៏បានស្រង់សពក្មេងស្រីរងគ្រោះពីក្នុងរណ្ដៅមកដាក់លើគោក ។ ក្មេងស្រីដែលបានបាត់ខ្លួននោះឈ្មោះ ហូង ស្រីចេក អាយុ14ឆ្នាំ មានម្ដាយឪពុករស់នៅភូមិឃ្លាំង ឃុំភ្នំប្រាសាទ ស្រុកកំពង់ត្រាច ខេត្តកំពត ។
ឪពុកម្ដាយ និងក្រុមអ្នកភូមិសុទ្ធតែសន្និដ្ឋានថា ក្មេងស្រីរងគ្រោះអាចត្រូវបានគេចាប់រំលោភ ធ្វើអោយនគរបាលស្រុកទាក់ទងទៅនគរបាលខេត្តកំពតចុះមកធ្វើកោសល្យវិច្ច័យក្នុងនោះមានគ្រូពេទ្យស្រុកកំពង់ត្រាចផងដែរ។
លោកវរសេនីយ៍ទោ សេង សុគន្ធចាត់ អធិការនគរបាលស្រុកបានប្រាប់អោយដឹងថា ករណីក្មេងស្រីបាត់ខ្លួនហើយត្រូវបាននគរបាលតាមរកឃើញអណ្ដែតទឹកនោះអ្នកភូមិទេនិយាយថា គេរំលោភ តែខាងនគរបាលបច្ចេកទេសបានពិនិត្យផ្ទាល់គឺមិនមានករណីរំលោភទេ ។ លោកបន្តថា ការពិនិត្យតាមបែបជំនាញដើម្បីស្រាវជ្រាវរកការពិតនៃការស្លាប់របស់ក្មេងស្រីរងគ្រោះនេះ ។
លោកវរសេនីយ៍ទោ គង់ កុសល អនុប្រធានការិយាយបច្ចេកទេសវិទ្យាសាស្ត្រខេត្តកំពតនិយាយថា ក្មេងស្រីរងគ្រោះតាមការពិនិត្យទាំងពីរូបកាយ និងសំលៀកបំពាក់គឺនៅល្អទាំងអស់គ្មានករណីរំលោភទេ ។ បើតាមការសន្និដ្ឋានក្មេងស្រីរងគ្រោះអាចចុះងូតទឹក ហើយលង់ទឹក ព្រោះជនរងគ្រោះមានសតិមិនល្អផង ។
លោក ឆោម សារុម អនុប្រធានមន្ទីរពេទ្យបង្អែកស្រុកកំពង់ត្រាចបានប្រាប់អោយដឹងថា ឆ្លងតាមការពិនិត្យជាក់ស្ដែងជនរងគ្រោះគ្មានអ្នកណាចាប់រំលោភទេ អាចលង់ទឹកស្លាប់ដោយខ្លួនឯង ៕
កែសម្រួលដោយ ៖ សំណាង
ចែករំលែកព័តមាននេះ