រាជធានីភ្នំពេញ ៖ រឿង សោភ័ណ្ឌ មកពីក្លិបមកុដរាជសីហ៍ សង្ឃឹមឆ្លងផុតវគ្គជម្រុះជុំទី១ក្នុងជំនួបជាមួយកីឡាករថៃក្នុងព្រឹត្តិការណ៍ប្រកួតដណ្ដើមខ្សែក្រវាត់អ្នកតស៊ូគុនខ្មែរគោជល់ក្នុងប្រភេទទម្ងន់៦៩គីឡូក្រាមនៅលើសង្វៀនទូរទស្សន៍ស៊ីអិនស៊ី នាថ្ងៃសៅរ៍ទី១៧ សីហា ឆ្នាំ២០១៩។
នៅថ្ងៃបើកឆាកដំបូងនេះ រឿង សោភ័ណ្ឌ ដែលជាម្ចាស់ខ្សែក្រវាត់មួយរូបត្រូវជួបប្រកួតជាមួយកីឡាករថៃ កងថៃលែន កៀតណាវី ដែលជាម្ចាស់ខ្សែក្រវាត់មួយរូបដែរធ្វើឱ្យគេ រំពឹងថា ការប្រកួតរបស់ពួកគេនឹងល្អមើលមិនខាន ព្រោះជាជំនួបរវាងជើងខ្លាំងប៉ះជើងខ្លាំង ។ អ្នក និយមទស្សនាការប្រដាល់កំពុងផ្ដោតការចាប់អារម្មណ៍ចំពោះមួយគូនេះយ៉ាងខ្លាំងដោយសារ កីឡាករទាំងពីរបានបង្ហាញនូវការតាំងខ្ពស់ក្នុងការយកឈ្នះលើគូប្រកួតរៀងខ្លួនក្នុងពេលពួកគេប៉ះគ្នាជាលើកដំបូង ។ ចាំមើលអ្នកណាទៅដែលមានសមត្ថភាពច្បាមយកកៅអីប្រកួតនៅវគ្គបន្ត ។
គួររំលឹកផងដែរថា ការប្រកួតនេះគឺជាការប្រកួតរវាងម្ចាស់ខ្សែក្រវាត់និងម្ចាស់ខ្សែក្រវាត់ដែលមានកីឡាករកម្ពុជា២រូបនិងកីឡាករថៃ២រូប ។ ម្ចាស់ខ្សែក្រវាត់ទាំង៤រូបនឹងឡើងប្រកួតគ្នាដណ្ដើមយកប្រាក់រង្វាន់ចំនួន៤០០០ដុល្លារដោយត្រូវចំណាយពេលត្រឹមតែ៣សប្ដាហ៍ប៉ុណ្ណោះហើយអ្នកដែលឈ្នះនៅវគ្គចុងក្រោយនឹងទទួលបានប្រាក់រង្វាន់ដូចរៀបរាប់ខាងលើ។
ក្រៅពីគូដណ្ដើមប្រាក់រង្វាន់ខាងលើក៏នៅមានគូប្រកួតមិត្តភាពជាតិនិងអន្តរជាតិចំនួន៣គូទៀតដែរដូចជាកីឡាករ ផាន់ គ្រាន់ មកពី ក្លិបពុទ្ធសេរីវង្សពោធិសែនជ័យ ប្រកួតជាមួយ កីឡាករថៃ យ៉តធួនថង ប្រាណសងហុក ក្នុង ប្រភេទទម្ងន់៦៣,៥គីឡូក្រាម ។
កីឡាករ ថា សារុន ជាសិស្សរួមក្លិបជាមួយផាន់ គ្រាន់ ប្រកួតជាមួយកីឡាករអុីរ៉ង់ Ghodratisraskan ក្នុងប្រភេទទម្ងន់៦០គីឡូក្រាម និងកីឡាករ សេក គឹមអាន មកពីក្លិបអង្គរមានជ័យ ខេត្តសៀមរាប ប្រកួតជាមួយកីឡាករ រឿន ទិត្យ មកពីក្លិបតាព្រហ្មមានជ័យ ៕ (កែសម្រួលដោយ ៖ បុប្ផា)
ចែករំលែកព័តមាននេះ