រាជធានីភ្នំពេញ ៖ បុរសចំណាស់វ័យ៥០ឆ្នាំម្នាក់ ប្រចណ្ឌប្រពន្ធអត់ខាន់ស្លារបស់ខ្លួនវ័យ២០ឆ្នាំ យ៉ាងងុបងល់លែងគិតអ្វីទាំងអស់ ដោយចោទថានាងមានប្រុសសហាយក្បត់ចិត្តខ្លួន និងបង្ខិតបង្ខំឲ្យនាងយកកូនចេញ ព្រមទាំងហាមឃាត់មិនឲ្យទៅលេងផ្ទះម្ដាយតែនាងមិនព្រម ក៍ត្រូវប្តីនោះវាយធ្វើបាបជាបន្តបន្ទាប់ រហូតរលូតកូននៅក្នុងផ្ទៃម្ដង កាលពីប៉ុន្មានថ្ងៃមុន តែនាងមិនបានប្ដឹងផ្ដល់អ្វីឡើយ ចេះតែខំទ្រាំទៅក្រែងប្ដីកញ្ចាស់កែប្រែខ្លួន។ ប៉ុន្តែអ្វីៗដែលនាងគិតនោះមិនត្រូវឡើយ លោកប្ដីរបស់នាងមិនបានកែខ្លួននោះទេ នៅតែវាយធ្វើបាបនាងរហូតដល់ពេលនេះ បណ្ដាលឲ្យរងរបួសហើមមុខហើមមាត់ម្ដងទៀត ។
ដោយទ្រាំនឹងទង្វើប្តីលែងបាន នាងក៏ប្រាប់ក្រុមគ្រួសារនាំគ្នាចាប់ខ្លួនប្រគល់ឲ្យប៉ូលិសចាត់ការតាមផ្លូវច្បាប់ កាលពីវេលាម៉ោង ១០និង១០នាទីយប់ថ្ងៃទី២៣ កុម្ភៈ ឆ្នាំ២០១៤ នៅត្រង់ចំណុចមុខផ្ទះជួល ស្ថិតក្នុងភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ ។ បុរសនោះត្រូវបានគេស្គាល់ឈ្មោះ ប៉ាក ហាច មុខរបរជាងប៉ះកង់ម៉ូតូ ស្នាក់នៅក្នុងភូមិកើតហេតុខាងលើ ចំណែកឯស្រ្តីជា ប្រពន្ធអត់ខាន់ស្លា ដែលត្រូវប្តីវាយធ្វើបាបនោះឈ្មោះ ភិន ស្រីរ៉ាត់ អាយុ២០ឆ្នាំ បានរងរបួសប៉ោងមុខប៉ោងមាត់យ៉ាងដំណំ។
តាមប្រភពព័ត៌មានបានឲ្យដឹងថា បុរសសង្ស័យនិងស្រ្តីរងគ្រោះគឺជាប្ដីប្រពន្ធនឹងគ្នា ប៉ុន្តែមិនបានរៀបការនោះឡើយ ពួកគេបានរស់នៅជាមួយគ្នា បានរយៈពេល៥ខែកន្លងមកហើយ ហើយបុរសនោះបានប្រចណ្ឌនាងជាប្រពន្ធខ្លាំងណាស់ និងវាយធ្វើបាបជាបន្តបន្ទាប់ថែមទៀតផង។ ការរស់នៅជាមួយគ្នានោះ នាងបានមានផ្ទៃពោះ ចំនួន៣ខែហើយ ដោយសារតែការប្រចណ្ឌនោះបុរស ខាងលើបានវាយធ្វើបាបនាងរហូតដល់ រលូតកូនចេញពីផ្ទៃម្ដងរួចមកហើយ តែពេលនោះនាងមិនបាន ប្ដឹងផ្ដល់អ្វីនោះទេ ចេះតែស៊ូទ្រាំទៅ ដោយគិតថា លោកប្ដីម្នាក់នោះកែប្រែខ្លួន ។
ប្រភពដដែលបានបន្តថា នៅក្នុងមួយរយៈពេលនេះ នាងបានទៅលេងផ្ទះម្ដាយរបស់នាង លុះត្រឡប់មកវិញ ក៍ត្រូវលោកប្ដីចោទប្រកាន់ថានាងមានសហាយស្មន់ក្បត់ចិត្តខ្លួន និងបានរករឿងរហូតទាស់ពាក្យសម្ដីគ្នា យ៉ាងបែកផ្សែង ហើយបុរសនោះក៍បាន វាយធ្វើបាប ហើមមុខហើមមាត់ ទើបត្រូវនាងជាប្រពន្ធហៅម្ដាយនិងសាច់ញាតិពីស្រុក មកចាប់ខ្លួនបុរសជាប្ដីចំណាស់នោះចាត់ការតាមផ្លូវច្បាប់តែម្ដង ៕
ចែករំលែកព័តមាននេះ