ខេត្តរតនគិរី ៖ ជម្លោះរឿងដីធ្លីមួយកំពុងឡើងកម្តៅខ្លាំងរវាងបងប្អូនជនជាតិដើមភាគតិចទំពួនជាម្ចាស់ដី និងក្រុមពលរដ្ឋចំណាកស្រុកពីខេត្តនានាប្រមាណ១០ទៅ២០គ្រួសារ បាននាំគ្នាមកតាំងទីលំនៅ និងសង់ផ្ទះលើដីពួកគាត់ដែលមានប័ណ្ណកម្មសិទ្ធិស្របច្បាប់ ហើយដីពួកគាត់នេះត្រូវបានក្រុមនិស្សិតស្ម័គ្រចិត្តសម្តេចតេជោបានវាស់វែងរួចហើយ ។
ខេត្តរតនគិរី ៖ ជម្លោះរឿងដីធ្លីមួយកំពុងឡើងកម្តៅខ្លាំងរវាងបងប្អូនជនជាតិដើមភាគតិចទំពួនជាម្ចាស់ដី និងក្រុមពលរដ្ឋចំណាកស្រុកពីខេត្តនានាប្រមាណ១០ទៅ២០គ្រួសារ បាននាំគ្នាមកតាំងទីលំនៅ និងសង់ផ្ទះលើដីពួកគាត់ដែលមានប័ណ្ណកម្មសិទ្ធិស្របច្បាប់ ហើយដីពួកគាត់នេះត្រូវបានក្រុមនិស្សិតស្ម័គ្រចិត្តសម្តេចតេជោបានវាស់វែងរួចហើយ ។
ក្រៅពីការចាប់យកដីមានកម្មសិទ្ធិហើយនោះ ក្រុមពលរដ្ឋចំណាកស្រុកបានបង្កើតភូមិថ្មីនិងតែងតាំងឱ្យមានមេភូមិ អនុប្រធានភូមិ ដែលគ្មានច្បាប់អនុញ្ញាតពីក្រសួងមហាផ្ទៃ ឬអាជ្ញាធរដឹងឮទៀតផង ។ ទាក់ទិននឹងបញ្ហាខាងលើនេះកោះសន្តិភាពធ្លាប់បានចុះផ្សាយមួយលេខរួចមកហើយ ពេលនោះបងប្អូនជនជាតិភាគតិចទំពួនដែលមានប័ណ្ណកម្មសិទ្ធិស្របច្បាប់ចំនួន២០គ្រួសារបានបង្ហាញនូវការខឹងសម្បាយ៉ាងខ្លាំងដល់ក្រុមអ្នកចាប់ដីអនាធិបតេយ្យដណ្តើមយកដីពួកគាត់បែបនេះ រហូតដល់ពួកគាត់ជាជនជាតិដើមភាគតិចទំពួនមកដាក់ពាក្យបណ្តឹងនៅសាលាដំបូងខេត្តរតនគិរី និងបានចេញដីកាសម្រេចរក្សាការពារមួយជាបន្ទាន់ដោយហាមឃាត់មិនឱ្យឈ្មោះសូត្រ សឿន មុខងារជាមេភូមិបង្កើតថ្មី ដែលតែងតាំងដោយខ្លួនឯង នាំបក្សពួករបស់ខ្លួនសាងសង់ផ្ទះ ឬសំណង់ផ្សេងលើដីដែលមានជម្លោះនេះដាច់ខាត ។
នៅព្រឹកថ្ងៃទី២១ កុម្ភៈ មានកម្លាំងចម្រុះរបស់ខេត្ត និងមានមន្ត្រីតុលាការខេត្ត ដឹកនាំដោយលោកអីុ សុវណ្ណ ចៅក្រមសាលាដំបូងខេត្តបានកាន់ដីកាសម្រេចរក្សាការពារមិនឱ្យមានការសង់លំនៅឋានបន្តទៀត ។
ដីកានេះបានចុះហត្ថលេខាដោយលោកឯក ប៉ូលីហ្វីល ចៅក្រមសាលាដំបូងខេត្ត និងបានចុះទៅផ្ទាល់ដល់កន្លែងដីដែលមានទំនាស់ស្ថិតនៅភូមិរ៉យ ឃុំកិះចុង ស្រុកបរកែវ ។ លើដីទំនាស់នេះក្រុមឈ្មោះសូត្រ សឿន ដែលតែងតាំងខ្លួនថាមេភូមិបានដាក់ឈ្មោះភូមិខាងលើជាភូមិបឡាយទី២ ។ នៅក្នុងដំណើរការចុះប្រកាសដីកាសម្រេចរក្សាការពារនោះក៏មានបិទខិត្តប័ណ្ណកម្មសិទ្ធិកាន់កាប់ដីស្របច្បាប់របស់បងប្អូនជនជាតិដើមភាគតិចចំនួន២០គ្រួសារនោះដែរ តាមក្បាលដីនីមួយៗនៅកន្លែងដីដែលក្រុមចំណាកស្រុកនាំគ្នាចាប់យកនេះ ក៏ប៉ុន្តែបិទមិនបាន១០នាទីផង ក៏ត្រូវក្រុមលោកសូត្រ សឿន នាំគ្នាមកហែកចោលនៅចំពោះមុខក្រុមចម្រុះតែម្តង និងជេរប្រមាថគ្រប់បែបយ៉ាងប្រៀបដូចជាមនុស្សរស់នៅក្រៅច្បាប់ ។
រឿងរ៉ាវខាងលើនេះត្រូវបានលោកមាស សារ៉េត អភិបាលរងស្រុកបរកែវ ដែលបានចុះទៅដល់ដីដែលមានទំនាស់នោះដែរ លោកបានបំភ្លឺប្រាប់អ្នកយកព័ត៌មានថា ដីដែលលោកសូត្រ សឿន នាំបក្សពួកជាច្រើនគួរសមមកតាំងទីលំនៅនោះពិតជាមករស់នៅលើដីបងប្អូនជនជាតិភាគតិចទំពួន២០គ្រួសារដែលពួកគាត់មានកម្មសិទ្ធិស្របច្បាប់ប្រាកដមែន ។ លោកអភិបាលរងស្រុកចាត់ទុកថា ក្រុមលោកសូត្រ សឿន ពិតជារំលោភយកដីគេពិតមែន ។ ដោយឡែកលោកទឹម ស៊ីណាត ប្រធានមន្ទីររៀបចំដែនដីនគរូបនីយកម្ម សំណង់និងសុរិយាដីខេត្តបានធ្វើលិខិតមួយជម្រាបជូនទៅលោករចំ ផង់ មេភូមិរ៉យ និងក្រុមគ្រួសារដែលមានដីចម្ការ ស្ថិតនៅភូមិរ៉យ ឃុំកិះចុង ស្រុកបរកែវ យោងតាមការស្នើសុំបញ្ជាក់ពីភាពត្រឹមត្រូវរបស់វិញ្ញាបនបត្រសម្គាល់អចលវត្ថុរបស់លោកចុះថ្ងៃទី១១ កុម្ភៈ បានបញ្ជាក់ថា ដីតំបន់នោះត្រូវបានចាប់ផ្តើមវាស់វែងដោយក្រុមបច្ចេកទេស និងក្រុមយុវជនស្ម័គ្រចិត្តសម្តេចតេជោចាប់តាំងពីថ្ងៃទី១៩ កក្កដា ឆ្នាំ២០១២ ដល់ថ្ងៃទី១៣ មីនា ឆ្នាំ២០១៣ ហើយបានបិទផ្សាយចាប់តាំងពីថ្ងៃទី២៩ មីនា ឆ្នាំ ២០១៣ ដល់២៧ មេសា ឆ្នាំ២០១៣ ។
ប័ណ្ណដែលស្នើសុំបញ្ជាក់ពីភាពត្រឹមត្រូវនោះមានចំនួន៤០ប័ណ្ណ ពិតជាប័ណ្ណស្របច្បាប់ ក៏ប៉ុន្តែមានជម្លោះតែ២០គ្រួសារទេ ។ ដោយឡែកលោកអីុ សុវណ្ណ ចៅក្រមសាលាដំបូងខេត្តបានមានប្រសាសន៍ថា សាលាដំបូងរង់ចាំប្រជាពលរដ្ឋដែលរងគ្រោះចំនួន២០គ្រួសារមកដាក់ពាក្យបណ្តឹងសុំឱ្យតុលាការប្រឆាំងនឹងអ្នកមកចាប់ដីអនាធិបតេយ្យទាំងនេះ ។ លោកបន្តថា នៅពេលក្រោយនេះតុលាការនឹងធ្វើការកោះហៅអ្នកដែលមានឈ្មោះពាក់ព័ន្ធមកសាកសួរ ។ ដោយឡែកលោកសូត្រ សឿន មេភូមិថ្មីតែងតាំងដោយខ្លួនឯងនោះបានបំភ្លឺប្រាប់អ្នកសារព័ត៌មាននៅរសៀលថ្ងៃទី២២ កុម្ភៈ ថាពីដំបូងលោកមកជីកត្បូងលើដី ដែលមានទំនាស់នោះជាយូរឆ្នាំមកហើយ ។ ពេលនេះមានប្រជាពលរដ្ឋមកតាំងទីលំនៅមានចំនួនជាង១០០គ្រួសារ ។ លោកបញ្ជាក់ច្បាស់ថា លោកនឹងមិនចេញពីដីដែលមានទំនាស់ទេ ហើយពេលនេះលោកសូត្រ សឿន បានធ្វើការប្តឹងពីលោកឯក ប៉ូលីហ្វីល ចៅក្រមសាលាដំបូងខេត្ត ទៅសាលាឧទ្ទរណ៍ពីបទចេញដីការក្សាការពារដោយខុសច្បាប់ ព្រោះដីនោះជាដីរបស់លោក ។
មន្ត្រីប៉ូលិសស្រុកបរែកវបានមានប្រសាសន៍ថា តំបន់ដីមានជម្លោះខាងលើហាក់ដូចជាតំបន់អប្បគមន៍គ្មានរដ្ឋអំណាចទៅធ្វើការត្រួតពិនិត្យបានទេ ។
លោកនិយាយថា បើសមត្ថកិច្ចស្រុកចុះទៅធ្វើការហាមឃាត់គឺបង្ក្រាបពេលលេងល្បែងស៊ីសង ឬវាយតប់គ្នាពេលស្រវឹងស្រាម្តងៗ ប៉ុណ្ណោះ ហើយត្រូវពួកគេជេរប្រមាថសមត្ថកិច្ចកប់ៗមាត់ មិនត្រឹមតែប៉ុណ្ណោះ ថែមទាំងនាំគ្នាជាច្រើននាក់ដេញសមត្ថកិច្ចឱ្យចាកចេញពីតំបន់របស់ខ្លួនថែមទៀត ប្រៀបដូចបង្កើតនូវក្រុមមនុស្សរស់នៅក្រៅច្បាប់ទៅហើយ ៕
ចែករំលែកព័តមាននេះ