រាជធានីភ្នំពេញ ៖ ស្ត្រីអាជីវករលក់ពូក និងសម្ភារប្រើប្រាស់ម្នាក់ត្រូវស្ត្រីជើងល្អមិនស្គាល់អត្តសញ្ញាណបន្លំខ្លួនធ្វើជាអ្នកលក់ពូកបោកយកប្រាក់អស់ចំនួន២៥០ដុល្លារ ហើយគេចខ្លួនបាត់បង្កឱ្យមានការភ្ញាក់ផ្អើលកាលពីវេលាម៉ោង៣ និង៣០នាទីរសៀល ថ្ងៃទី២៣ កុម្ភៈ ២០១៤ នៅផ្ទះស្ត្រីរងគ្រោះស្ថិតនៅតាមបណ្តោយផ្លូវជាតិលេខ៤ មុខវិទ្យាល័យហ៊ុន សែន ជម្ពូវ័ន ភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ។
តាមប្រភពបានឱ្យដឹងថា មុនពេលកើតហេតុមានស្ត្រីជើងល្អម្នាក់បានមកឈប់នៅមុខផ្ទះស្ត្រីរងគ្រោះ ហើយបានទូរស័ព្ទទៅក្រុមហ៊ុនលក់ពូកដែលមានទីស្នាក់ការនៅផ្សារអូប្ញស្សីកុម្មង់ពូកចំនួន៥ក្នុងតម្លៃជាង៦០០ដុល្លារ។ ក្រោយមកក្រុមហ៊ុនលក់ពូកបានឱ្យកម្មករ២នាក់ដឹកពូកនោះតាមរ៉ឺម៉កទៅឱ្យស្ត្រីជើងល្អដែលកំពុងរង់ចាំនៅមុខផ្ទះកើតហេតុ។ ខណៈពេលដឹកទៅដល់ ស្ត្រីជើងល្អរូបនោះបានសួរទៅស្ត្រីរងគ្រោះថា ត្រូវការទិញពូកឬអត់ ដោយពូក៥នេះគេលក់ក្នុងតម្លៃត្រឹមតែ២៥០ដុល្លារប៉ុណ្ណោះ។
ប្រភពបន្តទៀតថា ឃើញដូច្នេះស្ត្រីរងគ្រោះក៏ព្រមទិញ និងប្រគល់លុយ២៥០ដុល្លារទៅឱ្យស្ត្រីសង្ស័យនោះ ដោយមិននឹកស្មានថា ចាញ់បោកគេនោះទេ ចំណែកស្ត្រីសង្ស័យបាននាំកម្មករទាំង២នាក់នោះចេញទៅបាត់ ប្រហែល១ម៉ោងក្រោយមកទើបតំណាងក្រុមហ៊ុនលក់ពូកបានមកដល់ផ្ទះស្ត្រីរងគ្រោះហើយបានសួរនាំតឹងសរសៃ.កដាក់គ្នារហូតឈានដល់ប្តឹងសមត្ថកិច្ចចុះមកសម្របសម្រួល។
បន្ទាប់ពីសមត្ថកិច្ចជួយអន្តរាគមន៍រួច ភាគីទាំង២បានព្រមព្រៀងគ្នាដោយខាងក្រុមហ៊ុនលក់ពូកសងទៅស្ត្រីរងគ្រោះចំនួន១០០ដុល្លារ ហើយយកពូកទាំង៥នេះត្រឡប់ទៅក្រុមហ៊ុនវិញដើម្បីបញ្ចប់រឿង៕
ចែករំលែកព័តមាននេះ