ខេត្តព្រះវិហារ ៖ មនុស្ស៤នាក់បានរងរបួសស្រាលក្នុងហេតុការក្រឡាប់រថយន្តធុនត្រាដឹកអ្នកដំណើរបង្កឡើងដោយខ្លួនឯងនៅចំណុចគីឡូម៉ែត្រលេខ៤៤ តាមបណ្តោយផ្លូវជាតិលេខ៦២ ឋិតក្នុងភូមិអូរពោធិ៍ ឃុំរមណីយ៍ ស្រុករវៀង ខេត្តព្រះវិហារ នៅវេលាម៉ោង ៣រសៀលថ្ងៃទី១៤ ខែសីហា ឆ្នាំ២០១៩ ។
តាមការបញ្ជាក់ពីអ្នកបើកបររថយន្តឈ្មោះ ថាន់ អាយុ៤៩ឆ្នាំ ភេទប្រុស ជាអ្នកបើកបររថយន្តឈ្នួលប្រភេទធុនត្រា ពីភូមិស្រអែម ស្រុកជាំក្សាន្ត ខេត្តព្រះវិហារ ឆ្ពោះទៅ រាជធានីភ្នំពេញ បានរៀបរាប់ថា មុនកើតហេតុរូបគាត់បានបើកបររួមជាមួយអ្នកដំណើរបីនាក់ ក្នុងនោះមានក្មេងតូចអាយុប្រហែល២ឆ្នាំម្នាក់ មកដល់កន្លែងកើតហេតុ ស្របពេលមេឃភ្លៀងរលឹមដល់ចំណុចផ្លូវកោងត្រង់គីឡូម៉ែត្រលេខ៤៤ ភូមិអូរពោធិ៍ ឃុំរមណីយ ស្រុករវៀង ខេត្តព្រះវិហារ ស្រាប់តែរថយន្តបានរអិលរ៉េចង្កូតមកខាងឆ្វេងបោកនឹងជើងទម្រដាក់ដបសាំងរបស់អ្នកនៅទីនោះក្រឡាប់តែម្តង តែជាសំណាងមិនបង្កអោយអ្នករួមដំណើររងរបួសឡើយ រីឯអ្នកជិតនោះក៏មិនប៉ះពាល់ដែរ តែទោះជាបែបនេះក្តីអ្នកបើកបររូបនេះក៏បានទទួលខុសត្រូវលើការខូចខាត ក្នុងករណីនេះផងដែរ ។
ជាមួយគ្នានេះដែរអ្នករស់នៅក្បែរកន្លែងកើតហេតុឈ្មោះ អ៊ូច សុធា បានសំណូមពរដល់អាជ្ញាធរ និងអ្នកជំនាញធ្វើយ៉ាងណាចុះត្រួតពិនិត្យកន្លែងផ្លូវកោងខាងលើឋិតត្រង់គីឡូម៉ែត្រលេខ៤៤ នេះផងព្រោះថា មានយានយន្តជាច្រើនបានរអិលក្រឡាប់ជួបគ្រោះថ្នាក់ចរាចរណ៍ជាញឹកញាប់កន្លងទៅនៅទីនោះផ្លូវកៅស៊ូចំណុចផ្លូវកោងនោះហាក់មានលក្ខណៈរអិល ៕
កែសម្រួលដោយ ៖ សំណាង
ចែករំលែកព័តមាននេះ