រាជធានីភ្នំពេញ ៖ លោកក្រឡាបញ្ជីសាលាដំបូងខេត្តស្វាយរៀងម្នាក់ ត្រូវអង្គភាពប្រឆាំងអំពើពុករលួយចាប់ឃាត់ខ្លួនពីបទស៊ីសំណូក ក្នុងករណីកំពុងដំណើរការរឿងក្តីមួយ ។ តាមប្រភពព័ត៌មានឱ្យដឹងថា អង្គភាពប្រឆាំងអំពើពុករលួយ បានចាប់ឃាត់ខ្លួនក្រឡាបញ្ជីសាលាដំបូងខេត្តស្វាយរៀងមួយរូប កាលពីល្ងាចថ្ងៃទី១៨ កុម្ភៈ នៅអង្គភាពប្រឆាំងអំពើពុករលួយក្នុងរាជធានីភ្នំពេញ ហើយក៏បញ្ជូនទៅកាន់អយ្យការអមសាលាដំបូងខេត្តស្វាយរៀងនៅថ្ងៃទី២១ កុម្ភៈ វេលាម៉ោង២រសៀល ដើម្បីឱ្យលោកព្រះរាជអាជ្ញាអមសាលាដំបូងខេត្តដំណើរការសាកសួរទៅតាមនីតិវិធី ។
មន្ត្រីក្រឡាបញ្ជីដែលត្រូវចាប់ឃាត់ខ្លួននេះឈ្មោះម៉ុញ សារ៉េន ភេទប្រុស អាយុ៤៦ឆ្នាំ មានទីលំនៅក្នុងភូមិមេភ្លើង សង្កាត់ស្វាយរៀង ក្រុងស្វាយរៀង ។ មិនមានព័ត៌មានលម្អិតណាមួយជុំវិញការចាប់ខ្លួនមន្ត្រីក្រឡាបញ្ជីរូបនេះទេ ។ បើយោងតាមប្រភពព័ត៌មានដដែលថា លោក ម៉ុញ សារ៉េន ជាប់ចោទពីបទសុីសំណូកក្នុងពេលកំពុងដំណើរការរឿងក្តីមួយ មានន័យថា គឺជាការទទួលប្រាក់សម្រាប់ទទួលបានការឈ្នះក្តីនៅក្នុងតុលាការ ។
គ្មានមន្ត្រីនៅតុលាការណាម្នាក់ប្រាប់ឱ្យដឹងនោះទេថា លោក ម៉ុញ សារ៉េន ជាក្រឡាបញ្ជីឱ្យលោកចៅក្រមរូបណា ។ ជាការកត់សម្គាល់ អង្គភាពប្រឆាំងអំពើពុករលួយ បានធ្វើសកម្មភាពនានាជាច្រើនក្នុងរយៈពេលចុងក្រោយនេះ ហើយបានអង្រួនឱ្យមានការញ័ររញ្ជួយសម្រាប់ក្រុមមន្ត្រីខិលខូចផងដែរ ដែលកោតញញើតនឹងសំណាញ់ច្បាប់នេះ ៕
ចែករំលែកព័តមាននេះ