ខេត្តកណ្តាល ៖ អគ្គិភ័យមួយដែលតាមការសន្និដ្ឋានថា បណ្តាលមកពីទុស្សេចរន្តអគ្គិសនី បានឆាបឆេះរោងដាក់អីវ៉ាន់ និងសម្ភារសំណង់មួយកន្លែងរបស់ប្រជាពលរដ្ឋ បង្កឱ្យមានការភ្ញាក់ផ្អើលទាំងព្រឹក ហើយភ្លាមៗនោះក៏មានអន្តរាគមន៍ពីរថយន្តពន្លត់អគ្គិភ័យចំនួន២គ្រឿង ដែលប្រចាំការនៅអធិការដ្ឋាននគរបាលស្រុកអង្គស្នួល ចេញទៅអន្តរាគមន៍បាញ់ទឹកពន្លត់អស់១ស៊ីទែនទើបរលត់ ។ នៅក្នុងគ្រោះអគ្គិភ័យនេះអីវ៉ាន់និងសម្ភារនៅក្នុងនោះត្រូវភ្លើងឆេះអស់ទាំងស្រុង តែមិនបានឆេះរាលដាលដល់លំនៅឋានផ្សេងទៀតដែលស្ថិតនៅក្បែរនោះឡើយ ។
ហេតុការណ៍នេះបានកើតឡើងកាលពីវេលាម៉ោង៥និង៣០នាទីព្រឹក ថ្ងៃទី២១ កុម្ភៈ ឆ្នាំ២០១៤ នៅចំណុចផ្ទះលក់ទូរស័ព្ទដៃមួយ ស្ថិតក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ។ ម្ចាស់ទីតាំងដែលមានអគ្គិភ័យនេះឈ្មោះ សូត អេម ភេទស្រី អាយុ៧៣ឆ្នាំ ស្នាក់នៅក្នុងភូមិកើតហេតុខាងលើ ហើយរោងដែលត្រូវភ្លើងឆាបឆេះនោះ សង់ពីឈើប្រក់ស័ង្កសីទំហំប្រហែល៣ម៉ែត្រគុណនឹង៤ម៉ែត្រ ចំណែកអីវា៉ន់នៅក្នុងនោះមានគ្រែ តុ ទូ សម្លៀកបំពាក់ និងសម្ភារសំណង់មួយចំនួនផង ត្រូវភ្លើងឆេះទាំងអស់ ។ តាមប្រភពព័ត៌មានឱ្យដឹងថា ជនរងគ្រោះកំពុងធ្វើផ្ទះថ្មី ហើយបានសង់រោងនោះដាក់អីវា៉ន់ជាបណ្តោះអាសន្ន ទម្រាំធ្វើផ្ទះរួចទើបរើអីវា៉ន់នោះចូលទៅក្នុងផ្ទះវិញ ម្យា៉ងទៀតកូនប្រុសរបស់គាត់បានដេកនៅក្នុងនោះជារៀងរាល់យប់ទៀតផង ។
ដោយឡែក នៅព្រឹកកើតហេតុពុំដឹងថា ខ្សែភ្លើងនោះត្រូវទុស្សេបែបណាទេ ព្រោះក្រោយពេលក្រោកពីដំណេក កូនប្រុសជនរងគ្រោះបានដកឌុយភ្លើងចេញទាំងអស់ បន្ទាប់មកបានចាកចេញទៅផឹកកាហ្វេនៅជិតផ្សារ ស្ថិតក្នុងភូមិកើតហេតុនោះដែរ ។ ប្រភពដដែលបានបន្តថា លុះមួយសន្ទុះក្រោយមក ស្រាប់តែមានភ្លើងឆេះឡើងយ៉ាងសន្ធោសន្ធៅតែម្តង ដែលពុំដឹងថាបណ្តាលមកពីអ្វីឡើយ ហើយខណៈនោះបានបង្កឱ្យមានការភ្ញាក់ផ្អើលទាំងព្រឹក ។ ភ្លាមៗនោះ រថយន្តពន្លត់អគ្គិភ័យដែលប្រចាំការនៅអធិការដ្ឋាននគរបាលស្រុកអង្គស្នួល២គ្រឿង បានចេញទៅបាញ់ទឹកពន្លត់ និងបានបាញ់ទឹកអស់១សីុទែន ទើបរលត់ទៅវិញទាំងស្រុង និងទប់ស្កាត់មិនឱ្យមានការឆេះរាលដាលដល់លំនៅឋាននៅក្បែរនោះ ដែលជាផ្ទះលក់ និងទិញម៉ូតូ ហើយមានម៉ូតូប្រមាណជាង៣០គ្រឿងនៅក្នុងនោះ ។ ជាមួយនេះក៏មានផ្ទះលក់អីវា៉ន់នៅជាប់នោះជាច្រើនទៀត ព្រោះទីនោះគឺនៅជាប់ផ្សារថ្នល់ទទឹងតែម្តង ប្រសិនបើឆេះរាលដាលវិញប្រាកដជាមហន្តរាយធំមិនខានឡើយ ។
រាជធានីភ្នំពេញ ៖ ក្នុងហេតុការណ៍ដាច់ដោយឡែកមួយទៀត ក្រុមហ៊ុនអនាម័យ (លាងចាន) យីហោតាំងយី ដែលមានទីតាំងស្ថិតនៅផ្ទះលេខ២៦១K ផ្លូវលេខ៦២R ក្រុមទី១១ ភូមិទួលគោក សង្កាត់ទួលសង្កែ ខណ្ឌឫស្សីកែវ ត្រូវអគ្គិភ័យឆេះហុយផ្សែងខ្មួលខ្មាញ់ បង្កឱ្យមានការភ្ញាក់ផ្អើល កាលពីវេលាម៉ោង៥និង៣០នាទីល្ងាច ថ្ងៃទី២០ កុម្ភៈ បណ្តាលឱ្យម៉ាស៊ីនវេចខ្ចប់ចាន និងចង្កឹះ១គ្រឿងត្រូវភ្លើងឆេះ រងការខូចខាត ។
នៅក្នុងហេតុការណ៍នេះ មានរថយន្តពន្លត់អគ្គិភ័យចំនួន៣គ្រឿង បានទៅជួយអន្តរាគមន៍ តែពុំបានបាញ់ទឹកទេ ព្រោះបានបុគ្គលិកក្រុមហ៊ុននាំគ្នាជួយពន្លត់ទាន់ពេល ។ ទាក់ទិននឹងការកើតមានអគ្គិភ័យនេះ តាមអ្នកបកប្រែភាសាក្នុងក្រុមហ៊ុន បានឱ្យដឹងថា ដោយសារឆ្លងចរន្តអគ្គិសនីក្នុងម៉ាសុីនវេចខ្ចប់ចាន-ចង្កឹះ ។
តាមព័ត៌មានបានឱ្យដឹងថា មុនពេលកើតហេតុ នៅពេលដែលម៉ាសុីនវេចខ្ចប់កំពុងដំណើរការស្រាប់តែឆ្លងចរន្តឆេះក្លាយជាអគ្គិភ័យផ្សែងហុយចេញពីអគារ បង្កឱ្យមានការភ្ញាក់ផ្អើលដល់ប្រជាពលរដ្ឋនៅក្បែរខាង និងសមត្ថកិច្ចចុះទៅដល់កន្លែងកើតហេតុ ហើយទាក់ទងហៅរថយន្តពន្លត់អគ្គិភ័យមកអន្តរាគមន៍ចំនួន៣គ្រឿង តែមិនទាន់បានបាញ់ទឹកទេ ព្រោះបុគ្គលិកក្រុមហ៊ុននាំគ្នាជួយពន្លត់ទាន់ ។ ទោះបីជាយ៉ាងណា ម៉ាសុីនវេចខ្ចប់១គ្រឿង ត្រូវភ្លើងឆេះរងការខូចខាត ប៉ុន្តែមិនបានរាលដាលខូចខាតសម្ភារផ្សេងទៀតឡើយ ៕
ចែករំលែកព័តមាននេះ