ខេត្តកំពង់ឆ្នាំង ៖ ការរាស់ដោយរនាស់ដែកដែលក្រុមអ្នកនេសាទហៅថា«កាវលៀស»ដោយម៉ាស៊ីនជាឧបករណ៍ទំនើបរាប់សិបកាណូតបាឡាស្មាច់ ដែលបានធ្វើសកម្មភាពជារៀងរាល់ថ្ងៃ ស្ទើរគ្រប់ទីកន្លែង
នៅតាមដងទន្លេសាប ស្ថិតក្នុងភូមិសាស្ត្រខេត្តកំពង់ឆ្នាំង កើបប្រមូលបានលៀសរាប់ពាន់ការុង បានដឹកចេញពីខេត្តនេះជារៀងរាល់ថ្ងៃ យកទៅលក់នៅប្រទេសវៀតណាមមួយចំនួនធំ និងមានតិចតួចលក់នៅ
ក្នុងប្រទេស ។ ប៉ុន្តែសកម្មភាពនេះ នៅមិនទាន់ឃើញសមត្ថកិច្ចរដ្ឋបាលជលផល ចេញវិធានការការពារឬទប់ ស្កាត់បែបណានៅឡើយទេ ។
លោក លី ឡា នាយខណ្ឌរដ្ឋបាលជលផលបញ្ជាក់ថា ការកាវយកលៀសពីក្នុងទន្លេដោយប្រើដៃមិនត្រូវបានហាមឃាត់ឡើយ តែច្បាប់ហាមឃាត់មិនឱ្យធ្វើសកម្មភាពដោយប្រើថ្នងដែក និងអូសដោយរនាស់
ដែកប្រើកម្លាំងម៉ាស៊ីនទេ ព្រោះការធ្វើសកម្មភាពបែបនេះ នាំឱ្យប៉ះពាល់យ៉ាងខ្លាំងដល់ប្រព័ន្ធអេកូឡូស៊ីនៅបាតទន្លេ ។
លោកថា នៅបាតទន្លេ លៀសដែលងាប់យូរឆ្នាំ វាបានពុកផុយក្លាយជាជីវចម្រុះសម្រាប់់ចំណីត្រី និងមច្ឆជាតិគ្រប់ប្រភេទ ជាពិសេសមានត្រីមួយចំនួនក៏បានពងកូននៅក្នុងភក់បាតទន្លេនោះដែរ ។ ដូចនេះ ក្នុងពេលឆាប់ៗខាងមុខនេះ ខណ្ឌរដ្ឋបាលជលផលនឹងចុះអប់រំណែនាំពួកគាត់ជាថ្មីទៀត ប្រសិនបើអ្នកកាវលៀសដោយម៉ាស៊ីនមិនស្តាប់ទេ សមត្ថកិច្ចជំនាញនឹងអនុវត្តតាមច្បាប់ជាមិនខាន ។
កម្មករម្នាក់ដែលកំពុងលើកលៀសចេញពីកាណូតដាក់ឡើងគោក និយាយថា ជារៀងរាល់ថ្ងៃគាត់ឃើញទូកកាវលៀសដែលបំពាក់ដោយម៉ាស៊ីនរាប់សិបគ្រឿង បណ្តែតបណ្តាក់គ្នាដូចខ្យងលើផ្ទៃទន្លេសាប ដោយប្រើប្រាស់នូវកញ្ច្រែងដែក ប្រៀបដូចរនាស់ដែកដែលមានទំហំមុខកាត់ចាប់ពី១ម៉ែត្រទៅ១ម៉ែត្រកន្លះ ទម្លាក់ចុះកប់ក្នុងភក់បាតទន្លេ ដើម្បីចូកកាវលៀសដោយប្រើម៉ាស៊ីនអូសទាញយកលៀសចេញពីក្នុងភក់បាតទន្លេ ។
ក្នុងកាណូតកាវលៀសមួយគ្រឿង អាចរកលៀសបានចាប់ពី៣០ទៅ៤០ការុងក្នុងមួយថ្ងៃៗ ដែលក្នុង១ការុងមានទម្ងន់ពី៨០ទៅ៩០គីឡូក្រាម គឺប្រមាណជិត៤តោនលៀស តាមទូកតូចទូកធំ ។ គាត់ថាលៀសដែលកាវបានមានតាំងពីលៀសតូចៗ ទើបកើតរហូតដល់ជីដូនជីតាលៀស គ្មាននៅបានទេ ។
គួរបញ្ជាក់ថា ទីតាំងឈ្មួញចាំទទួលទិញលៀសដើម្បីដឹកយកទៅលក់បន្ត គឺនៅក្នុងស្រុកបរិបូណ៌ មាននៅមាត់កំពង់ទឹកឆ្នុកទ្រូ មាត់កំពង់ទឹកសេះស្លាប់ ។ ចំណែកនៅក្រុងកំពង់ឆ្នាំង មាននៅភូមិកំពង់អុស ភូមិកណ្តាល ភូមិចុងកោះ នៅស្រុកកំពង់ត្រឡាច មាននៅមាត់កំពង់ដរតាជេស មាត់កំពង់ត្រឡាចក្រោម និងនៅមានច្រើនកន្លែងទៀត ដែលតាមអ្នកនេសាទនិយាយថា ក្នុងមួយថ្ងៃនេសាទលៀសបានរាប់សិបតោន ។
ក្នុងមួយរដូវរកលៀសអាចមានរយៈពេលពី៤ទៅ៦ខែទើបអស់ ព្រោះទឹកជ្រៅរកលែងបាន ។ប្រជាពលរដ្ឋបានលើកឡើងថា បទល្មើសកាវលៀសដោយប្រើម៉ាស៊ីនបែបនេះ នឹងធ្វើឱ្យហិនហោចអេកូឡូស៊ីក្រោមទឹក ដូចបំផ្លាញមច្ឆជាតិដែរ ដែលអនាគតទៅនឹងវិនាសអន្តរាយអស់ ៕
ចែករំលែកព័តមាននេះ