​ម្ចាស់​អាជីវកម្ម​ សូម​រក្សា​តម្លៃ ​គុណភាព​ និងសេវាកម្មក្នុង​ពេល​ប្រឡង​បាក់​ឌុ​ប


រាជធានី​ភ្នំពេញ​ ៖ ក្រសួងទេសចរណ៍ ​​ថ្ងៃ​ទី​១២ ​សីហា ​​នេះ បាន​ចេញ​សេចក្តីណែនាំ​ស្តី​ពី​ការ​រក្សា​តម្លៃ និង​រក្សា​​គុណភាព​សេវាកម្ម​ទេសចរណ៍ ក្នុង​រយៈពេល​ប្រឡង​សញ្ញាបត្រ​មធ្យមសិក្សា​ទុតិយភូមិ (​បាក់​ឌុ​ប​) ដោយ​បាន​អំពាវនាវ​ដល់​ម្ចាស់ ឬ​អ្នកគ្រប់គ្រង​អាជីវកម្ម​ទេសចរណ៍​ទាំងអស់​ត្រូវ​រក្សា​តម្លៃ និង​គុណភាព​សេវាកម្ម​របស់​ខ្លួន ដើម្បី​សម្រួល​ដល់​ការ​ចំណាយ​នានា​របស់​បេក្ខជន​ប្រឡង ក៏​ដូច​ជា​លោកគ្រូ​-​អ្នកគ្រូ​ជា​ដើម​។

គួរបញ្ជាក់ថា ​ថ្ងៃទី​១៩-២០ ​សីហា​ ខាង​មុខ​នេះ ក្រសួង​អប់រំ យុវជន និង​កីឡា នឹង​រៀបចំ​ការ​ប្រឡង​សញ្ញា​បត្រ​មធ្យមសិក្សា​ទុតិយភូមិ​នៅ​ទូ​ទាំង​ប្រទេស ជា​ហេតុ​តម្រូវ​ឱ្យ​លោកគ្រូ អ្នកគ្រូ និង​សិស្សានុសិស្ស ត្រូវធ្វើ​ដំណើរ​ទៅ​មណ្ឌល​ប្រឡង​តាម​ការ​រៀបចំ​ជាក់ស្តែង ដែល​ពេល​ខ្លះ​ ពួក​គាត់​ត្រូវ​ប្រើប្រាស់​ជា​ចាំបាច់​នូវ​មធ្យោ​បាយ​ធ្វើ​ដំណើរ ការ​ស្នាក់​អាស្រ័យ​នៅ​សណ្ឋាគារ ផ្ទះ​ភ្ញៀវ ផ្ទះសំណាក់ ផ្ទះ​ជួល ឬ​បន្ទប់​ជួល​ជាដើម ព្រមទាំង​ចំណាយ​លើ​ការ​បរិភោគ​ប្រចាំ​ថ្ងៃ​ទៀត​ផង​។

អាស្រ័យ​ហេតុនេះ ក្រសួងទេសចរណ៍​ក៏​បាន​ណែនាំ និង​អំពាវនាវ​ដល់​ម្ចាស់ ឬ​អ្នកគ្រប់គ្រង​អាជីវកម្ម​ទេសចរណ៍​ទាំងអស់សូម​៖
១-រក្សា​ឱ្យ​បាន​ត្រឹមត្រូវ​នូវ​កម្រិត​គុណភាព​សេវាកម្ម ដែល​ឆ្លើយ​តប​នឹង​តម្រូវការ បើ​ទោះជា​ស្ថិត​ក្នុង​រយៈ​ពេល​ដែល​មាន​តម្រូវការ​សេវាកម្ម​យ៉ាង​មមាញឹក​យ៉ា​ណា​ក៏​ដោយ​។
២-ចូលរួម​រក្សា​សណ្តាប់ធ្នាប់ សុវត្ថិភាព​ជូន​ភ្ញៀវ និង​ចូលរួម​ទប់ស្កាត់​ឱ្យ​បានជា​អតិបរមា​នូវ​រាល់​ហេតុ​ការណ៍​ទាំងឡាយ ដែល​អាច​កើត​ឡើងជា​ឧ​ប​ទ្ទេវ​ហេតុ​។
៣-កុំ​ដំឡើង​ថ្លៃ​សេវាកម្ម​របស់​ខ្លួន​ក្នុងអំឡុងពេល​នេះ បើ​ទោះបីជា​អាច​នឹង​មាន​តម្រូវការ​កើនឡើង​ខ្លាំង​យ៉ាងណា​ក្តី​។

ក្រសួងទេសចរណ៍ក៏​បាន​បញ្ជាក់​បន្ថែម​ដល់​មន្ទីរ​ទេសចរណ៍​រាជធានី​-​ខេត្ត ត្រូវ​ចូលរួម​ផ្សព្វផ្សាយ​បន្ត​នូវ​ស្មារតី​នៃ​សេចក្តីណែនាំ​នេះ ទៅ​ដល់​គ្រប់​មូលដ្ឋាន​អាជីវកម្ម​ទេសចរណ៍​ក្នុង​មូលដ្ឋាន​របស់​ខ្លួន ដើម្បី​ឱ្យ​ពួក​គេ​ជ្រោ​ត​ជ្រាប និង​ចូលរួម​អនុវត្ត​ឱ្យ​បាន​គ្រប់​ៗ​គ្នា​ ៕ (សម្រួលដោយ៖ ស្រីណា)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ