ខេត្តកណ្តាល ៖ លោកកែវ រ៉េមី បានអះអាងថា គ្រឿងចក្របានត្រៀមរួចជាស្រេចនឹងចេញប្រតិបត្តិការចុះឈូសឆាយ ផ្លូវមួយខ្សែប្រហែងជា១០គីឡូម៉ែត្រ ស្ថិតក្នុងឃុំព្រែកអំបិល ស្រុក ស្អាង…
ខេត្តកណ្តាល ៖ លោកកែវ រ៉េមី បានអះអាងថា គ្រឿងចក្របានត្រៀមរួចជាស្រេចនឹងចេញប្រតិបត្តិការចុះឈូសឆាយ ផ្លូវមួយខ្សែប្រហែងជា១០គីឡូម៉ែត្រ ស្ថិតក្នុងឃុំព្រែកអំបិល ស្រុក ស្អាង ខេត្តកណ្តាល ប៉ុន្តែរង់ចាំភ្លើងខៀវ គឺការចុះហត្ថលេខាអនុញ្ញាតពីក្រសួងសេដ្ឋកិច្ច និងហិរញវត្ថុសិន ។ ការបញ្ជាក់របស់លោកកែវ រ៉េមី បន្ទាប់ពីប៉ុន្មានខែមុន ខាងក្រសួងសេដ្ឋកិច្ច និងហិរញ្ញវត្ថុ និងក្រសួងអភិបាលជនបទបានចុះសិក្សារួចហើយនឹងរាយការណ៍ជូនសម្តេចតេ ជោហ៊ុន សែន ដើម្បីធ្វើផ្លូវនេះ ។
សម្តេចតេជោ ហ៊ុន សែន នាយករដ្ឋមន្ត្រីតាមរយៈលោកកែវ រ៉េមី ប្រតិភូអមនាយករដ្ឋមន្ត្រី និងជាប្រធានក្រុមការងារឃុំព្រែកអំបិល ស្រុកស្អាង ខេត្តកណ្តាល ថា សម្តេចសម្រេចផ្តល់ផ្លូវបេតុងមួយខ្សែជាង១០គីឡូនេះរួចហើយ ។ លោកកែវ រ៉េមី ប្រតិភូអមនាយករដ្ឋមន្ត្រី និងជាប្រធានប្រធានក្រុមការងារចុះជួយឃុំ ព្រែកអំបិលរបស់គណបក្សប្រជាជនកម្ពុជា និងជាប្រធានគណៈកម្មាធិការសិទ្ធិមនុស្សកម្ពុជាបានសរសេរលើបណ្តាញសង្គមនៅថ្ងៃទី១៣ សីហាដោយអមនឹងរូបផ្លូវ ស្ថិតក្នុងការរំលាកយ៉ាងខ្លាំងក្នុងការធ្វើដំណើរយ៉ាងដូច្នេះថា ៖«បងប្អូនអ្នកនៅឃុំព្រែកអំបិលតាមសួរខ្ញុំរហូតពីផ្លូវមួយខ្សែនេះ ។
ខ្ញុំបានតាមរឿងនេះរហូតមក សូម្បីតែម្សិលមិញក៏បានសួរគេដែរ តែនៅសល់មួយជំហ៊ានចុងក្រោយប៉ុណ្ណោះនៅពេលណាដែលឯកសារទទួលបានចុះហត្ថលេខាពីក្រសួងសេដ្ឋកិច្ចហិរញ្ញវត្ថុគ្រឿងចក្រអាចចាប់ដំណើរការបានហើយ» ។ ជាមួយគ្នានោះដែរ លោក កែវ រ៉េមី ក៏បានស្នើសុំសូមបងប្អូនក្មួយៗអភ័យទោសចំពោះបញ្ហានេះផងដែរ ។
គួររឮកថាកាលពីថ្ងៃទី៩ ខែមិថុនា ក្នុងវេទិការហូបនំបញ្ចុកលោកកែវ រ៉េមីបាន អាងថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជាសម្រេចឱ្យសាងសង់ផ្លូវបេតុងកាត់ មាត់ស្ទឹងព្រែកអំបិល ប្រវែង១០,៥០០ម៉ែត្រ ទន្ទឹង៨ម៉ែត្រជូនប្រជាពលរដ្ឋ ។ ហើយផ្លូវនេះនឹងធ្វើឆាប់ៗ ប៉ុន្តែរហូតមកដល់ពេលនេះមិនទាន់ធ្វើនោះទេ ៕កែសម្រួលដោយ ៖ សុឃាក់
ចែករំលែកព័តមាននេះ