រាជធានីភ្នំពេញ ៖ វិបត្តិទីផ្សារជ្រូកបានកើតឡើងម្ដងទៀតនៅក្នុងប្រទេសកម្ពុជា ហើយទំហំនៃវិបត្តិនេះហាក់បង្កជាចំណោទសម្រាប់អនាគតទីផ្សារសាច់ជ្រូកនៅពេលដែលបងប្អូនអ្នកបរិភោគមួយចំនួនបានធ្វើពហិការមិនទិញយកទៅបរិភោគ ដោយសារតែការខ្លាចរអារប៉ះពាល់ដល់សុខភាពដោយជំងឺប៉េសជ្រូកអាហ្វ្រិក បើទោះបីជាមន្ត្រីជំនាញបញ្ជាក់ជាច្រើនដង ថាជំងឺប៉េសជ្រូកអាហ្វ្រិក មិនឆ្លងមកមនុស្សក៏ដោយ ។
ជាក់ស្តែងវិបត្តិទីផ្សារជ្រូកបានឲ្យឃើញនូវផលអវិជ្ជមានធ្ងន់ធ្ងរ ព្រោះកាលពីមុនតម្រូវការសាច់ជ្រូកសម្រាប់ទូទាំងប្រទេសកម្ពុជា មានប្រមាណ៧ពាន់ក្បាល ក្នុងមួយថ្ងៃ តែពេលនេះ បានធ្លាក់ចុះត្រឹមត្រូវ ២ពាន់ទៅ៣ពាន់ក្បាលប៉ុណ្ណោះ ក្នុងមួយថ្ងៃ ដូច្នេះ មានការថយចុះ លើសពាក់កណ្ដាល ។ នេះបើតាមការឲ្យដឹងរបស់ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា ។ សមាគមអ្នកចិញ្ចឹមសត្វកម្ពុជា បានបង្ហាញការព្រួយបារម្ភពី វិបត្តិជ្រូកនៅថ្ងៃខាងមុខ ដោយលើកឡើងថាវិបត្តិទីផ្សារជ្រូកលើកនេះមិនមែនពាក់ព័ន្ធនឹងការធ្លាក់ចុះនៃតម្លៃជ្រូករស់និងសាច់ជ្រូកទេ តែជាវិបត្តិដែលប្រជាពលរដ្ឋមួយចំនួនធ្វើពហិការមិនទិញយកទៅទទួលទានតែម្តង ។
ដូច្នេះអ្នកជំនាញបានបង្ហាញនូវការព្រួយបារម្មណ៍ថា «បើមិនបរិភោគសាច់ជ្រូកនៅថ្ងៃនេះ នឹងធ្វើអោយប៉ះពាល់ដល់ទីផ្សារ និងអ្នកបិរភោគវិញនៅថ្ងៃអនាគត» ខ្លីខាងមុខ ។ លោក លី ឡាវិល ប្រធានក្រុមប្រឹក្សាសមាគមអ្នកចិញ្ចឹមសត្វកម្ពុជា បានមានប្រសាសន៍ថា រហូតមកដល់ពេលនេះអ្នកបន្តទទួលទានសាច់ជ្រូក គឺនៅមានចំនួនតិចតួចណាស់ បើទោះបីជាប្រមុខរាជរដ្ឋាភិបាលបានអំពាវនាវនិងបំផុសអោយបរិភោគសាច់ជ្រូក ព្រមជាមួយនឹងការប្រកាសពីក្រសួងសុខាភិបាល ក៏ដូចជាមន្ត្រីជំនាញពាក់ព័ន្ធថា ជំងឺប៉េសជ្រូកអាហ្វ្រិក មិនចម្លងមកមនុស្សក៏ដោយ ។
លោកបានបន្តថា «មិនហូបសាច់ជ្រូកនៅថ្ងៃនេះ នឹងធ្វើអោយប៉ះពាល់ទីផ្សារ ជាពិសេសអ្នកបរិភោគផ្ទាល់នៅថ្ងៃខាងមុខ។ មូលហេតុដែលយើងលើកឡើងថា វានឹងប៉ះពាល់ទីផ្សារ និងអ្នកបរិភោគផ្ទាល់នោះ ព្រោះនៅពេលដែលយើងមិនហូបនៅថ្ងៃនេះ អ្នកចិញ្ចឹមនឹងលែងចិញ្ចឹម បោះបង់ការចិញ្ចឹម ព្រោះគ្មានអ្នកហូប ហើយនៅពេលដែលជំងឺប៉េសជ្រូកអាហ្វ្រិកបាត់អស់ នៅពេលនោះអ្នកបរិភោគនឹងរកសាច់ជ្រូកហូបវិញ តែជាលទ្ធផលគឺមិនមានសាច់ជ្រូកសម្រាប់ផ្គត់ផ្គង់ជូនពួកគាត់ឡើយ ដោយសារតែគ្មានការចិញ្ចឹមបន្ត ។ នៅពេលហើយទីផ្សារសាច់ជ្រូកនឹងឡើងខ្ពស់ ហើយជះឥទ្ធិពលដល់អ្នកបរិភោគសាច់ជ្រូក ដែលមានចំនួនជាង៨០ភាគរយ នៃប្រជាជនសរុប ។
លោក លី ឡាវិល បានបន្ថែមថា « អ្នកទទួលផលជាប្រទេសជិតខាងទៅវិញទេ ព្រោះគេនៅតែបន្តចិញ្ចឹមបើទោះបីជាមានជំងឺប៉េសជ្រូកអាហ្វ្រិកក្តី ហើយប្រទេសដែលមិនកើតជំងឺនេះក៏គេរឹតតែពង្រីកការចិញ្ចឹមរបស់ខ្លួនបន្ថែម បន្ទាប់មកគេនឹងលក់មកឱ្យយើងក្នុងតម្លៃខ្ពស់ ព្រោះអីយើងគ្មានសាច់ជ្រូកក្នុងស្រុកសម្រាប់ផ្គត់ផ្គង់ដោយខ្លួនឯង » ។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាក៏បានអោយដឹងផងដែរថា អ្វីដែលព្រួយបារម្ភសម្រាប់សមាគម គឺនៅថ្ងៃអនាគតខ្លាចរកសាច់ជ្រូកហូបមិនបាន ។ ការមិនហូបសាច់ជ្រូកនៅពេលនេះ របស់ប្រជាពលរដ្ឋនៅជះឥទ្ធិពដល់ពលរដ្ឋខ្លួនឯងនៅពេលអនាគត ព្រោះអី នៅពេលដែលគ្មានសាច់ជ្រូកសម្រាប់ផ្គត់ផ្គង់នៅលើទីផ្សារ វានឹងឡើងថ្លៃដោយស្វ័យប្រវត្តិ ។ លោកបន្តថា កាលពីមុនតម្រូវការសាច់ជ្រូកសម្រាប់ទូទាំងប្រទេសកម្ពុជា មានប្រមាណ៧ពាន់ក្បាល ក្នុងមួយថ្ងៃ តែពេលនេះ បានធ្លាក់ចុះត្រឹមត្រូវ ២ពាន់ទៅ៣ពាន់ក្បាលប៉ុណ្ណោះ ក្នុងមួយថ្ងៃ ដូច្នេះ មានការថយចុះ លើសពាក់កណ្ដាល ។
លោក តាន់ ផាន់ណារ៉ា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ បានអោយដឹងថា ចំពោះស្ថានភាពជំងឺប៉េសជ្រូកអាហ្វ្រិកនៅកម្ពុជា នាពេលនេះ អាចគ្រប់គ្រងបាន១០០ភាគរយ ដោយមិនមានករណីផ្ទុះជំងឺនេះនៅតំបន់ណាទៀតឡើយ តែយ៉ាងណា មន្ត្រីជំនាញទាំងអស់ក៏នៅតែតាមដានមើលដដែល ពីព្រោះថាជំងឺនេះ មិនងាប់ភ្លាមៗឡើយ ។ លោកបានបន្តថា « ជំងឺនេះ បើនៅសីតុណ្ហភាពធម្មតាវាអាចរស់នៅបានរហូតដល់ ១០០ថ្ងៃ បើទោះបីជាក្លាយសាច់ងៀត ផ្អក ក៏ដោយ តែបើសិនជាយកសាច់នោះទៅដាក់ក្នុងទូរទឹកកកទៀតនោះ វាអាចរស់នៅបានរហូតដល់១០០០ថ្ងៃឯណោះ ។ ត្រង់នេះហើយដែលយើងបារម្ភខ្លាចវាកើតឡើងវិញនៅពេលណាមួយ » ។ លោកបន្តថា ករណីផ្ទុះជំងឺកន្លងមក យើងបានទិញពីកសិករ ក្នុងតម្លៃចរចារគ្នាណាមួយ ដើម្បីយកជ្រូកដែលមានផ្ទុកជំងឺនោះ ទៅកំទេចចោល ដោយមិនឱ្យដឹកឆ្លងតំបន់កើតហេតុឡើង បង្ការចម្លងដល់ជ្រូកដទៃនៅតំបន់ផ្សេង ។ លោកនិយាយថា៖« យើងបានគ្រប់គ្រងទាន់ហេតុការណ៍ ព្រោះក្នុងរយៈពេល៥ខែ ជំងឺនេះផ្ទុះតែក្នុង៥ខេត្តប៉ុណ្ណោះ ក្នុងចំណោម២៥ខេត្តរាជធានី តែបើនៅវៀតណាមវិញក្នុងរយៈពេលដូចគ្នាគឺបានទូទាំងប្រទេសទៅហើយ ។
សូមរំលឹកផងដែរថា ចាប់តាំងពីជំងឺប៉េសជ្រូកអាហ្វ្រិកកើតឡើងលើសត្វជ្រូកនៅកម្ពុជា ធ្វើឱ្យពលរដ្ឋភាគច្រើនមិនហ៊ានបរិភោគសាច់ជ្រូក ដោយរកសាច់សត្វផ្សេងជំនួសវិញ ដូចជាសាច់មាន់ សាច់គោ និងសាច់ត្រីជាដើម ធ្វើឱ្យតម្រូវការសាច់ទាំងនោះកើនឡើងខ្ពស់ ។ តែយ៉ាងណាក៏ដោយ បើតាមអាជីវករលក់សាច់គោ សាច់មាន់ សាច់ត្រីបាននិយាយថា ទោះបីជាខ្លួនលក់ដាច់ខ្លាំង ក៏តម្លៃនៅដដែល មិនមានការប្រែប្រួលឡើយ ព្រោះតម្លៃនាំចូលមកលក់ក៏មិនបានកើនឡើងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ