ខេត្តកណ្ដាល ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ក្នុងចំណោមគ្នា៣នាក់ ត្រូវកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលស្រុកអង្គស្នួល រួមជាមួយ កម្លាំងនគរបាលប៉ុស្តិ៍រដ្ឋបាលក្រាំងម្កាក់ និងនគរបាលប៉ុស្តិ៍រដ្ឋបាលព្រៃពួចនៃអធិការដ្ឋាននគរបាលស្រុកអង្គស្នួល ធ្វើការចាប់ខ្លួនកាលពីម៉ោង១២និង២០នាទីថ្ងៃត្រង់ ថ្ងៃទី១១…
ខេត្តកណ្ដាល ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ក្នុងចំណោមគ្នា៣នាក់ ត្រូវកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលស្រុកអង្គស្នួល រួមជាមួយ កម្លាំងនគរបាលប៉ុស្តិ៍រដ្ឋបាលក្រាំងម្កាក់ និងនគរបាលប៉ុស្តិ៍រដ្ឋបាលព្រៃពួចនៃអធិការដ្ឋាននគរបាលស្រុកអង្គស្នួល ធ្វើការចាប់ខ្លួនកាលពីម៉ោង១២និង២០នាទីថ្ងៃត្រង់ ថ្ងៃទី១១ ខែសីហា ឆ្នាំ២០១៩ ខណៈពេលដែលជនសង្ស័យទាំងនេះកំពុងជួបជុំគ្នាប្រើប្រាស់ថ្នាំញៀននៅក្នុងផ្ទះ១កន្លែង ស្ថិតនៅក្នុងភូមិប្រាំបីមុម ឃុំក្រាំងម្កាក់ ស្រុកអង្គស្នួល ខេត្តកណ្តាល ។
ជនសង្ស័យដែលត្រូវចាប់ខ្លួននោះឈ្មោះ សែម ចិត្រ ហៅប្រុស អាយុ៣៥ឆ្នាំ មានទីលំនៅបច្ចុប្បន្ននៅក្នុងភូមិរការ ឃុំរការ ស្រុកកណ្តាលស្ទឹង ជាអ្នកជួញដូរផង និងប្រើប្រាស់ផងដែរ។ ចំណែកបក្សពួកដែលរត់គេចខ្លួនរួចនោះ ម្នាក់ឈ្មោះ ស៊ូ សុផានិត អាយុ២៤ឆ្នាំ មានទីលំនៅបច្ចុប្បន្នក្នុងភូមិប្រាំបីមុម ឃុំក្រាំងម្កាក់ ស្រុកអង្គស្នួល គឺជាអ្នកផ្តល់ទីតាំងសម្រាប់ការជួញដូរនិងប្រើប្រាស់គ្រឿងញៀន រត់គេចខ្លួនបាត់ និងម្នាក់ទៀតឈ្មោះ សុខ ធឿន អាយុ៣៥ឆ្នាំ មានទីលំបច្ចុប្បន្នក្នុងភូមិរការ ឃុំរការ ស្រុកកណ្តាលស្ទឹង គឺជាមុខសញ្ញាប្រើប្រាស់។
សេចក្តីរាយការណ៍បន្តទៀតថា នៅក្នុងខណៈនោះនគរបាលបានដកហូតថ្នាំញៀនចំនួន៣កញ្ចប់, ទូរស័ព្ទដៃម៉ាកសាំស៊ុង១គ្រឿង, ឧបករណ៍សម្រាប់ប្រើប្រាស់ និងសម្ភារៈសម្រាប់វេចខ្ចប់ថ្នាំញៀនមួយចំនួន និងកូនកាបូបដាក់ថ្នាំញៀន២ផងដែរ។
បើតាមនគរបាល និយាយថា មុនពេលឈានដល់ការឃាត់ខ្លួននោះ ក្រុមជនសង្ស័យខាងលើបានជួបជុំគ្នាធ្វើសកម្មភាពជួញដូរ និងប្រើប្រាស់គ្រឿងញៀននៅក្នុងផ្ទះមួយនោះ ហើយត្រូវបែកការណ៍ដឹងដល់អ្នកភូមិ ។ ខណៈនោះអ្នកភូមិបានរាយការណ៍ជូនកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលស្រុក ទើបកម្លាំងផ្នែកខាងលើចុះសហការជាមួយកម្លាំងនគរបាលប៉ុស្តិ៍រដ្ឋបាលក្រាំងម្កាក់ និងនគរបាលប៉ុស្តិ៍រដ្ឋបាលព្រៃពួច ធ្វើការឆ្មក់ចូលទៅបង្ក្រាបតែម្តង ប៉ុន្តែពេលកម្លាំងទៅដល់ជនសង្ស័យហាក់ដឹងខ្លួនមុន ក៏រត់សម្រុកចេញគេចខ្លួន ហើយកម្លាំងចាប់បានម្នាក់ ចំណែក២នាក់ទៀតរត់គេចខ្លួនរួចបាត់ស្រមោល។
ប្រភពដដែលបន្តថា បន្ទាប់មកកម្លាំងបានឆែកឆេរក្នុងផ្ទះនោះរកឃើញមានថ្នាំញៀនចំនួន៣កញ្ចប់ រួមជាមួយវត្ថុតាងដូចរៀបរាប់ខាងលើ ហើយក្រោយពីការសាកសួរជនសង្ស័យបានសារភាពថា ថ្នាំញៀននោះគឺជារបស់ខ្លួនដែលបានទិញពីបុរសមិនស្គាល់ឈ្មោះម្នាក់នៅម្តុំផ្សារព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ដោយខ្លួនទិញម្តងៗចំនួន៥០០,០០០ រៀល ដើម្បីយកមកលក់បន្ត ។ (កែសម្រួលដោយ ៖ បុប្ផា)
ចែករំលែកព័តមាននេះ