ខេត្តក្រចេះ ៖ ត្រីផ្សោតឈ្មោល១ក្បាលមានទម្ងន់ជាង១០០គីឡូក្រាម ប្រវែងជាង២ម៉ែត្រ ត្រូវបានប្រទះឃើញងាប់អណ្ដែតទឹកទន្លេមេគង្គ កាលពីព្រឹកថ្ងៃទី១៦ កុម្ភៈ ។
ប្រជានេសាទដែលបានប្រទះឃើញនិយាយថា ត្រីផ្សោត១ក្បាលនេះងាប់អណ្ដែតទឹកទន្លេនៅចំណុចភូមិព្រែកជីក ឃុំសោប ស្រុកព្រែកប្រសព្វ ។
ខេត្តក្រចេះ ៖ ត្រីផ្សោតឈ្មោល១ក្បាលមានទម្ងន់ជាង១០០គីឡូក្រាម ប្រវែងជាង២ម៉ែត្រ ត្រូវបានប្រទះឃើញងាប់អណ្ដែតទឹកទន្លេមេគង្គ កាលពីព្រឹកថ្ងៃទី១៦ កុម្ភៈ ។
ប្រជានេសាទដែលបានប្រទះឃើញនិយាយថា ត្រីផ្សោត១ក្បាលនេះងាប់អណ្ដែតទឹកទន្លេនៅចំណុចភូមិព្រែកជីក ឃុំសោប ស្រុកព្រែកប្រសព្វ ។
បន្ទាប់ពីប្រទះឃើញរួចមក ផ្សោត១ក្បាលនេះត្រូវបានមន្ដ្រីជំនាញអង្គការ WWF បានរុំនិងវេចខ្ចប់យកទៅការិយាល័យក្នុងខេត្ដ ដើម្បីបន្ដធ្វើកោសល្យវិច័យរកពីមូលហេតុនៃការងាប់របស់ពូជត្រីដ៏កម្រដែលកំពុងមានការចូលចិត្ដទុកដាក់អភិរក្សនេះ ។ មន្ដ្រីនៃអង្គការ WWF ប្រចាំខេត្ដដែលមានតួនាទីលើការអភិរក្សបាននិយាយថា ផ្សោតមួយក្បាលនេះជាផ្សោតឈ្មោល មានទម្ងន់ជាង១០០គីឡូក្រាម និងប្រវែងជាង២ម៉ែត្រ ហើយក៏មានអាយុកាលក្នុងចន្លោះពី១៥ទៅ២០ឆ្នាំ ។ មន្ដ្រីជំនាញបានសន្និដ្ឋានថា វាបានងាប់ជាច្រើនថ្ងៃមកហើយ ដោយមានអាការៈហើម និងមានក្លិនស្អុយ ហើយក៏មានមងរុំជាប់នឹងកន្ទុយផងដែរ ។ មន្ដ្រីជាអ្នកធ្វើកោសល្យវិច័យបានរកឃើញថា មូលហេតុដែលបណ្ដាលឱ្យផ្សោតនេះងាប់គឺបណ្ដាលមកពីវាជាប់មងរបស់អ្នកនេសាទ ។
គួរបញ្ជាក់ថា បច្ចុប្បន្ននេះ ការធ្វើនេសាទបែបអនាធិបតេយ្យជាលក្ខណៈទ្រង់ទ្រាយធំ ឬតូចត្រូវបានគេរាយការណ៍ថា នៅតែកើតមានជារឿយៗ ពិសេសការធ្វើនេសាទក្នុងដែនអភិរក្សសត្វផ្សោតក៏នៅតែលួចមានសកម្មភាព ឥតខ្លាចញញើតអ្វីឡើយ ខណៈការចុះទប់ស្កាត់របស់មន្ដ្រីជំនាញត្រូវបានគេមើលឃើញថា នៅមានកម្រិតទាប ។
លោក សៀន គិន នាយខណ្ឌរដ្ឋបាលជលផលខេត្ដ បាននិយាយថា មានផ្សោតតូចធំប្រមាណជិត១០០ក្បាលកំពុងរស់នៅក្នុងអន្លង់មួយចំនួននៅក្នុងទន្លេមេគង្គភូមិសាស្រ្ដខេត្ដក្រចេះ ។ គួររំលឹកថា ការងាប់របស់ត្រីផ្សោតធំៗដែលគេចាត់ទុកថា ជាប្រភេទថនិកសត្វទឹកសាបដ៏កម្រនេះគឺបានងាប់ជាលើកទី២ បន្ទាប់ពីរដូវទឹកឡើងមុននេះ ។
បានកាត់សម្គាល់ថា កាលពីខែសីហា ឆ្នាំ២០១៣ កន្លងទៅ មានត្រីផ្សោតមេ១ក្បាលមានទម្ងន់ជាង១០០គីឡូក្រាម ប្រវែងជិត២ម៉ែត្រ ត្រូវគេប្រទះឃើញងាប់ដោយសារជាប់មង មកទើរនៅចំណុចកណ្ដាលក្រុងក្រចេះ ៕
ចែករំលែកព័តមាននេះ