រាជធានីភ្នំពេញ ៖ ក្រោយពីប្រកួតចាញ់ក្រុមចំណូលថ្មី ត្រាយអាស៊ី ខេត្តកណ្តាល កាលពី២សប្តាហ៍មុនដោយលទ្ធផល២-១ ក្នុងព្រឹត្តិការណ៍ប្រកួតបាល់ទាល់ពានរង្វាន់ Metfone Cambodian League 2014 ធ្វើឱ្យថ្នាក់ដឹកនាំក្លិបចម្ការកៅស៊ូបឹងកេតមិនសប្បាយចិត្តឡើយ ក៏បានប្រមូលកីឡាករក្នុងក្រុមយកទៅហ្វឹកហាត់លត់ដំបន្ថែមនៅទីលាន
រាជធានីភ្នំពេញ ៖ ក្រោយពីប្រកួតចាញ់ក្រុមចំណូលថ្មី ត្រាយអាស៊ី ខេត្តកណ្តាល កាលពី២សប្តាហ៍មុនដោយលទ្ធផល២-១ ក្នុងព្រឹត្តិការណ៍ប្រកួតបាល់ទាល់ពានរង្វាន់ Metfone Cambodian League 2014 ធ្វើឱ្យថ្នាក់ដឹកនាំក្លិបចម្ការកៅស៊ូបឹងកេតមិនសប្បាយចិត្តឡើយ ក៏បានប្រមូលកីឡាករក្នុងក្រុមយកទៅហ្វឹកហាត់លត់ដំបន្ថែមនៅទីលានរបស់ខ្លួនក្នុងខេត្តកំពង់ចាម រហូតទទួលលទ្ធផលល្អវិញដោយយកឈ្នះក្រុមណាហ្គាខបក្នុងលទ្ធផល២ទល់នឹង១ ក្នុងជំនួបប្រកួតកាលពីរសៀលថ្ងៃទី១៥ កុម្ភៈ នៅពហុកីឡដ្ឋានជាតិអូឡាំពិក ។
ការលេងរបស់ក្រុមចម្ការកៅស៊ូបឹងកេតនៅពេលនោះហាក់ល្អខ្លាំងណាស់ ដោយគ្រាន់តែចាប់ផ្តើមលេងបាន២នាទីដំបូង កីឡាករពាក់អាវលេខ១១ ចាន់ វឌ្ឍនាកា បានបំប៉ោងសំណាញ់ក្រុមណាហ្គាខប ១គ្រាប់ ។ នៅនាទីទី១៧ កីឡាករសញ្ជាតិហូឡង់ Van Der Hooft Elroy ពាក់អាវលេខ៤៩ របស់ក្រុមចម្ការកៅស៊ូបឹងកេត ស៊ុតបាល់បញ្ចូលទីបាន១គ្រាប់ទៀត ធ្វើឱ្យលទ្ធផលនៅតង់ទី១ ក្រុមចម្ការកៅស៊ូបឹងកេតនាំមុខក្រុមណាហ្គាខប ២-០ ។
ការប្រកួតនៅក្នុងតង់ទី១ ក្រុមចម្ការកៅស៊ូបឹងកេតមានប្រៀបលើក្រុមណាហ្គាខបទាំងស្រុង ទាំងខ្សែប្រយុទ្ធ និងខ្សែការពារ ដោយបានឡើងលេងដល់តំបន់គ្រោះថ្នាក់របស់ក្រុមណាហ្គាខបជាច្រើនលើក ។
ចូលដល់តង់ទី២ ការលេងរបស់ក្រុមទាំងពីរកាន់តែស្វិតស្វាញជាងមុន ជាពិសេសក្រុមណាហ្គាខបបានខិតខំប្រឹងប្រែងខ្លាំងណាស់រហូតដល់នាទីទី៨៤ ទើបក្រុមនេះមានឱកាសទាត់បាល់បញ្ចូលទីគូប្រកួតបាន១គ្រាប់វិញដោយកីឡាករជួន ជុំ ធ្វើឱ្យចប់ការប្រកួតក្រុមចម្ការកៅស៊ូបឹងកេត ឈ្នះក្រុមណាហ្គាខប២ទល់១ ។
សម្រាប់៤ប្រកួតរបស់ក្រុមចម្ការកៅស៊ូបឹងកេត គឺឈ្នះ២ប្រកួត ចាញ់២ប្រកួត មាន៦ពិន្ទុ ចំណែកក្រុមណាហ្គាខបវិញ ៤ប្រកួតគឺឈ្នះ២ប្រកួត ស្មើ១ប្រកួត និងចាញ់១ប្រកួត មាន៧ពិន្ទុ។
មួយប្រកួតទៀតក្រុម Western Uni FC ប្រកួតស្មើជាមួយក្រុមគីរីវង់សុខសែនជ័យក្នុងលទ្ធផល១-១ ។ មកដល់ពេលនេះក្រុម Western Uni FC លេងបាន៣ប្រកួត ឈ្នះ១ប្រកួត ស្មើ២ប្រកួត មាន៥ពិន្ទុ ចំណែកក្រុមគីរីវង់សុខសែនជ័យលេងបាន៤ប្រកួត ស្មើ២ប្រកួត និងចាញ់២ប្រកួត មាន២ពិន្ទុ ។
ដោយឡែកនៅលើទីលានស្តាតចាស់ឯណេះវិញ ក្រុមខេត្តស្វាយរៀងបានបំបាក់ក្រុមជើងខ្លាំងត្រាយអាស៊ី ១-០ និងមួយគូទៀតក្រុមសាកលវិទ្យាល័យអាស៊ីអឺរុ៉បលេងស្មើក្រុមក្រសួងការពារជាតិ ១-១ ។ ៤ប្រកួតរបស់ក្រុមត្រាយអាស៊ីទទួលបាន៧ពិន្ទុ ដោយឈ្នះ២ប្រកួត ស្មើ១ប្រកួត និងចាញ់១ប្រកួត ។ ចំណែក៣ប្រកួតរបស់ក្រុមខេត្តស្វាយរៀង ទទួលបាន៧ពិន្ទុដែរ ដោយឈ្នះ២ប្រកួត ស្មើ១ប្រកួត ។
ចំពោះ៤ប្រកួតរបស់ក្រុមក្រសួងការពារជាតិទទួលបាន៣ពិន្ទុ គឺស្មើ៣ប្រកួត ចាញ់១ប្រកួត ឯ៤ប្រកួតរបស់ក្រុមសាកលវិទ្យាល័យអាស៊ីអឺរុ៉បទទួលបាន២ពិន្ទុ គឺស្មើ២ប្រកួត ចាញ់២ប្រកួត ។ សម្រាប់ការប្រកួតនៅថ្ងៃអាទិត្យ ទី១៦ កុម្ភៈ មាន២ប្រកួតដោយលេងលើទីលានពហុកីឡដ្ឋានជាតិតែមួយ គឺចាប់ផ្តើមឡើងនៅវេលាម៉ោង១៥និង៣០នាទីតទៅ ដោយក្រុមភ្នំពេញក្រោនជួបជាមួយក្រុមបៀលប្រាយយូណាយធីត និងក្រុម Albirex Niigata Phnom Penh ដែលជាក្រុមចំណូលថ្មីប្រកួតជាមួយក្រុមអគ្គស្នងការដ្ឋាននគរបាលជាតិ ៕
ចែករំលែកព័តមាននេះ