រាជធានីភ្នំពេញ ៖ ក្រុមហ៊ុនខ្មែររៀលអីុស្ទេត កាលពីថ្ងៃទី១៤ កុម្ភៈ បានរៀបចំធ្វើសន្និសីទកាសែតមួយស្តីពីការប្រកាសបើកការប្រកួតបាល់ទាត់ដណ្តើមពានរង្វាន់ក្រុមហ៊ុនខ្មែររៀលអីុស្ទេតខាប់២០១៤ លើកទី៣ ជាបន្តទៀត ។
លោកគីម ហ៊ាង នាយកក្រុមហ៊ុនខ្មែររៀលអីុស្ទេតបានឱ្យដឹងថា ការប្រកួតបាល់ទាត់ដណ្តើមពានរង្វាន់ក្រុមហ៊ុនខ្មែររៀល
រាជធានីភ្នំពេញ ៖ ក្រុមហ៊ុនខ្មែររៀលអីុស្ទេត កាលពីថ្ងៃទី១៤ កុម្ភៈ បានរៀបចំធ្វើសន្និសីទកាសែតមួយស្តីពីការប្រកាសបើកការប្រកួតបាល់ទាត់ដណ្តើមពានរង្វាន់ក្រុមហ៊ុនខ្មែររៀលអីុស្ទេតខាប់២០១៤ លើកទី៣ ជាបន្តទៀត ។
លោកគីម ហ៊ាង នាយកក្រុមហ៊ុនខ្មែររៀលអីុស្ទេតបានឱ្យដឹងថា ការប្រកួតបាល់ទាត់ដណ្តើមពានរង្វាន់ក្រុមហ៊ុនខ្មែររៀលអីុស្ទេតខាប់២០១៤ លើកទី៣ នឹងចាប់ផ្តើមធ្វើពីថ្ងៃទី១៥ ខែមីនា ដល់ថ្ងៃទី៨ឧសភា ដែលជាថ្ងៃបញ្ចប់ដោយមានរយៈពេល១៣សប្តាហ៍ ។ ក្រុមហ៊ុនក៏បានធ្វើការប្រកាសបើកចំហដល់បណ្តាក្រុមហ៊ុន ឬអង្គការនានាដែលមានបំណងចង់ចុះឈ្មោះចូលរួមប្រកួតអាចមកទាក់ទងចុះឈ្មោះបាននៅទីលាន My Team ក្នុងខណ្ឌសែនសុខ ទូរស័ព្ទលេខ ០១២ ៤៨០ ៨៤៥ និងទីលានដំរីស ទូរស័ព្ទលេខ ០១២ ៦០ ៦០ ៥៨ ។
ការប្រកួតបាល់ទាត់ដណ្តើមពានរង្វាន់ក្រុមហ៊ុនខ្មែររៀលអីុស្ទេតខាប់ឆ្នាំនេះ គឺគណៈកម្មការរៀបចំការប្រកួតតម្រូវយកតែ៣២ក្រុមបុ៉ណ្ណោះ ហើយរហូតមកទល់នឹងពេលនេះមានក្រុមបាល់ទាត់ចុះឈ្មោះចូលរួមប្រកួតប្រហែលជា៦០ភាគរយហើយ ។ ចំពោះក្រុមទាំង៣២ នេះគឺត្រូវបែងចែកជា៤ពូល ក្នុង១ពូលមាន៨ក្រុម ។ វគ្គប្រកួតជម្រុះដំបូងក្នុង១ពូលយក៤ក្រុមឡើងទៅប្រកួតនៅវគ្គ១៦ក្រុមចុងក្រោយជាបន្តទៀត ។ ពូលA និងពូលB នឹងត្រូវប្រកួតនៅលើទីលាន My Team ចំណែកពូលC និងពូលD ត្រូវប្រកួតនៅលើទីលានដំរីស នៅក្នុងមជ្ឈមណ្ឌលគរុកោសល្យរាជធានីភ្នំពេញ ។ ការប្រកួតទាំង២ទីលាននេះ គឺធ្វើឡើងរៀងរាល់ថ្ងៃសៅរ៍ និងថ្ងៃអាទិត្យ ដោយពេលព្រឹកមានលេង២ប្រកួត និងពេលល្ងាចមានលេង២ប្រកួតទៀត ។ ចំពោះប្រាក់រង្វាន់ដែលត្រូវប្រគល់ជូនដល់ក្រុមជ័យលាភី គឺចំណាត់ថ្នាក់លេខ១ ទទួលបានប្រាក់៣លានរៀល ពាន១ ឯកសណ្ឋានកីឡារបស់ក្រុមហ៊ុនខ្មែររៀលអីុស្ទេត២២កំប្លេ និងបាល់ទាត់ចំនួន៣ សរុបជាទឹកប្រាក់មានចំនួន១.១៩៩ដុល្លារ ។ ចំណាត់ថ្នាក់លេខ២ ទទួលបានប្រាក់២លានរៀល ពាន១ ឯកសណ្ឋានកីឡារបស់ក្រុមហ៊ុន២២កំប្លេ បាល់ទាត់២ សរុបជាទឹកប្រាក់មានចំនួន៨៣៤ដុល្លារ ។ ចំណាត់ថ្នាក់លេខ៣ ទទួលបានប្រាក់១លានរៀល ពាន១ ឯកសណ្ឋានកីឡាក្រុមហ៊ុន២២កំប្លេ និងបាល់ទាត់១ សរុបជាទឹកប្រាក់មានចំនួន៥១៩ដុល្លារ និងចំណាត់ថ្នាក់លេខ៤ ទទួលបានឯកសណ្ឋានកីឡាក្រុមហ៊ុន២២កំប្លេ និងបាល់ទាត់១ សរុបជាទឹកប្រាក់មានចំនួន១៦៩ដុល្លារ ។
គួររំលឹកផងដែរថា កាលពីឆ្នាំ២០១២ ចំណាត់ថ្នាក់លេខ១ បានទៅលើក្រុមរុក្ខកីឡា និងឆ្នាំ២០១៣ បានទៅលើក្រុមគ្រីស្ទីនែរ ។ កម្មវិធីប្រកួតកីឡាមិនមែនអាជីពរបស់ក្រុមហ៊ុនខ្មែររៀលអីុស្ទេតនាពេលនេះ គណៈកម្មការរៀបចំការប្រកួតអនុញ្ញាតឱ្យមានកីឡាករអាជីពក្នុងមួយក្រុម២នាក់ ខុសគ្នាកាលពីឆ្នាំមុនៗដែលមិនអនុញ្ញាតឱ្យកីឡាករអាជីពចូលលេងនោះឡើយ។ លោកគីម ហ៊ាង ក៏បានបញ្ជាក់ឱ្យដឹងពីគោលបំណងដែលលោកបង្កើតឱ្យមានព្រឹត្តិការណ៍ប្រកួតបាល់ទាត់នេះឡើង គឺដោយសារតែរូបលោកចូលចិត្តលេងកីឡា និងស្រឡាញ់វិស័យកីឡាបាល់ទាត់តែប៉ុណ្ណោះ មិនចង់បានផលចំណេញពីការរៀបចំនេះឡើយ ។ ម្យ៉ាងវិញទៀត ការប្រកួតនេះធ្វើឡើងដើម្បីបង្កើនចំណងទាក់ទងគ្នាឱ្យកាន់តែមានភាពជិតស្និទ្ធថែមទៀត ហើយក៏ដើម្បីសុខភាពផងដែរ ៕
ចែករំលែកព័តមាននេះ